Home / Tag Archives: ghar-shayari

Tag Archives: ghar-shayari

Munawwar Rana – Maa – Part 3

Gale milne ko aapas mein duaayen roz aati hain,
abhi masjid ke darwaaze pe maayen roz aati hain.

Kabhi kabhi mujhe yun bhi azaan bulaati hai,
shareer bachche ko jis tarah maa bulaati hai.

Kisi ko ghar mila hisse mein ya koi dukaan aayi,
main ghar mein sab se chhota tha mere hisse mein maa aayi.

Aye andhere dekh le munh tera kaala ho gaya,
maa ne aankhen khol di ghar mein ujaala ho gaya.

Iss tarah mere gunaahon ko woh dho deti hai,
maa bahut gusse mein hoti hai toh ro deti hai.

Meri khwaahish hai ki main phir se farishtaa ho jaaun,
maa se iss tarah lipat jaaun ki bachcha ho jaaun.

Mera khuloos toh poorab ke gaaon jaisa hai,
sulooq duniya ka sauteli maaon jaisa hai.

Roshni deti hui sab laaltenen bujh gayi,
khat nahin aaya jo beton ka toh maayen bujh gayi.

Woh maila sa boseeda sa aanchal nahin dekha,
barason hue hum ne koi peepal nahin dekha.

Kayi baaten mohabbat sab ko buniyaadi bataati hai,
jo par-daadi bataati thi wahi daadi bataati hai. !!

Munawwar Rana

Mujh Ko Yaqeen Hai Sach Kehti Thi Jo Bhi Ammi Kehti Thi..

Mujh ko yaqeen hai sach kehti thi jo bhi ammi kehti thi,
jab mere bachpan ke din the chaand mein pariyaan rehti thi.

Ek ye din jab apnon ne bhi hum se naata tod liya,
ek woh din jab ped ki shaakhen bojh humara sehti thi.

Ek ye din jab saari sadken roothi roothi lagti hain,
ek woh din jab aao khelen saari galiyaan kehti thi.

Ek ye din jab jaagi raaten deewaron ko takti hain,
ek woh din jab shaamon ki bhi palken bojhal rehti thi.

Ek ye din jab zehan mein saari ayyaari ki baaten hain,
ek woh din jab dil mein bholi bhaali baaten rehti thi.

Ek ye din jab laakhon ghum aur kaal pada hai aansoo ka,
ek woh din jab ek zara si baat pe nadiyaan behti thi.

Ek ye ghar jis ghar mein mera saaz-o saamaan rehta hai,
ek woh ghar jis ghar mein meri burhi naani rehti thi. !!

Javed Akhtar

Aaj Zara Fursat Paayi Thi Aaj Usey Phir Yaad Kiya..

Aaj zara fursat paayi thi aaj usey phir yaad kiya,
band gali ke aakhiri ghar ko khol ke phir aabaad kiya.

Khol ke khidki chaand hansa phir chaand ne donon hathon se,
rang udaaye phool khilaaye chidyon ko aazaad kiya.

Bade bade ghum khade hue the rasta roke raahon mein,
chhoti chhoti khushiyon se hi hum ne dil ko shaad kiya.

Baat bahut mamooli si thi ulajh gayi takraaron mein,
ek zara si zid ne aakhir donon ko barbaad kiya.

Danaaon ki baat na maani kaam aayi nadaani hi,
suna hawa ko padha nadi ko mausam ko ustaad kiya. !!

Nida Fazli

Uss Ka Naksha Ek Betarteeb Afsaane Ka Tha..

Uss ka naksha ek betarteeb afsaane ka tha,
ye tamasha tha ya koi khwaab deewane ka tha.

Saare kirdaaron mein be-rishta taalluqq tha koi,
un ki behoshi mein ghum sa hosh aa jaane ka tha.

Ishq kya hum ne kiya aawaargi ke ehad mein,
ek jatan bechainiyon se dil ko bahlaane ka tha.

Khwaahishen hain ghar se baahar door jaane ki bahut,
shauq lekin dil mein waapas laut kar aane ka tha.

Le gaya dil ko jo iss mehfil ki shab main aye ‘munir
uss haseen ka bazm mein andaaz sharmaane ka tha. !!

Munir Niazi

Iss Shehar-e Sangdil Ko Jalaa Dena Chahiye..

Iss shehar-e sangdil ko jalaa dena chahiye,
phir uss ki khaak ko bhi udaa dena chahiye.

Milti nahin panaah humein jis zameen par,
ek hashar uss zameen pe utha dena chahiye.

Had se guzar gayi hai yahan rasm-e-qaaheri,
iss dahar ko ab iss ki sazaa dena chahiye.

Ek tez rad jaisi sadaa har makaan mein,
logon ko un ke ghar mein daraa dena chahiye.

