Home / Tag Archives: daaman

Tag Archives: daaman

Aise Hijr Ke Mausam Kab Kab Aate Hain..

Shahryar Poetry

Aise hijr ke mausam kab kab aate hain,
tere alaawa yaad humein sab aate hain.

Jaagti aankhon se bhi dekho duniya ko,
khwaabon ka kya hai woh har shab aate hain.

Jazb kare kyon ret humari ashkon ko,
tera daaman tar karne ab aate hain.

Ab woh safar ki taab nahin baaqi warna,
hum ko bulaawe dasht se jab tab aate hain.

Kaaghaz ki kashti mein dariya paar kiya,
dekho hum ko kya kya kartab aate hain. !!

Shahryar Poetry Collection

Subscribe us for all types Urdu Poetry. Urdu Legend Poets Poetry, Sad, Life, Love, Shayari, Poems

Aabroo Kya Khaak Uss Gali Mein Nahin..

Mirza Ghalib Poetry

Aabroo kya khaak uss gali mein nahin,
hai garebaan nang-e-pairaahan jo daaman mein nahin.

Zof se aey girya kuchh baaqi mere tan mein nahin,
rang ho kar udd gaya jo khoon ki daaman mein nahin.

Ho gaye hain jamaa ajzaa-e-nigaah-e-aaftaab,
zarre uss ke ghar ki deewaaron ke rauzan mein nahin.

Kya kahun taariki-e-zindaan-e-ghum andher hai,
pamba noor-e-subh se kam jis ke rauzan mein nahin.

Raunaq-e-hasti hai ishq-e-khana veeraan saaz se,
anjuman be-shamaa hai gar barq khirman mein nahin.

Zakhm silwaane se mujh par chaara-jui ka hai taan,
ghair samjha hai ki lazzat zakhm-e-sozan mein nahin.

Bas-ki hain hum ek bahaar-e-naaz ke maare hue,
jalwa-e-gul ke siwa gard apne madfan mein nahin.

Qatra qatra ek hayoola hai naye naasoor ka,
khoon bhi zauq-e-dard se faarigh mere tan mein nahin.

Le gayi saaqi ki nakhwat qulzum-aashaami meri,
mauj-e-mayy ki aaj rag meena ki gardan mein nahin.

Ho fishaar-e-zof mein kya naa-tawaani ki numood,
qad ke jhukne ki bhi gunjaaish mere tan mein nahin.

Thi watan mein shaan kya ‘ghalib’ ki ho ghurbat mein qadr,
be-takalluf hun woh musht-e-khas ki gulkhan mein nahin. !!

– Click here for Mirza Ghalib Poetry collection

Jeevan Mujh Se Main Jeevan Se Sharmaata Hun..

Habib Jalib Poetry

Jeevan mujh se main jeevan se sharmaata hun,
mujh se aage jaane waalo main aata hun.

Jin ki yaadon se roshan hain meri aankhen,
dil kehta hai un ko bhi main yaad aata hun.

Sur se saanson ka naata hai todun kaise,
tum jalte ho kyon jeeta hun kyon gaata hun.

Tum apne daaman mein sitaare baith kar taanko,
aur main naye biran lafzon ko pehnaata hun.

Jin khwaabon ko dekh ke maine jeena seekha,
un ke aage har daulat ko thukraata hun.

Zehar ugalte hain jab mi kar duniya waale,
meethe bolon ki waadi mein kho jaata hun.

Jalib’ mere sher samajh mein aa jaate hain,
issi liye kam rutba shayar kehlaata hun. !!

– Click Here For Habib Jalib Poetry, Poems  Collection

Ek Aazaar Hui Jaati Hai Shohrat Hum Ko..

Ek aazaar hui jaati hai shohrat hum ko,
khud se milne ki bhi milti nahin fursat hum ko.

Roshni ka ye musaafir hai raah-e-jaan ka nahin,
apne saaye se bhi hone lagi wehshat hum ko.

Aankh ab kis se tahayyur ka tamasha maange,
apne hone pe bhi hoti nahin hairat hum ko.

