Home / Tag Archives: dost

Tag Archives: dost

Kahan Kisi Ki Himayat Mein Mara Jaunga..

Urdu Poetry

 Kahan kisi ki himaayat mein maara jaaunga,
 main kam shanas murrwwat mein maara jaaunga.

 Main maara jaaunga pehle kisi fasaane mein,
 phir uss ke baad haqeeqat mein maara jaaunga.

 Main bargalaaya hua lad raha hun apne khilaaf,
 main apne shauq-e shahaadat mein maara jaaunga.

 Mujhe bataaya hua hai meri chhathi hiss ne,
 main apne ehd-e qilaafat mein maara jaaunga.

 Mera ye khoon mere dushmanon ke sar ho gaya,
 main apne doston ki hiraasat mein maara jaaunga.

 Yahan kamaan uthaana meri zaroorat hai,
 wagarna main bhi sharaafat mein maara jaaunga.

 Faraagh mere liye maut ki alaamat hai,
 main  apni pehli faraaghat mein maara jaaunga.

 Main chup raha ton mujhe maar dega mera zameer,
 gawaahi di toh adaalat mein maara jaaunga.

 Bas ek sulah ki soorat mein jaan bakhshi hai,
 kisi bhi doosri soorat mein maara jaaunga.

 Nahin marunga kisi jung mein ye soch liya hai,
 main ab ki baar mohabbat mein maara jaaunga. !!

Urdu Ghazals Collection

Subscribe us for urdu shayari, urdu poets, ghazals, nazms, poems, shair, shairy.  

Koi Anees Koi Aashna Nahin Rakhte..

Meer Anees Poetry

Koi ‘anees’ koi aashna nahin rakhte,
kisi ki aas baghair az khuda nahin rakhte.

Kisi ko kya ho dilon ki shikastagi ki khabar,
ki tootne mein ye sheeshe sadaa nahin rakhte.

Faqeer dost jo ho hum ko sarfaraaz kare,
kuchh aur farsh ba-juz boriya nahin rakhte.

Musaafiro shab-e-awwal bahut hai tera-o-taar,
charaagh-e-qabr abhi se jala nahin rakhte.

Woh log kaun se hain aey khuda-e-kaun-o-makaan,
sukhan se kaan ko jo aashna nahin rakhte.

Musaafiraan-e-adam ka pata mile kyonkar,
woh yun gaye ki kahin naqsh-e-paa nahin rakhte.

Tap-e-darun ghum-e-furqat waram-e-payaada-rawi,
maraz toh itne hain aur kuchh dawaa nahin rakhte.

khulega haal unhen jab ki aankh band hui,
jo log ulfat-e-mushkil-kusha nahin rakhte.

Jahaan ki lazzat-o-khwaahish se hai bashar ka khameer,
woh kaun hain ki jo hirs-o-hawaa nahin rakhte.

Anees’ bech ke jaan apni hind se niklo,
jo tosha-e-safar-e-karbala nahin rakhte. !!

Click Here For Meer Anees Poetry Collection

Dard Se Mere Hai Tujh Ko Beqaraari Haaye Haaye..

Mirza Ghalib Poetry

Dard se mere hai tujh ko beqaraari haaye haaye,
kya hui zaalim teri ghafalat-shiaari haaye haaye.

Tere dil mein gar na tha aashob-e-ghum ka hausala,
tune phir kyon ki thi meri ghum-gusaari haaye haaye.

Kyon meri ghum-khwaargi ka thujh ko aaya tha khyaal,
dushmani apani thi meri dost-daari haaye haaye.

Umar bhar ka tune paimaan-e-wafa baandha toh kya,
umar ko bhi toh nahin hai paayedaari haaye haaye.

Zehar lagti hai mujhe aab-o-hawa-e-zindagi,
Yaani tujh se thi ise na-saazgaari haaye haaye.

Ghulfeshaani haaye naaz-e-jalwa ko kya ho gaya,
khaak par hoti hai teri laala-kaari haaye haaye.

Sharm-e-ruswaayi se jaa chhupna naqaab-e-khaak mein,
khatm hai ulfat ki tujh par parda-daari haaye haaye.

Khaak mein naamoos-e-paimaan-e-muhabbat mil gayi,
uth gayi duniya se raah-o-rasm-e-yaari haaye haaye.

Haath hi tegh-aazmaa ka kaam se jaata raha,
dil pe ek lagne na paaya zakhm-e-kaari haaye haaye.

