Home / Tag Archives: dhoop-shayari

Tag Archives: dhoop-shayari

Khoobsoorat Jheel Mein Hansta Kanwal Bhi Chahiye..

Khoobsoorat jheel mein hansta kanwal bhi chahiye,
hai galaa acchha toh phir acchhi ghazal bhi chahiye.

Uth ke iss hansti hui duniya se jaa sakta hun main,
ahl-e mehfil ko magar mera badal bhi chahiye.

Sirf phoolon se sajaawat pedd ki mumkin nahin,
meri shaakhon ko naye mausam mein phal bhi chahiye.

Aye meri khaak-e watan tera sagaa beta hun main,
kyon rahun footpaath par mujh ko mahal bhi chahiye.

Dhoop waadon ki buri lagne lagi hai ab humein,
sirf taareefen nahin urdu ka hal bhi chahiye.

Tune saari baaziyan jeeti hain mujh par baith kar,
ab main burha ho raha hun astbal bhi chahiye. !!

Awwal Awwal Ki Dosti Hai Abhi..

Romantic-Happily_cute_couple_painting_drawing_ahmad Faraz_poetry_shayari_boy with guitar_girl on boy's shoulder

Awwal awwal ki dosti hai abhi,
ek ghazal hai ki ho rahi hai abhi.

Main bhi shehar-e wafa mein nau-waarid,
woh bhi ruk ruk ke chal rahi hai abhi.

Main bhi aisa kahan ka zood-shanaas,
woh bhi lagta hai sochti hai abhi.

Dil ki wafadaari hai apni jagah,
phir bhi kuchh ehtiyaat si hai abhi.

Garche pehla sa ijtinaab nahin,
phir bhi kam kam supurdagi hai abhi.

Kaisa mausam hai kuchh nahin khulta,
boonda-baandi bhi dhoop bhi hai abhi.

Khud-kalaami mein kab ye nasha tha,
jis tarah roo-ba-ru koi hai abhi.

Qurbatein laakh khoobsurat hon,
dooriyon mein bhi dilkashi hai abhi.

Fasl-e gul mein bahaar pehla gulaab,
kisi ki zulfon mein taankti hai abhi.

Muddatein ho gayi ‘faraz magar,
woh jo deewaanagi ki thi hai abhi. !!

Pehle Toh Apne Dil Ki Raza Jaan Jaaiye..

Aaliya bhatt varun dhawan- ishq wala love- student of the year- qateel shifai poetry- poetry-shayari- romantic couple- cute couple

Pehle toh apne dil ki raza jaan jaaiye,
phir jo nigaah-e yaar kahe maan jaaiye.

Pehle mijaaz-e raah guzar jaan jaaiye,
phir gard-e raah jo bhi kahe maan jaaiye.

Kuchh keh rahi hai aapke seene ki dhadkane,
mera nahin ton dil ka kaha maan jaaiye.

Ek dhoop si jami hai nigaahon ke aas paas,
ye aap hain toh aap pe qurbaan jaaiye.

Shayad huzoor se koi nisbat humein bhi ho,
aankhon mein jhaank kar humein pehchaan jaaiye. !!

Umeed Bhi Kirdaar Pe Poori Nahin Utari..

Umeed bhi kirdaar pe poori nahin utari,
Ye shab dil-e beemaar pe poori nahin utari.

Kya khauf ka manzar tha tere shehar mein kal raat,
Sacchaai bhi akhbaar mein poori nahin utari.

Tasweer mein ek rang abhi chhut raha hai,
Shokhi abhi rukhsaar pe poori nahin utari.

Parr uske kahin, jism kahin, khud woh kahin hai
Chidiya kabhi meenar pe poori nahin utari.

Ek tere na rahne se badal jata hai sab kuchh,
Kal dhoop bhi deewar pe poori nahin utari.

Main duniya ke maiyyar pe poora nahin utara,
Duniya mere maiyyar pe poori nahin utari. !!