Home / Tag Archives: dariya-shayari

Tag Archives: dariya-shayari

Ishq Mein Lajaawab Hain Hum Log..

Ishq mein lajawaab hain hum log,
maahtaab, aaftaab hain hum log.

Garche ahal-e-sharaab hain hum log,
ye na samjho kharaab hain hum log.

Shaam se aa gaye jo peene par,
subah tak aaftaab hain hum log.

Hum ko daava-e-ishqbaazi hai,
mustahiqq-e-azaab hain hum log.

Naaz karti hai khana-veerani,
aise khana-kharaab hain hum log.

Hum nahin jaante khizaan kya hai,
kushtagaan-e-shabaab hain hum log.

Tu humara jawaab hai tanha,
aur tera jawaab hain hum log.

Tu hai dariya-e-husn-o-mahboobi,
shakl-e-mauj-o-hubaab hain hum log.

Go saraapa hujaab hain phir bhi,
tere rukh ki naqaab hain hum log.

Khoob hum jaante hain apni qadr,
kitne na-kaamyaab hain hum log.

Hum se ghaflat na ho toh phir kya ho,
rah-rav-e-mulk-e-khwaab hain hum log.

Hum pe naazil hua saheefa-e-ishq,
saahibaan-e-kitaab hain hum log.

Har haqeeqat se jo guzar jaayen,
woh sadaaqat-ma.aab hain hum log.

Jab mili aankh hosh kho baithe,
kitne haazir-jawaab hain hum log.

Hum se puchho ‘jigar ki sarmasti,
mahram-e-aan-janaab hain hum log. !!

Jigar Moradabadi

Aye Saaqi-e-Mehwish Ghum-e-Dauraan Nahin Uthta..

Aye saaqi-e-mehwish ghum-e-dauraan nahin uthta,
darwesh ke hujre se ye mehmaan nahin uthta.

Kehte the ki hai baar-e-do-aalam bhi koi cheez,
dekha hai toh ab baar-e-garebaan nahin uthta.

Kya mere safeene hi ki dariya ko khatak thi,
kya baat hai ab kyon koi toofaan nahin uthta.

Kis naqsh-e-qadam par hai jhuka roz-e-azal se,
kis weham mein sajde se bayabaan nahin uthta.

Be-himmat-e-mardaana nasaafat nahin kaTti,
be-azm-e-musammam qadam aasaan nahin uthta.

Yun uthti hain angdaai ko woh marmarin baanhen,
jaise ki ‘adam takht-e-sulaimaan nahin uthta. !!

Abdul Hamid Adam

Baahar Na Aao Ghar Mein Raho Tum Nashe Mein Ho..

Baahar na aao ghar mein raho tum nashe mein ho,
so jaao din ko raat karo tum nashe mein ho.

Dariya se ikhtelaaf ka anzaam soch lo,
lehron ke saath saath baho tum nashe mein ho.

Behad shareef logon se kuchh faasla rakho,
pee lo magar kabhi na keho tum nashe mein ho.

Kaaghaz ka ye libaas chiraaghon ke shehar mein,
zara sambhal sambhal ke chalo tum nashe mein ho.

Kya dosto ne tum ko pilaayi hai raat bhar,
ab dushmano ke saath raho tum nashe mein ho. !!

Bashir Badr

Parakhna Mat Parakhne Mein Koi Apna Nahin Rehta..

Sad_serious_girl_women_at_beach_shayari_poetry

Parakhna mat parakhne mein koi apna nahin rehta,
kisi bhi aaine mein der tak chehra nahin rehta.

Bade logon se milne mein humesha faasla rakhna,
jahan dariya samandar se mile dariya nahin rehta.

Hazaaron sher mere so gaye kaaghaz ki qabron mein,
ajab maa hun koi baccha mera zinda nahin rehta.

Tumhara shehar toh bilkul naye andaaz wala hai,
humare shehar mein bhi koi hum sa nahin rehta.

Mohabbat ek khushboo hai humesha saath chalti hai,
koi insaan tanhaai mein bhi tanha nahin rehta.

Koi baadal hare mausam ka phir elaan karta hai,
khizan ke baagh mein jab ek bhi patta nahin rehta. !!

Bashir Badr

Sar Jhukaaoge Toh Patthar Devta Ho Jaayega..

love-sad-yaad-girl-boy-on-sea-shayari-poetry

Sar jhukaaoge toh patthar devta ho jaayega,
itna mat chaaho usey woh bewafa ho jaayega.

Hum bhi dariya hain humen apna hunar maloom hai,
jis taraf bhi chal padenge raasta ho jaayega.

Kitni sacchaai se mujh se zindagi ne keh diya,
tu nahin mera toh koi doosra ho jaayega.

Main khuda ka naam le kar pee raha hun dosto,
zehar bhi iss mein agar hoga dawa ho jaayega.

Sab ussi ke hain hawa, khushboo, zameen-o aasman
main jahan bhi jaaunga uss ko pata ho jaayega. !!

Bashir Badr

Tujh Ko Socha Toh Pata Ho Gaya Ruswaai Ko..

Tujh ko socha toh pata ho gaya ruswaai ko,
maine mehfooz samajh rakha tha tanhaai ko.

Jism ki chaah lakeeron se ada karta hai,
khaaq samjhega musawwir teri angdaai ko.

Apni dariyaai pe itra na bahut aye dariya,
ek qatra hi bahut hai teri ruswaai ko.

Chaahe jitna bhi bigad jaaye zamaane ka chalan,
jhooth se haarte dekha nahin sacchaai ko.

Saath maujon ke sabhi ho jahan behne waale,
kaun samjhega samandar teri gehraai ko. !!

Wasim Barelvi

Main Aasmaan Pe Bahut Der Reh Nahin Sakta..

Main aasmaan pe bahut der reh nahin sakta,
magar ye baat zameen se toh keh nahin sakta.

Kisi ke chehre ko kab tak nigaah mein rakhun,
safar mein ek hi manzar toh reh nahin sakta.

Ye aazmaane ki fursat tujhe kabhi mil jaaye,
main aankhon aankhon mein kya baat keh nahin sakta.

Sahaara lena hi padta hai mujh ko dariya ka,
main ek qatra hun, tanha toh beh nahin sakta.

Laga ke dekh lo jo bhi hisaab aata ho,
mujhe ghata ke woh ginti mein reh nahin sakta.

Ye chand lamhon ki be-ikhtiyariyaan hain ‘waseem
gunaah se rishta bahut der reh nahin sakta. !!

Wasim Barelvi