Kis tarah kaate koi shab-haaye-taar-eh-barshigaal,
hai nazar khoo-karda-e-akhtar-shumaari haaye haaye.

Gosh mahjoor-e-payaam-o-chashm mahroom-e-jamaal,
ek dil tis par ye naa-ummeed-waari haaye haaye.

Ishq ne pakda na tha ‘ghalib’ abhi wehshat ka rang,
rah gaya tha dil mein jo kuchh zauq-e-khaari haaye haaye.

Gar museebat thi toh ghurbat mein utha lete ‘asad’
meri dehli hi mein honi thi ye khwaari haaye haaye. !!

– Click here for Mirza Ghalib Poetry collection

Bahut Pehle Se Un Qadmon Ki Aahat Jaan Lete Hain..

Firaq Gorakhpuri Poetry

Bahut pehle se un qadmon ki aahat jaan lete hain,
tujhe aye zindagi hum door se pehchaan lete hain.

Meri nazren bhi aise qaatilon ka jaan-o-imaan hain,
nigaahen milte hi jo jaan aur imaan lete hain.

Tabiyat apni ghabraati hai jab sunsaan raaton mein,
hum aise mein teri yaadon ki chaadar taan lete hain.

Khud apna faisla bhi ishq mein kaafi nahin hota,
Use bhi kaise kar guzren jo dil mein thaan lete hain.

Tujhe ghaata na hone denge kaarobaar-e-ulfat mein,
hum apne sar tera aye dost har ehsaan lete hain.

Humari har nazar tujh se nayi saugandh khaati hai,
toh teri har nazar se hum naya paimaam lete hain.

Jise soorat bataate hain pata deti hai seerat ka,
ibaarat dekh kar jis tarha maani jaan lete hain.

Firaq’ aksar badal kar bhes milta hai koi kaafir,
kabhi hum jaan lete hain kabhi pehchaan lete hain. !!

– Click Here For Firaq Gorakhpuri Poetry Collection

Aye Dost Teri Aankh Jo Nam Hai Toh Mujhe Kya..

Qateel Shifai Poetry

Aye dost! teri aankh jo nam hai toh mujhe kya,
main khoob hansunga tujhe ghum hai toh mujhe kya.

Kya maine keha tha ki zamaane se bhala kar,
ab tu bhi sazawaar-e-sitam hai toh mujhe kya.

Haan le le qasam gar mujhe qatra bhi mila ho,
tu shaaki-e-arbaab-e-karam hai toh mujhe kya.

Jis dar se nadaamat ke siwa kuchh nahin milta,
uss dar pe tera sar bhi jo kham hai toh mujhe kya.

Maine toh pukaara hai mohabbat ke uffaq se,
raste mein tere sang-e-haram hai toh mujhe kya.

Bhoola toh na hoga tujhe suqraat ka anjaam,
haathon mein tere saaghar-e-sam hai toh mujhe kya.

Patthar na paden gar sar-e-bazaar toh kehna,
tu motarif-e-husn-e-sanam hai toh mujhe kya.

Main sarmad-o-mansoor bana hun teri khaatir,
ye bhi teri ummeed se kam hai toh mujhe kya. !!

– Click Here For Qateel Shifai Poetry, Poems Collection

Der Kar Di Dost..

Be-yaaro-madadgaar hi kaata tha saara din..
kuchh khud se ajnabi sa,
tanha, udaas saa..
saahil pe din bujhaa ke main, laut aaya phir wahin,
sunsaan si sadak ke khaali makaan mein!

Darwaaza kholte hi, mej pe rakhi kitaab ne,
halke se phadphada ke keha,
‘Der kar di dost!’

Gulzar

Halaat Se Khauf Kha Raha Hun..

Halaat se khauf kha raha hun,
sheeshe ke mehal bana raha hun.

Seene mein mere hai mom ka dil,
sooraj se badan chhupa raha hun.

Mehroom-e nazar hai jo zamaana,
aaina usey dikha raha hun.

Ahbaab ko de raha hun dhokha,
chehre pe khushi sajaa raha hun.

Dariya-e furaat hai ye duniya,
pyaasa hi palat ke jaa raha hun.

Hai shehar mein qahat pattharon ka,
jazbaat ke zakhm kha raha hun.

Mumkin hai jawaab de udaasi,
darr apna hi khatkhata raha hun.

Aaya na ‘Qteel dost koi,
saayon ko gale laga raha hun. !!