Gum ho chale ho tum toh bahut khud mein aye ‘munir
duniya ko kuchh toh apna pata dena chahiye. !!

Munir Niazi

Dil Ka Safar Bas Ek Hi Manzil Pe Bas Nahin..

Dil ka safar bas ek hi manzil pe bas nahin,
itna khyaal uss ka humein iss baras nahin.

Dekho gul-e-ahaar-e-asar dasht-e-shaam mein,
deewar-o-dar koi bhi kahin pesh-o-pas nahin.

Aaya nahin yaqeen bahut der tak humein,
apne hi ghar ka dar hai ye baab-e-qafas nahin.

Aisa safar hai jis ki koi intiha nahin,
aisa makaan hai jis mein koi hum-nafas nahin.

Aayegi phir bahaar issi shehar mein ‘munir
taqdeer iss nagar ki faqat khaar-o-khaas nahin. !!

Munir Niazi

Jab Bhi Ghar Ki Chhat Pe Jaayen Naaz Dikhaane Aa Jaate Hain..

Jab bhi ghar ki chhat pe jaayen naaz dikhaane aa jaate hain,
kaise kaise log humare jee ko jalaane aa jaate hain.

Din bhar jo sooraj ke dar se galiyon mein chhupe rahte hain,
shaam aate hi aankhon mein woh rang puraane aa jaate hain.

Jin logon ne un ki talab mein sehraaon ki dhool udaayi,
ab ye haseen un ki qabaron par phool chadhaane aa jaate hain.

Kaun sa woh jaadoo hai jis se ghum ki andheri sard guphaa mein,
laakh nisaai saans dilon ke rog mitaane aa jaate hain.

Ze ki reshmi rumaalon ko kis kis ki nazron se chhupaayen,
kaise hain woh log jinhen ye raaz chhupaane aa jaate hain.

Hum bhi ‘munir ab duniya-daari kar ke waqt guzaarenge,
hote hote jeene ke bhi laakh bahaane aa jaate hain. !!

Munir Niazi

Mere Saath Tum Bhi Dua Karo Yun Kisi Ke Haq Mein Bura Na Ho..

Mere saath tum bhi dua karo yun kisi ke haq mein bura na ho,
kahin aur ho na ye haadsa koi raaste mein juda na ho.

Mere ghar se raat ki sej tak woh ek aansoo ki laqeer hai,
zara badh ke chaand se poochhana woh iss taraf se gaya na ho.

Sar-e shaam thehri hui zameen, aasmaan hai jhuka hua
isi mod par mere waaste woh charaagh le kar khada na ho.

Woh farishte aap hi dhoondhiye kahaaniyon ki kitaab mein,
jo bura kahe na bura sune , koi shakhs un se khafa na ho.

Woh wisaal ho ke firaaq ho teri aag mahkegi ek din,
woh gulaab ban ke khilega kya jo charaagh ban ke jala na ho.

Mujhe yun laga ki khamosh khushboo ke honth titli ne chhoo liye,
inhi zard patton ki aout mein koi phool soya hua na ho.

Isi ehtiyaat mein main raha, isi ehtiyaat mein woh raha
woh kahan kahan mere saath hai kisi aur ko ye pata na ho. !!

Bashir Badr

Aankhon Mein Raha Dil Mein Utar Kar Nahin Dekha..

Aankhon mein raha dil mein utar kar nahin dekha,
kashti ke musaafir ne samandar nahin dekha.

Bewaqt agar jaaunga sab chonk padenge,
ek umar hui din mein kabhi ghar nahin dekha.

Jis din se chala hun meri manzil pe nazar hai,
aankon ne kabhi meel ka patthar nahin dekha.

Ye phool mujhe koi wiraasat mein mile hain,
tum ne mera kaanton bhara bistar nahin dekha.

Patthar mujhe kehta hai mera chaahne wala,
main mom hun uss ne mujhe chhu kar nahin dekha. !!

Bashir Badr

Meri Nazar Ke Saleeqe Mein Kya Nahin Aata..

Meri nazar ke saleeqe mein kya nahin aata,
bas ek teri hi taraf dekhna nahin aata.

Akele chalna toh mera naseeb tha ki mujhe,
kisi ke saath safar baantna nahin aata.

Udhar toh jaate hain raaste tamaam hone ko,
idhar se ho ke koi raasta nahin aata.

Jagaana aata hai uss ko kayi tareeqon se,
gharon pe dastaken dene khuda nahin aata.

Yahan pe tum hi nahin aas paas aur bhi hain,
par uss tarah se tumhe sochna nahin aata.

Pade raho yun hi sahme hue diyon ki tarah,
agar hawaaon ke par baandhna nahin aata. !!

Wasim Barelvi