Home / Tag Archives: din-shayari

Tag Archives: din-shayari

Mujh Ko Yaqeen Hai Sach Kehti Thi Jo Bhi Ammi Kehti Thi..

Mujh ko yaqeen hai sach kehti thi jo bhi ammi kehti thi,
jab mere bachpan ke din the chaand mein pariyaan rehti thi.

Ek ye din jab apnon ne bhi hum se naata tod liya,
ek woh din jab ped ki shaakhen bojh humara sehti thi.

Ek ye din jab saari sadken roothi roothi lagti hain,
ek woh din jab aao khelen saari galiyaan kehti thi.

Ek ye din jab jaagi raaten deewaron ko takti hain,
ek woh din jab shaamon ki bhi palken bojhal rehti thi.

Ek ye din jab zehan mein saari ayyaari ki baaten hain,
ek woh din jab dil mein bholi bhaali baaten rehti thi.

Ek ye din jab laakhon ghum aur kaal pada hai aansoo ka,
ek woh din jab ek zara si baat pe nadiyaan behti thi.

Ek ye ghar jis ghar mein mera saaz-o saamaan rehta hai,
ek woh ghar jis ghar mein meri burhi naani rehti thi. !!

Javed Akhtar

Uthi Nigaah Toh Apne Hi Ru-ba-ru Hum The..

Uthi nigaah toh apne hi ru-ba-ru hum the,
zameen aaina-khana thi chaar soo hum the.

Dinon ke baad achaanak tumhara dhyan aaya,
khuda ka shukr ki uss waqt ba-vazu hum the.

Woh aaina toh nahin tha par aaine sa tha,
woh hum nahin the magar yaar hu-ba-hu hum the.

Zameen pe ladte hue aasmaan ke narge mein,
kabhi kabhi koi dushman kabhu kabhu hum the.

Humara zikr bhi ab jurm ho gaya hai wahan,
dinon ki baat hai mehfil ki aabroo hum the.

Khyaal tha ki ye pathraav rok dein chal kar,
jo hosh aaya toh dekha lahoo lahoo hum the. !!

Rahat Indori

Tumhare Naam Par Maine Har Aafat Sar Pe Rakhi Thi..

Tumhare naam par maine har aafat sar pe rakhi thi,
nazar sholon pe rakhi thi zubaan patthar pe rakhi thi.

Humare khwaab toh shehron ki sadkon par bhatakte the,
tumhari yaad thi jo raat bhar bistar pe rakhi thi.

Main apna azm le kar manzilon ki samt nikla tha,
mashaqqat haath pe rakhi thi qismat ghar pe rakhi thi.

Inhi saanson ke chakkar ne humen woh din dikhaaye the,
humare paanv ki mitti humare sar pe rakhi thi.

Sehar tak tum jo aa jaate toh manzar dekh sakte the,
diye palkon pe rakhe the shikan bistar pe rakhi thi. !!

Rahat Indori

Kaun Uss Raah Se Guzarta Hai..

Kaun uss raah se guzarta hai,
dil yun hi intezaar karta hai.

Dekh kar bhi na dekhne wale,
dil tujhe dekh dekh darta hai.

Shehar-e-gul mein kati hai saari raat,
dekhiye din kahan guzarta hai.

Dhyan ki sidhiyon pe pichhle pahar,
koi chup ke se paanv dharta hai.

Dil toh mera udaas hai ‘nasir
shehar kyon saayen saayen karta hai. !!

Nasir Kazmi

Waqt Se Kahiyo Zara Kam Kam Chale..

Waqt se kahiyo zara kam kam chale,
kaun yaad aaya hai aansoo tham chale.

Dum-ba-khud kyon hai khizan ki saltanat,
koi jhonka koi mauj-e-ghum chale.

Chaar soo baajen palon ki paayalen,
iss tarah raqqaasa-e-aalam chale.

Der kya hai aane waale mausamo,
din guzarte jaa rahe hain hum chale.

Kis ko fikar-e-gumbad-e-qasr-habaab
aabjoo paiham chale paiham chale. !!

Munir Niazi

Sun Bastiyon Ka Haal Jo Had Se Guzar Gayi..

