Home / Tag Archives: ghum

Tag Archives: ghum

Zindagi Ka Lutf Bhi Aa Jayega..

Hafeez Jalandhari Poetry

Zindagi ka lutf bhi aa jaayega,
zindagaani hai toh dekha jaayega.

Jis tarah lakdi ko kha jaata hai ghun,
rafta rafta ghum mujhe kha jaayega.

Hashr ke din meri chup ka maajra,
kuchh na kuchh tum se bhi poochha jaayega.

Muskura kar munh chida kar ghoor kar,
jaa rahe ho khair dekha jaayega.

Kar diya hai tum ne dil ko mutmaeen,
dekh lena sakht ghabra jaayega.

Hazrat-e-dil kaam se jaaunga main,
dil-lagi mein aap ka kya jaayega.

Doston ki bewafaai par ‘hafeez’
sabr karna bhi mujhe aa jaayega. !!

Hafeez Jalandhari Poetry Collection

Subscribe us for hafeez jalandhari shayari, ghazals, poems, nazms, urdu poets. 

Har Janam Mein Usi Ki Chahat The..

Bashir Badr Poetry

Har janam mein usi ki chaahat the,
hum kisi aur ki amaanat the.

Uss ki aankhon mein jhilmilaati hui,
hum ghazal ki koi alaamat the.

Teri chaadar mein tan samet liya,
hum kahan ke daraaz qaamat the.

Jaise jungle mein aag lag jaaye,
hum kabhi itne khoobsurat the.

Paas reh kar bhi door door rahe,
hum naye daur ki mohabbat the.

Is khushi mein mujhe khyaal aaya,
ghum ke din kitne khoobsurat the.

Din mein in jugnuon se kya lena,
ye diye raat ki zaroorat the. !!

Bashir Badr Poetry Collection

Subscribe us for bashir badr poems, urdu poetry, shayari, nazms, poetry, shair, ghazals, shairy.

Agar Hum Kahen Aur Woh Muskura Dein..

Sudarshan Faaqir Poetry

Agar hum kahen aur woh muskura den,
hum un ke liye zindgaani luta den.

Har ek mod par hum ghumon ko sazaa den,
chalo zindagi ko mohabbat bana den.

Agar khud ko bhoole toh kuchh bhi na bhoole,
ki chaahat mein un ki khuda ko bhula den.

Kabhi ghum ki aandhi jinhen chhoo na paaye,
wafaaon ke hum woh nasheman bana den.

Qayaamat ke deewaane kehte hain hum se,
chalo un ke chehre se parda hata den.

Saza den, silaa den, bana den, mitaa den
magar woh koi faislaa toh sunaa den. !!

Sudarshan Faakir Poetry Collection

Subscribe us for Urdu Poetry. Legend Urdu Poets Poetry.

Dariya Ko Zom Tha Ki Main Dhaare Pe Aa Gaya..

Dariya ko zom tha ki main dhaare pe aa gaya,
lekin main bach bachaa ke kinaare pe aa gaya.

Mujh ko bulaane waalon ne umren nikaal di,
lekin main tere ek ishaare pe aa gaya.

Uss ka tamaam husn humari nazar mein hai,
kashmir saara ek shikaare pe aa gaya.

Saanso ki dor toot bhi jaaye toh ghum nahin,
shukr-e khuda main aakhri paare pe aa gaya. !!

Munawwar Rana

Ajab Nashat Se Jallad Ke Chale Hain Hum Aage..

Mirza Ghalib Poetry

Ajab nashaat se jallaad ke chale hain hum aage,
ki apne saaye se sar paanv se hai do qadam aage.

Qaza ne tha mujhe chaha kharaab-e-baada-e-ulfat,
faqat kharaab likha bas na chal saka qalam aage.

Ghum-e-zamana ne jhaadi nashaat-e-ishq ki masti,
wagarna hum bhi uthaate the lazzat-e-alam aage.

Khuda ke waaste daad uss junoon-e-shauq ki dena,
ki uss ke dar pe pahunchte hain nama-bar se hum aage.

Ye umar bhar jo pareshaniyan uthaayi hain hum ne,
tumhaare aaiyo aey turrah-ha-e-kham-ba-kham aage.

Dil-o-jigar mein pur-afshan jo ek mauja-e-khoon hai,
hum apne zom mein samjhe hue the uss ko dum aage.

Qasam janaaze pe aane ki mere khaate hain ‘ghalib
humesha khaate the jo meri jaan ki qasam aage. !!

– Click here for Mirza Ghalib Poetry collection

Ab Jo Ek Hasrat e Jawaani Hai..

Meer Taqi Meer Poetry

Ab jo ek hasrat-e-jawaani hai,
umar-e-rafta ki ye nishaani hai.

Rashk-e-yusuf hai aah waqt-e-azeez,
umr ek baar-e-kaarwaani hai.

Girya har waqt ka nahin be-hech,
dil mein koi ghum-e-nihaani hai.

Hum qafas-zaad qaidi hain warna,
taa chaman ek par-fishaani hai.

Uss ki shamsheer tez hai humdum,
mar rahenge jo zindagaani hai.

Ghum-o-ranj-o-alam niko yaan se,
sab tumhaari hi mehrbaani hai.

Khaak thi maujzan jahaan mein aur,
hum ko dhokha ye tha ki pani hai.

Yaan hue ‘meer’ tum baraabar khaak,
waan wahi naaz-o-sargiraani hai. !!

– Click here for Meer Taqi Meer Poetry Collection

Hai Bas-ki Har Ek Un Ke Ishaare Mein Nishaan Aur..

Mirza Ghalib Poetry

Hai bas-ki har ek un ke ishaare mein nishaan aur,
karte hain mohabbat toh guzarta hai gumaan aur.

Ya rab woh na samjhe hain na samjhenge meri baat,
de aur dil un ko jo naa de mujh ko zubaan aur.

Abru se hai kya uss nigaah-e-naaz ko paivand,
hai teer muqarrar magar iss ki hai kamaan aur.

Tum shehar mein ho toh humein kya ghum jab uthenge,
le aayenge baazaar se ja kar dil-o-jaan aur.

Har-chand subuk-dast hue but-shikani mein,
hum hain toh abhi raah mein hai sang-e-giraan aur.

Hai khoon-e-jigar josh mein dil khol ke rota,
hote kayi deeda-e-khun-naaba-fishaan aur.

Marta hun iss aawaaz pe har chand sar ud jaaye,
jallaad ko lekin woh kahe jaayen ki haan aur.

logon ko hai khurshid-e-jahan-taab ka dhoka,
har roz dikhaata hun main ek daagh-e-nihaan aur.

Leta na agar dil tumhen deta koi dum chain,
karta jo na marta koi din aah-o-fughaan aur.

Paate nahin jab raah to chadh jaate hain naale,
rukti hai meri taba toh hoti hai rawaan aur.

Hain aur bhi duniya mein sukhan-war bahut achchhe,
kehte hain ki ‘ghalib’ ka hai andaaz-e-bayaan aur. !!

– Click here for Mirza Ghalib Poetry collection