Home / Tag Archives: Dosti

Tag Archives: Dosti

Dard-e Dil Mein Kami Na Ho Jaye..

Bekhud Dehlvi Poetry

Dard-e dil mein kami na ho jaaye,
dosti dushmani na ho jaaye.

Tum meri dosti ka dum na bharo,
aasmaan muddai na ho jaaye.

Baithta hun humesha rindon mein,
kahin zaahid wali na ho jaaye.

Apne khu-e-wafa se darta hun,
aashiqi bandagi na ho jaaye. !!

Bekhud Dehlvi Poetry Collection

Subscribe us for Bekhud Dehlvi Shayari, Ghazals, Nazms,  Urdu Poetry, Shair, Poems, Urdu Poets. 

Ye Na Thi Humari Qismat Ki Wisaal e Yaar Hota..

Mirza Ghalib Poetry

Ye na thi humari qismat ki wisaal-e-yaar hota,
agar aur jeete rahte yehi intezaar hota.

Tere waade par jeeye hum toh ye jaan jhooth jaana,
ki khushi se mar na jaate agar aitbaar hota.

Teri naazuki se jaana ki bandha tha ahd boda,
kabhi tu naa tod sakta agar ustuwaar hota.

Koi mere dil se poochhe tere teer-e-neem-kash ko,
ye khalish kahan se hoti jo jigar ke paar hota.

Ye kahan ki dosti hai ki bane hain dost naaseh,
koi chaarasaaz hota koi ghumgusaar hota.

Rag-e-sang se tapakta woh lahoo ki phir na thamta,
jise ghum samajh rahe ho ye agar sharaar hota.

Kahun kis se main ki kya hai shab-e-ghum buri bala hai,
mujhe kya bura tha marna agar ek baar hota.

Hue mar ke hum jo ruswa hue kyon na gharq-e-dariya,
na kabhi janaaza uthta na kahin mazaar hota.

Usey kaun dekh sakta ki yagaana hai woh yakta,
jo dui ki boo bhi hoti toh kahin do-chaar hota.

Ye masaail-e-tasawwuf ye tera bayaan ‘ghalib
tujhe hum wali samajhte jo na baada-khwaar hota. !!

–  Click here for Mirza Ghalib Poetry collection

Sher Se Shayari Se Darte Hain..

Habib Jalib Poetry

Sher se shayari se darte hain,
kam nazar roshni se darte hain.

Log darte hain dushmani se teri,
hum teri dosti se darte hain.

Dahar mein aah-e-be-kasaan ke siwa,
aur hum kab kisi se darte hain.

Hum ko ghairon se dar nahin lagta,
apne ahbaab hi se darte hain.

Daawar-e-hashr bakhsh de shayad,
haan magar maulvi se darte hain.

Roothta hai toh rooth jaaye jahaan,
un ki hum berukhi se darte hain.

Har kadam par hai mohtasib ‘jalib’
ab toh hum chaandni se darte hain. !!

– Click Here For Habib Jalib Poetry, Poems  Collection

Din Saleeqe Se Ugaa Raat Thikaane Se Rahi..

Din saleeqe se ugaa raat thikaane se rahi,
dosti apni bhi kuchh roz zamaane se rahi.

Chand lamhon ko hi banti hain musawwir aankhen,
zindagi roz toh tasweer banaane se rahi.

Iss andhere mein toh thokar hi ujaala degi,
raat jungal mein koi shama jalaane se rahi.

Faasla chaand bana deta hai har patthar ko,
door ki raushni nazdeek toh aane se rahi.

Shehar mein sab ko kahan milti hai rone ki jagah,
apni izzat bhi yahan hansne hansaane se rahi. !!

Nida Fazli

Mohabbaton Mein Dikhawe Ki Dosti Na Mila..

Bashir Badr Poetry

Sad_boy_man_with_diary_Bashir_badr_poetry_shayari

Mohabbaton mein dikhaawe ki dosti na mila,
agar gale nahin milta toh haath bhi na mila.

Gharon pe naam the naamon ke saath ohdey the,
bahut talaash kiya, koi aadmi na mila.

Tamaam rishton ko main ghar pe chhod aaya tha,
phir uske baad mujhe koi ajnabi na mila.

Khuda ki itni badi kaaynaat mein maine,
bas ek shakhs ko maanga mujhe wohi na mila.

Bahut ajeeb hai ye qurbaton ki doori bhi,
woh mere saath reha aur mujhe kabhi na mila. !!

Bashir Badr Poetry Collection

Subscribe us for Bashir Badr Shayari, Urdu Poetry, Ghazals, Nazms, Shair, Poems, Urdu Poets.

Dosti Jab Kisi se Ki Jaaye..

sad boy in love thinking

Dosti jab kisi se ki jaaye,
Dushman’on ki bhi raaye li jaaye ..!

Maut ka zehar hai fizaaon mein,
Ab kahaN jaa ke saans li jaaye ..?

Bas isi soch mein hun duba hua,
Ye nadi kaise paar ki jaaye ..?

Mere maazi ke zaKhm bharane lage,
Aaj phir koi bhool ki jaaye ..!

Bottalen khol ke toh pee barason,
Aaj dil khol ke bhi pee jaaye …!!