Sun bastiyon ka haal jo had se guzar gayi,
un ummaton ka zikar jo raaston mein mar gayi.

Kar yaad un dinon ko ki aabaad thi yahan,
galiyan jo khaak-o khoon ki dahshat se bhar gayi.

Sarsar ki zadd mein aaye hue baam-o-dar ko dekh,
kaisi hawaayen kaisa nagar sard kar gayi.

Kya baab the yahan jo sadaa se nahin khule,
kaisi duaayen thi jo yahan beasar gayi.

Tanha ujaad burjon mein phirta hai toh ‘munir
woh zar-fishaaniyan tere rukh ki kidhar gayi. !!

Munir Niazi

Imtihaan Hum Ne Diye Iss Daar-e-Faani Mein Bahut..

Imtihaan hum ne diye iss daar-e-faani mein bahut,
ranj kheenche hum ne apni la-makaani mein bahut.

Woh nahin uss sa toh hai khwaab-e-bahaar-e-jaawedaan,
asal ki khushboo udi hai uss ke saani mein bahut.

Raat din ke aane jaane mein ye sona jaagna,
fikar walon ko pate hain iss nishaani mein bahut.

Koyalen kookin bahut deewaar-e-gulshan ki taraf,
chaand damka hauz ke shaffaf paani mein bahut.

Uss ko kya yaaden thi kya aur kis jagah par rah gayi,
tez hai dariya-e-dil apni rawaani mein bahut.

Aaj uss mehfil mein tujh ko bolte dekha ‘munir
toh ki jo mashHoor tha yun be-zubaani mein bahut. !!

Munir Niazi

Jab Bhi Ghar Ki Chhat Pe Jaayen Naaz Dikhaane Aa Jaate Hain..

Jab bhi ghar ki chhat pe jaayen naaz dikhaane aa jaate hain,
kaise kaise log humare jee ko jalaane aa jaate hain.

Din bhar jo sooraj ke dar se galiyon mein chhupe rahte hain,
shaam aate hi aankhon mein woh rang puraane aa jaate hain.

Jin logon ne un ki talab mein sehraaon ki dhool udaayi,
ab ye haseen un ki qabaron par phool chadhaane aa jaate hain.

Kaun sa woh jaadoo hai jis se ghum ki andheri sard guphaa mein,
laakh nisaai saans dilon ke rog mitaane aa jaate hain.

Ze ki reshmi rumaalon ko kis kis ki nazron se chhupaayen,
kaise hain woh log jinhen ye raaz chhupaane aa jaate hain.

Hum bhi ‘munir ab duniya-daari kar ke waqt guzaarenge,
hote hote jeene ke bhi laakh bahaane aa jaate hain. !!

Munir Niazi

Jumbish-e-kaakul-e-mahboob Se Din Dhalta Hai..

Jumbish-e-kaakul-e-mahboob se din dhalta hai,
haaye! kis khoobi-e-usloob se din dhalta hai.

Phenk kulfat-zada sooraj pe bhi chheente uss ke,
jis mayy-e-dilkash-o-marghoob se din dhalta hai.

Koshish-e-banda-daana nahin kaamil hoti,
sohbat-e-banda-e-majzoob se din dhalta hai.

Mehar ke walwala-e-raast se pau phaTti hai,
mehar ke jazba-e-maqloob se din dhalta hai.

Saaqiya ek ‘adam ko bhi phureri uss ki,
jis khanakte hue mashroob se din dhalta hai. !!

Abdul Hamid Adam

Baahar Na Aao Ghar Mein Raho Tum Nashe Mein Ho..

Baahar na aao ghar mein raho tum nashe mein ho,
so jaao din ko raat karo tum nashe mein ho.

Dariya se ikhtelaaf ka anzaam soch lo,
lehron ke saath saath baho tum nashe mein ho.

Behad shareef logon se kuchh faasla rakho,
pee lo magar kabhi na keho tum nashe mein ho.

Kaaghaz ka ye libaas chiraaghon ke shehar mein,
zara sambhal sambhal ke chalo tum nashe mein ho.

Kya dosto ne tum ko pilaayi hai raat bhar,
ab dushmano ke saath raho tum nashe mein ho. !!

Bashir Badr