Home / Tag Archives: gulaab-shayari

Tag Archives: gulaab-shayari

Ajeeb Khwahish Hai Shehar Walon Se Chhup Chhupa Kar Kitaab Likhun..

alone_sad_girl_reading_book_noshi_gilani_shayari_poetry_ghazal

Ajeeb khwahish hai shehar walon se chhup chhupa kar kitaab likhun,
tumhare naam apni zindagi ki kitaab ka intisaab likhun.

Woh lamha kitna ajeeb tha jab humari aankhen gale mili thi,
main kis tarah ab muhabbaton ki shikastagi ke azaab likhun.

Tumhi ne mere ujaad raaston pe khwahishon ke diye jalaaye,
tumhi ne chaha tha khushk honthon se chaahaton ke gulaab likhun.

Kabhi woh din the ki neend aankhon ki sarhadon se pare pare thi,
magar main ab jab bhi sona chahun tumhari yaadon ke khwaab likhun.

Main tanha ladki diyaar-e shab mein jalaaun sach ke diye kahan tak,
siyaahkaron ki saltanat mein main kis tarah aaftaab likhun.

Qayadaton ke junoon mein jin ke qadam lahoo se range hue hain,
ye mere bas mein nahin hai logo ki unko izzat-maab likhun.

Yehi bahut hai ki inn labbon ko sada se mehroom kar ke rakh dun,
magar ye kaisi musalahat hai samundaron ko saraab likhun .!!

-> Noshi Gilani

Awwal Awwal Ki Dosti Hai Abhi..

Romantic-Happily_cute_couple_painting_drawing_ahmad Faraz_poetry_shayari_boy with guitar_girl on boy's shoulder

Awwal awwal ki dosti hai abhi,
ek ghazal hai ki ho rahi hai abhi.

Main bhi shehar-e wafa mein nau-waarid,
woh bhi ruk ruk ke chal rahi hai abhi.

Main bhi aisa kahan ka zood-shanaas,
woh bhi lagta hai sochti hai abhi.

Dil ki wafadaari hai apni jagah,
phir bhi kuchh ehtiyaat si hai abhi.

Garche pehla sa ijtinaab nahin,
phir bhi kam kam supurdagi hai abhi.

Kaisa mausam hai kuchh nahin khulta,
boonda-baandi bhi dhoop bhi hai abhi.

Khud-kalaami mein kab ye nasha tha,
jis tarah roo-ba-ru koi hai abhi.

Qurbatein laakh khoobsurat hon,
dooriyon mein bhi dilkashi hai abhi.

Fasl-e gul mein bahaar pehla gulaab,
kisi ki zulfon mein taankti hai abhi.

Muddatein ho gayi ‘faraz magar,
woh jo deewaanagi ki thi hai abhi. !!

Suna Hai Log Usey Aankh Bhar Ke Dekhte Hain..

Painting of beautiful women- ahmad faraz shayari- poetry picture- beautiful painting

Suna hai log usey aankh bhar ke dekhte hain,
so uss ke shehar mein kuchh din thehar ke dekhte hain.

Suna hai rabt hai uss ko kharaab haalon se,
so apne aap ko barbaad kar ke dekhte hain.

Suna hai dard ki gaahak hai chashm-e naaz uss ki,
so hum bhi uss ki gali se guzar ke dekhte hain.

Suna hai uss ko bhi hai sher-o shayari se shaghaf,
so hum bhi mojzey apne hunar ke dekhte hain.

Suna hai bole toh baaton se phool jhadte hain,
ye baat hai toh chalo baat kar ke dekhte hain.

Suna hai raat usey chaand takta rehta hai,
sitaare baam-e falak se utar ke dekhte hain.

Suna hai din ko usey titliyan staati hain,
suna hai raat ko jugnu thehar ke dekhte hain.

Suna hai hashr hain uss ki ghazaal si aankhein,
suna hai uss ko hiran dasht bhar ke dekhte hain.

Suna hai raat se badh kar hain kaakulen uss ki,
suna hai shaam ko saaye guzar ke dekhte hain.

Suna hai uss ki siyaah chashmagi qayamat hai,
so uss ko surma-farosh aah bhar ke dekhte hain.

