Home / Tag Archives: faqeer-shayari

Tag Archives: faqeer-shayari

Beemar Ko Marz Ki Dawa Deni Chahiye..

Beemar ko marz ki dawa deni chahiye,
main peena chahta hun pila deni chahiye.

Allaah barkaton se nawaazega ishq mein,
hai jitni poonji paas laga deni chahiye.

Dil bhi kisi faqeer ke huzre se kam nahin,
ye duniya yahin pe laa ke chhupa deni chahiye.

Main khud bhi karna chahta hun apna saamna,
tujh ko bhi ab naqaab utha deni chahiye.

Main phool hun toh phool ko guldaan ho naseeb,
main aag hun toh aag bujha deni chahiye.

Main taaj hun toh taaj ko sar pe sajaayen log,
main khaak hun toh khaak udaa deni chahiye.

Maine jabr hun toh jabr ki taaiid band ho,
main sabr hun toh mujh ko dua deni chahiye.

Main khwaab hun toh khwaab se chaunkaaiye mujhe,
main neend hun toh neend udaa deni chahiye.

Sach baat kaun hai jo sar-e-aam keh sake,
main keh raha hun mujh ko saza deni chahiye. !!

Rahat Indori

Jhoothi Bulandiyon Ka Dhuaan Paar Kar Ke Aa..

Jhoothi bulandiyon ka dhuaan paar kar ke aa,
qadd naanpna hai mera toh chhat se utar ke aa.

Iss paar muntazir hain teri khush-naseebiyan,
lekin ye shart hai ki nadi paar kar ke aa.

Kuchh door main bhi dosh-e hawa par safar karun,
kuchh door tu bhi khaak ki soorat bikhar ke aa.

Main dhool mein ataa hun magar tujh ko kya hua,
aaina dekh ja zara ghar ja sanwar ke aa.

Sone ka rath faqeer ke ghar tak na aayega,
kuchh maangna hai hum se toh paidal utar ke aa. !!

Rahat Indori

Sar Se Chaadar Badan Se Qabaa Le Gayi..

Sar se chaadar badan se qabaa le gayi,
zindagi hum faqeeron se kya kya le gayi.

Meri mutthi mein sookhe hue phool hain,
khusbuon ko udaa kar hawaa le gayi.

Main samundar ke seene mein chattaan tha,
raat ek mauj aayi baha le gayi.

Hum jo kaaghaz the ashqon se bheege hue,
kyon chiraaghon ki lau tak hawaa le gayi.

Chaand ne raat mujh ko jaga kar keha,
ek ladki tumhara pata le gayi.

Meri shoharat siyaasat se mahfoos hai,
ye tawaayaf bhi ismat bacha le gayi. !!

Bashir Badr

Raat Aankhon Mein Dhali Palkon Pe Jugnu Aaye..

Shahrukh_Khan_srk_anushka_sharma_romantic_sad_in_jab_tak_hai_jaan_shayari_poetry_bashir_badr

Raat aankhon mein dhali palkon pe jugnu aaye,
hum hawaaon ki tarah jaa ke usey chhoo aaye.

Bas gayi hai mere ehsaas mein ye kaisi mehak,
koi khushboo main lagaaun teri khushboo aaye.

Mera aaina bhi ab meri tarah paagal hai,
aaina dekhne jaaun toh nazar tu aaye.

Kis taklluf se gale milne ka mausam aaya,
kuchh kaaghaz ke phool liye kaanch ke baazu aaye.

Uss ka dil, dil nahin patthar ka kaleja hoga
jis ko phoolon ka hunar, aansoo ka jaadoo aaye.

Uss ne chhoo kar mujhe patthar se phir insaan kiya,
muddaton baad meri aankhon mein aansoo aaye.

Un faqeeron ko ghazal apni sunaate rahiyo,
jin ki aawaaz mein darghaahon ki khushboo aaye. !!

Bashir Badr

Dukh Fasaana Nahin Ki Tujh Se Kahen..

Dukh fasaana nahin ki tujh se kahein,
dil bhi mana nahin ki tujh se kahein.

Aaj tak apni bekali ka sabab,
khud bhi jana nahin ki tujh se kahein.

Be’tarah haal-e dil hai aur tujh se,
dostana nahin ki tujh se kahein.

Ek tu haraf-e aashna tha magar,
ab zamana nahin ki tujh se kahein.

Qaasida hum faqeer logon ka,
ek thikana nahin ki tujh se kahein.

Aye khuda dard-e dil hai bakhshish-e dost,
aab-o daana nahin ki tujh se kahein.

Ab toh apna bhi uss gali mein ‘faraz
aana jana nahin ki tujh se kahein. !!

Sab Ke Kehne Se Iraada Nahin Badla Jata..

Sab ke kehne se iraada nahin badla jata,
Har saheli se dupatta nahin badla jata.

Hum toh shayar hain siyaasat nahin aati hum ko,
Hum se munh dekh ke lehza nahin badla jata.

Hum faqeeron ko faqeeri ka nasha rehta hai,
Warna kya shehar mein shajra nahin badla jata.

Aisa lagta hai ki woh bhool gaya hai hum ko,
Ab kabhi khidki ka parda nahin badla jata.

Jab rulaaya hai toh hansne pe na majboor karo,
Roz beemaar ka nuskha nahin badla jata.

Ghum se fursat hi kahan hai ki tujhe yaad karun,
Itni laashen hain ton kandha nahin badla jata.

Umar ek talkh haqeeqat hai dosto phir bhi,
Jitne tum badle ho Utna nahin badla jata. !!