Home / Tag Archives: Dastak

Tag Archives: Dastak

Sannata Kya Chupke Chupke Kehta Hai..

Bashir Badr Poetry

Sannata kya chupke chupke kehta hai,
saaari duniya kis ka rain basera hai.

Aasmaan ke donon konon ke aakhir,
ek sitaara tera hai, ek mera hai.

Anda machhli chhu kar jin ko paap lage,
un ka poora haath lahoo mein dooba hai.

Aahista aahista dil par dastak do,
dheere dheere dil ka darwaaja khulta hai.

Sooraj ke ghar se uske ghar tak jaana,
kitna seedha saada dhoop ka rasta hai.

Saari raat lihaafon mein royi aankhen,
sab kehte the rishta naata jhootha hai. !!

Bashir Badr Poetry Collection

Subscribe us for latest urdu poets, ghazals, poems, nazms, shayari, shairy.

Zindagi Jab Bhi Teri Bazm Mein Laati Hai Humen..

Shahryar Poetry

Zindagi jab bhi teri bazm mein laati hai humen,
ye zameen chaand se behtar nazar aati hai humen.

Soorkh phoolon se mehak uthti hain dil ki raahen,
din dhale yun teri aawaaz bulaati hai humen.

Yaad teri kabhi dastak kabhi sargoshi se,
raat ke pichhle pehar roz jagaati hai humen.

Har mulaaqaat kaa anjaam judaai kyon hai,
ab toh har waqt yehi baat sataati hai humen. !!

Shahryar Poetry Collection

Subscribe us for shahryar ghazals, poems, shayari, nazms, shair, urdu poets. 

Chehre Pe Mere Zulf Ko Phailaao Kisi Din..

Chehre pe mere zulf ko phailaao kisi din,
kya roz garajte ho baras jaao kisi din.

Raazon ki tarah utro mere dil mein kisi shab,
dastak pe mere haath ki khul jaao kisi din.

Pedon ki tarah husn ki baarish mein naha lun,
baadal ki tarah jhoom ke ghir aao kisi din.

Khushboo ki tarah guzro mere dil ki gali se,
phoolon ki tarah mujh pe bikhar jaao kisi din.

Phir haath ko khairaat mile band-e-qaba ki,
phir lutf-e-shab-e-wasl ko dohraao kisi din.

Guzrein jo mere ghar se toh ruk jaayen sitaare,
iss tarha meri raat ko chamkaao kisi din.

Main apni har ek saans ussi raat ko de dun,
sar rakh ke mere seene pe so jaao kisi din. !!

Amjad Islam Amjad

Zara Thehar Jaao..

Khade hain khwaab hatheli pe rakh kar,
Subah ki aas mein ye jugnu lamhe.
Tumhare dastakein gumm ho rahi hain,
Na aane ke bahaane dhundate ho..
Samajhna hai samajh jaao,
Jo jana hai chale jaao,
Magar ye dil kyon ab tak keh reha hai ?
Zara thehar jaao..
Zara thehar jaao..!

Ulajhte hain sulajhte hain,
Bikhar ke khush bhi rehte hain.
Dilon ki kashmakash mein aise bhi,
Kuchh mod milte hain..
Naye lafzon se likhi jayegi ab ye kahaani.
Muhabbat naam hai jis ka..
Usey sab jhooth kehte hain.
Samajhna hai samajh jaao..
Jo jana hai chale jaao..
Magar ye dil kyon ab tak keh raha hai
Zara thehar jaao..
Zara thehar jaao …!!

Pyaas Woh Dil Ki Bujhaane Kabhi Aaya Bhi Nahi..

Pyaas woh dil ki bujhaane kabhi aaya bhi nahi,
kaisa baadal hai jiska koi saaya bhi nahi.

Berukhi iss se badi aur bhala kya hogi,
ek muddat se humein usne sataaya bhi nahi.

Roz aata hai dar-e dil pe woh dastak dene,
aaj tak humane jise paas bulaaya bhi nahi.

Sun liya kaise khuda jaane zamaane bhar ne,
woh fasana jo kabhi humne sunaya bhi nahi.

Tum toh shayar ho ‘Qateel aur woh ek aam sa shakhs,
usne chaha bhi tujhe aur jataya bhi nahi. !!

Jab Bhi Ishq Hota Hai Baghawat Ho Hi Jati Hai..

Kisi Patthar Numa Dil Pe Bhi Dastak Ho Hi Jati Hai,
Ki Hasrat Jaag Jane Par Karamaat Ho Hi Jati Hai.

Kisi Anjaan Chehre Se Kisi Pur-Lutf Lamhe Mein,
Jo Karna Na Bhi Chaho Toh Mohabbat Ho Hi Jati Hai.

Kisi Khamosh Chehre Se Musalsal Ashk Behne Par,
Chhupana Bhi Agar Chaho Wazahat Ho Hi Jati Hai.

Kisi Ke Door Jane Par Umeedein Toot Jane Se,
Wafa Mein Rogg Milne Ki Shikayat Ho Hi Jati Hai.

Ye Tum Ne Bhi Suna Hoga Zamana Aise Kehta Hai,
Ki Jab Bhi Ishq Hota Hai Baghawat Ho Hi Jati Hai.. !!