Suna hai uss ke labbon se ghulaab jalte hain,
so hum bahaar pe ilzaam dhar ke dekhte hain.

Suna hai aaina timsaal hai jabeen uss ki,
jo saada dil hain usey ban sanwar ke dekhte hain.

Suna hai jab se hamaail hai uski gardan mein,
mizaaj aur hi laal-o gouhar ke dekhte hain.

Suna hai chashm-e tasawwur se dasht-e imkaan mein,
palang zaaviye uss ki kamar ke dekhte hain.

Suna hai uss ke badan ki taraash aisi hai,
ki phool apni qabaayen katar ke dekhte hain.

Woh sarv-qadd hai magar be-gul-e-muraad nahin,
ki uss shajar pe shagoofe samar ke dekhte hain.

Bas ek nigaah se lut,ta hai qaafila dil ka,
so raah-rawan-e-tamanna bhi dar ke dekhte hain.

Suna hai uss ke shabistaan se mutassil hai bahisht,
makeen udhar ke bhi jalwe idhar ke dekhte hain.

Ruke toh gardishein uska tawaaf karti hain,
chale toh uss ko zamaane thehar ke dekhte hain.

Kise naseeb ki be-pairhan usey dekhe,
kabhi kabhi dar-o deewar ghar ke dekhte hain.

Kahaniyan hi sahi sab mubalghe hi sahi,
agar woh khwaab hai tabeer kar ke dekhte hain.

Ab uss ke shehar mein thehrein ki kooch kar jayen,
Faraz aao sitaare safar ke dekhte hain. !!

Madad Bhi Shehar Jalne Ke Baad Aati Hai..

Kayi Gharon ko nigalne ke baad aati hai,
Madad bhi shehar jalne ke baad aati hai.

Na jaane kaisi mehak aa rahi hai basti mein,
Wahi jo doodh ubalne ke baad aati hai.

Nadi pahaadon se maidaan mein toh aati hai,
Magar ye baraf pighalne ke baad aati hai.

Woh neend jo teri palakon ke khwaab bunti hai,
Yahan toh dhoop nikalne ke baad aati hai.

Ye jhuggiyan toh gareebon ki khankaahen hain,
Qalandari yahan palatne ke baad aati hai.

Gulaab aise hi thode gulaab hota hai,
Ye baat kaanton pe chalne ke baad aati hai.

Shikaaytein toh humein mousam-e bahaar se hai,
Khizaan toh phoolne – phalne ke baad aati hai. !!

Ajanabi Hai Toh Mere Zehan Mein Rehta Kyon Hai..

Sad girl sitting on floor

Ajnabi hai toh mere zehan mein rehta kyon hai?
Woh jo patthar hai toh sheeshon ka maseeha kyon hai?
Woh hawa hai toh guzar hi jaaye hawaon ki tarah,
Woh samunder hai toh thehra rahe, behta kyon hai?
Mere aangan mein nahin koi umeedon ka gulaab,
Phir ye mausam mere aangan mein utarta kyon hai?
Jis ke chehre pe saji jhooth ki tehreerein hain,
Dil ussi shakhs ke waadon se behlta kyon hai?
Ye mera dil.. ye mausam..  ye anjaan sa dil,
Phir na jaane tere naam se dhadkta kyon hai ..??

Mera Ye Intezaar Khatm Kar Do..

Intezaar Poetry

Mujhe jaare ka mousam yun pasand hai.
ki iss ke baad phir bahaar aayegi,
tumhaare pasndeeda soorkh gulaabon ka mousam !

Har saal ki tarha iss saal bhi zard patton ka mousam guzar gaya..
phir wohi soorkh gulaabon ka mousam hai.. wohi jagah hai aur main hun,
pahle ki tarha tanha !
wahin khada hun,
jahan hum milte the aksar.
bas ek baar aa jaao aur,
mera ye intezaar khatm kar do !

Ye soorkh gulaab mujh se le lo aur,
faqat itna keh do ki ” mujhe tum se mohabbat nahin”
soorkh gulaabon ki ye qataar khatm kar do,
aur ye bahaar khatm kar do,
bas
mera ye intezaar khatm kar do. !!