Home / Tag Archives: charaagh-shayari

Tag Archives: charaagh-shayari

Khul Ke Milne Ka Saleeqa Aap Ko Aata Nahin..

Khul ke milne ka saleeqa aap ko aata nahin,
aur mere paas koi chor darwaaza nahin.

Woh samajhta tha usey paa kar hi main reh jaaunga,
uss ko meri pyaas ki shiddat ka andaaza nahin.

Ja! dikha duniya ko.. mujh ko kya dikhata hai ghuroor,
tu samandar hai toh ho, main toh magar pyasaa nahin.

Koi bhi dastak kare.. aahat ho ya aawaaz de,
mere haathon mein mera ghar toh hai, darwaaza nahin.

Apno ko apna keha.. chaahe kisi darje ke hon,
aur ab aisa kiya maine, toh sharmaya nahin.

Uski mehfil mein unhi ki roshani, jinke charaagh
main bhi kuchh hota toh mera bhi diya hota nahin.

Tujh se kya bichhda meri saari haqeeqat khul gayi,
ab koi mausam mile toh mujh se sharmaata nahin. !!

Wasim Barelvi

Lahoo Na Ho Toh Qalam Tarjumaan Nahin Hota..

Lahoo na ho toh qalam tarjumaan nahin hota,
humare daur mein aansoo zubaan nahin hota.

Jahan rahega wahin roshani lutaayega,
kisi charaagh ka apna makaan nahin hota.

Ye kis maqaam pe laayi hai meri tanhaayi,
ki mujh se aaj koi badgumaan nahin hota.

Main uss ko bhool gaya hun ye kaun maanega,
kisi charaagh ke bas mein dhuaan nahin hota.

‘Waseem sadiyon ki aankhon se dekhiye mujh ko,
woh lafz hun jo kabhi daastaan nahin hota. !!

Wasim Barelvi

Udaan Waalo Udaano Pe Waqt Bhaari Hai..

Udaan waalo udaano pe waqt bhaari hai,
paron ki ab ke nahin hauslon ki baari hai.

Main qatra ho ke toofaano se jang ladta hun,
mujhe bachaanaa samandar ki jimmedaari hai.

Koi bataaye ye uske ghuroor-e beja ko,
woh jang hum ne ladi hi nahin jo haari hai.

Dua karo ki salaamat rahe meri himmat,
ye ek charaagh kayi aandhiyon pe bhaari hai. !!

Wasim Barelvi

Kya Dukh Hai Samundar Ko Bata Bhi Nahin Sakta..

Kya dukh hai samundar ko bata bhi nahin sakta,
aansoo ki tarah aankh tak aa bhi nahin sakta.

Tu chhod raha hai toh khata iss mein teri kya,
har shakhs mera saath nibha bhi nahin sakta.

Pyaase rahe jaate hain zamaane ke sawaalaat,
kis ke liye zinda hun bata bhi nahin sakta.

Ghar dhoond rahe hain mera raaton ke poojaari,
main hun ki charaaghon ko bujha bhi nahin sakta.

Waise toh ek aansoo hi baha kar mujhe le jaaye,
aise koi toofaan hila bhi nahin sakta. !!

Wasim Barelvi

Agarche Zor Hawaon Ne Daal Rakha Hai..

Agarche zor hawaon ne daal rakha hai,
magar charaagh ne lau ko sambhaal rakha hai.

Mohabbaton mein toh milna hai ya ujad jana,
mizaaj-e ishq mein kab etidaal rakha hai.

Hawa mein nasha hi nasha fazaa mein rang hi rang,
ye kis ne pairhan apna uchhaal rakha hai.

Bhale dino ka bharosa hi kya rahen na rahen,
so maine rishta-e ghum ko bahaal rakha hai.

Hum aise sada-dilon ko woh dost ho ki khuda,
sabhi ne wada-e fardaa pe taal rakha hai.

Hisaab lutf-e hareefan kiya hai jab toh khula,
ki doston ne zyada khyaal rakha hai.

Bhari bahaar mein ek shaakh par khila hai gulaab,
ki jaise tune hatheli pe gaal rakha hai.

Faraz’ ishq ki duniya toh khoobsurat thi,
ye kisne fitna-e-hijr-o-visaal rakha hai. !!