Ab ke ummeed ke shole se bhi aankhen na jali,
jaane kis mod pe le aayi mohabbat hum ko.

Kaun si rut hai zamaane humen kya maloom,
apne daaman mein liye phirti hai hasrat hum ko.

Zakhm ye wasl ke marham se bhi shayad na bhare,
hijr mein aisi mili ab ke masaafat hum ko.

Daagh-e-isyaan toh kisi taur na chhupte ‘amjad
dhaanp leti na agar chaadar-e-rahmat hum ko. !!

Amjad Islam Amjad

Apne Haathon Ki Lakeeron Mein Basa Le Mujh Ko..

Couple at sunset- lovers- black&white couple pic- art pic- qateel shifai poetry, shayari- poetry-shayari pic

Apne haathon ki lakeeron mein basa le mujh ko,
main hun tera naseeb apna bana le mujh ko.

Mujh se tu poochhne aaya hai wafa ke maayne,
teri saada-dili maar na daale mujh ko.

Main samandar bhi hun moti bhi hun gota-jann bhi,
koi bhi naam mera le k bula le mujh ko.

Tune dekha nahin aainey se aage kuchh bhi,
khudaparasti mein kahin tu na ganwa le mujh ko.

Kal ki baat aur hai main ab sa rahun ya na rahun,
jitna jee chahe tera aaj sata le mujh ko.

Khud ko main baant na daalun kahin daaman-daaman,
kar diya tune agar mere hawaale mujh ko.

Main jo kaanta hun toh chal mujh se bacha kar daaman,
main hun gar phool toh jure mein saja le mujh ko.

Main khule darr ke kisi ghar ka hun samaan pyaare,
tu dabe paaon kabhi aa ke chura le mujh ko.

Tark-e ulfat ki kasam bhi koi hoti hai kasam,
tu kabhi yaad toh kar bhulaane wale mujh ko.

Baadah phir baadah hai main zehar bhi pee jaaun ‘qateel
shart ye hai koi baahon mein sambhale mujh ko. !!

Qateel Shifai

Bechain Bahaaron Mein Kya Kya Hai, Jaan Ki Khushbu Aati Hai..

Bechain bahaaron mein kya kya hai.. jaan ki khushbu aati hai,
jo phool mehakta hai uss se toofaan ki khushbu aati hai.

Kal raat dikha ke khwaab-e tarab jo sejj ko soona chhod gaya,
har silwatt se phir aaj ussi mehmaan ki khushbu aati hai.

Talqeen-e ibaadat ki hai mujhe yun teri muqaddas aankhon ne,
mandir ke dareechon se jaise lobaan ki khushbu aati hai.

Kuchh aur bhi saansein lene par majboor sa main ho jata hun,
jab itne bade jungle mein kisi insaan ki khushbu aati hai.

Kuchh tu hi mujhe ab samjha de aye qufr duhaai hai teri,
kyon sheikh ke daaman se mujh ko imaan ki khushbu aati hai.

Darta hun kahin iss aalam mein jeene se na munkir ho jaaun,
ahbaab ki baaton se mujhko ehsaan ki khushbu aati hai. !!

Kisne Sang-e Khaamoshi Pheinka Bhare Bazaar Par..

Kis ne sang-e khaamoshi pheinka bhare bazaar par,
Ek sukoot-e-marg* taari hai darr-o deewaar par.

Tune apne zulf ke saaye mein afsaane kahe,
Mujh ko zanjeeren mili hain jurrat-izhaar par.

Shaakh-e uriyaan par khila ek phool iss andaaz se,
Jis tarah taaza lahoo chamke nayi talwaar par.

Sangdil ahbaab ke daaman mein ruswaai ke phool,
Maine dekha hai naya manzar faraaz-e-daar* par.

Ab koi tohmat bhi wajah-e karb-e ruswaai nahi,
Zindagi ek umar se chup hai tere israar par.

Main sar-e maqtal hadees zindagi kehta raha,
Ungliyan uthti rahi ‘mohsin mere kirdaar par. !!

*[ Sukoot-e-marg=silence of death,
Faraaz-e-daar=elevated ]

Mohsin Naqvi