Home / Tag Archives: firaaq

Tag Archives: firaaq

Zulmat Kade Mein Mere Shab e Ghum Ka Josh Hai..

Mirza Ghalib Poetry

Zulmat-kade mein mere shab-e-ghum ka josh hai,
ek shama hai daleel-e-sehar su khamosh hai.

Nayy muzhda-e-wisal na nazzara-e-jamaal,
muddat hui ki aashti-e-chashm-o-gosh hai.

Mayy ne kiya hai husn-e-khud-aara ko be-hijaab,
aey shauq yaan ijaazat-e-tasleem-e-hosh hai.

Gauhar ko aqd-e-gardan-e-khubaan mein dekhna,
kya auj par sitaara-e-gauhar farosh hai.

Deedar baada hausla saaqi nigaah mast,
bazm-e-khyaal maikada-e-be-kharosh hai.

Aey taaza waardaan-e-bisaat-e-hawa-e-dil,
zanhaar agar tumhen hawas-e-naae-o-nosh hai.

Dekho mujhe jo deeda-e-ibrat-nigaah ho,
meri suno jo gosh-e-nasihat-neosh hai.

Saaqi ba-jalwa dushman-e-imaan-o-aagahi,
mutrib ba-naghma rahzan tamkeen-o-hosh hai.

Yaa shab ko dekhte the ki har gosha-e-bisaat,
daaman-e-baaghbaan-o-kaf-e-gul-farosh hai.

Luft-e-khiram-e-saaqi-o-zauq-e-sada-e-chang,
ye jannat-e-nigaah woh firdaus-e-gosh hai.

Ya subh-dum jo dekhiye aa kar toh bazm mein,
nayy woh suroor-o-soz na josh-o-kharosh hai.

Daagh-e-firaaq-e-sohbat-e-shab ki jali hui,
ek shama reh gayi hai so woh bhi khamosh hai.

Aate hain ghaib se ye mazaamin khyaal mein,
‘ghalib’ sareer-e-khama nawa-e-sarosh hai. !!

Click here for Mirza Ghalib Poetry collection

Woh Firaaq Aur Woh Wisaal Kahan..

Mirza Ghalib Poetry

Woh firaaq aur woh wisaal kahan,
woh shab-o-roz-o-maah-o-saal kahan.

Fursat-e-kaarobaar-e-shauq kise,
zauq-e-nazzaara-e jamaal kahan.

Dil toh dil woh dimaagh bhi na raha,
shor-e-sauda-e-khatt-o-khaal kahan.

Thi woh ek shakhs ke tasawwur se,
ab woh raanaayi-e-khyaal kahan.

Aisa aasaan nahin lahoo rona,
dil mein taaqat jigar mein haal kahan.

Hum se chhuta qimaar-khana e-ishq,
waan jo jaayen girah mein maal kahan.

Fikr-e-duniya mein sar khapaata hun,
main kahan aur ye wabaal kahan.

Muzmahil ho gaye qawaa ‘ghalib’
woh anaasir mein aitdaal kahan.

Bose mein woh muzaaiqa na kare,
par mujhe taaqat-e-sawaal kahan. !!

– Click here for Mirza Ghalib Poetry collection

Khud Apne Dil Mein Kharaashein Utaarni Hongi..

Khud apne dil mein kharaashein utaarni hongi,
abhi toh jaag ke raaten guzaarni hongi.

Tere liye mujhe hans hans ke bolna hoga,
mere liye tujhe zulfein sanwaarni hongi.

Teri sadaa se tujhi ko taraashna hoga,
hawa ki chaap se shaklein ubhaarni hongi.

Abhi toh teri tabiyyat ko jeetne ke liye,
dil-o nighaah ki shartein bhi haarni hongi.

Tere wisaal ki khwaahish ke tez rangon se,
tere firaaq ki subahein nikhaarni hongi.

Ye shayari, ye kitaabein, ye aayatein dil ki
nishaaniyan ye sabhi tujh pe waarni hongi. !!

 

Beqaraari Si Beqaraari Hai..

Beqaraari si beqaraari hai,
Wasl hai aur firaaq taari hai.

Jo guzaari na ja saki hum se,
hum ne woh zindagi guzaari hai.

Uss se kahiyo ki dil ki galiyon mein,
raat din teri intezaari hai.

Ek mehak samt-e jaan se aayi thi,
main ye samjha teri sawaari hai.

Haadson ka hisaab hai apna,
warna har aan sab ki baari hai.

Bin tumhaare kabhi nahi aayi,
kya meri neend bhi tumhaari hai?

nighaah-baan kya hue ki logon par,
apna saaya bhi ab toh bhari hai.

Khush rahe tu ki zindagi apni,
umar bhar ki ummeed’wari hai.

Aap mein kaise aaun main tujh bin?
saans jo chal rahi hai aari hai.

Hijar ho ya wisaal ho kuchh ho,
hum hain aur uski yaadgaari hai. !!

Wafa Mein Ab Ye Hunar Ikhtiyaar Karna Hai..

sad wating girl at night

Wafa mein ab ye hunar ikhtiyaar karna hai,
Woh sach kahe na kahe aitbaar karna hai.

Ye tujh ko jaagte rehne ka shouq kab se hua ?
Mujhe toh khair tera intezaar karna hai.

Hawa ke zadd mein jalaane hain ansuon ke chiraagh,
Kabhi ye jashn sar-e- raah guzaar karna hai.

Woh muskura ke naye waswason mein daal gaya,
Khyaal tha ki usey sharamsaar karna hai.

Misaal-e shaakh-e barhana khizan ke rutt mein kabhi,
Khud apne jism ko be’barg-o baar karna hai.

Tere firaaq mein din kis tarha katte apne,
Ki shughal-e shab toh sitaare shumaar karna hai.

Chalo ye ashk hi moti samajh ke bech aayein,
Kisi tarah toh humein rozgaar karna hai.

Kabhi toh dil mein chhupe zakhm bhi numayan hon,
Qaba samajh ke badan taar taar karna hai.

Khuda khabar ye koi zidd ki shouq hai mohsin,
Khud apni jaan ke dushman se pyaar karna hai. !!

Mohsin Naqvi

Main Raiza Raiza Hawa Mein Bikhar Gaya Chup Chaap..

Saddest boy, saddest man

Main raiza – raiza hawa mein bikhar gaya chup chaap,
Tere firaaq ka mousam guzar gaya chup chaap !

Kisi ne kaan na meri sada-e dil pe dharey,
Mere wazood mein ek shakhs marr gaya chup chaap …!!

Zikr-e Shab-e Firaaq se Wehashat Usey Bhi Thi..

Sad Boy-happy girl, Mohsin Naqvi Ghazal

Zikr-e shab-e firaaq se wehashat usey bhi thi
Meri tarah kisi se muhabbat usey bhi thi

Mujh ko bhi shauq tha naye cheharon ki deed ka
Rastaa badal ke chalane ki aadat usey bhi thi

Uss raat der tak woh raha mahv-e guftagu
Masroof main bhi kam tha faraagat usey bhi thi

Sunta tha woh bhi sab se puraani kahaaniyan
Taaza rafaaqaton ki zarurat usey bhi thi

Mujh se bichhad ke shehar mein ghul-mil gaya woh shakhs
Haalanki shehar bhar se raqabat usey bhi thi

Woh mujh se badh ke zabt ka aadii tha jee gaya
Warna har ek saans qayaamat usey bhi thi …!!

Mohsin Naqvi