Home / Tag Archives: chaman-shayari

Tag Archives: chaman-shayari

Shab-e-Wisal Mein Doori Ka Khwab Kyon Aaya..

Shab-e-wisal mein doori ka khwab kyon aaya,
kamaal-e-fatah mein ye dar ka baab kyon aaya.

Dilon mein ab ke baras itne wehm kyon jaage,
bilaad-e-sabr mein ab iztiraab kyon aaya.

Hai aag gul pe ajab iss bahaar-e guzraan mein,
chaman mein ab ke gul-e-behisaab kyon aaya.

Agar wahi tha toh rukh pe woh berukhi kya thi,
zara se hijr mein ye inqilaab kyon aaya.

Bas ek hoga tamasha tamaam samton par,
meri sada ke safar mein saraab kyon aaya.

Main khush nahin hun bahut door uss se hone par,
jo main nahin tha toh uss par shabaab kyon aaya.

Udaa hai shola-e-barq abr ki faseelon par,
ye iss balaa ke muqaabil sahaab kyon aaya.

Yaqeen kis liye uss par se uth gaya ha ‘munir
tumhare sar pe ye shak ka azaab kyon aaya. !!

Munir Niazi

Rida Uss Chaman Ki Udaa Le Gayi..

Rida uss chaman ki udaa le gayi,
darakhton ke patte hawa le gayi.

Jo harf apne dil ke thikaanon mein the,
bahut door un ko sadaa le gayi.

Chala main saoobat se pur raah par,
jahan tak mujhe inteha le gayi.

Gayi jis ghadi shaam-e-sahar-e-wafa,
manaazir se ek rang sa le gayi.

Nishaan ek purana kinaare pe tha,
usey mauj-e-dariya bahaa le gayi.

Munir’ itna husn zamaane mein tha,
kahan uss ko koi balaa le gayi. !!

Munir Niazi

Khatm Kiya Saba Ne Raqs Gul Pe Nisaar Ho Chuki..

Khatm kiya saba ne raqs gul pe nisaar ho chuki,
josh-e-nashaat ho chuka saut-e-hazaar ho chuki.

Rang-e banafsha mit gaya sumbul-e-tar nahin raha,
sehan-e-chaman mein zeenat-e-naqs-o-nigaar ho chuki.

Masti-e-laala ab kahan uss ka pyala ab kahan,
daur-e-tarab guzar gaya aamad-e-yaar ho chuki.

Rutt woh jo thi badal gayi, aayi bas aur nikal gayi
thi jo hawaa mein nik.hat-e-mushk-e-tataar ho chuki.

Ab tak ussi rawish pe hai ‘akbar mast-o-bekhabar,
keh de koi azeez-e-mann fasl-e-bahaar ho chuki. !!

Akbar Allahabadi

Dost Ban Kar Bhi Nahin Saath Nibhaane Wala..

Dost ban kar bhi nahin saath nibhaane wala,
wahi andaaz hai zaalim ka zamane wala.

Ab usey log samajhte hain giraftaar mera,
sakht naadim hai mujhe daam mein laane wala.

Subah-dam chhod gaya nikhat-e gul ki soorat,
raat ko ghuncha-e dil mein simat aane wala.

Kya kahein kitne maraasim the humare uss se,
woh jo ek shakhs hai munh pher ke jaane wala.

Tere hote hue aa jaati thi sari duniya,
aaj tanha hun toh koi nahin aane wala.

Muntazir kis ka hun tooti hui dehleej pe main,
kaun aayega yahan, kaun hai aane wala.

Kya khabar thi jo meri jaan mein ghulaa hai itna,
hai wahi mujh ko sar-e daar bhi laane wala.

Maine dekha hai bahaaron mein chaman ko jalte,
hai koi khwaab ki tabeer batane wala?

Tum takalluf ko bhi ikhlaas samjhte ho ‘faraz
dost hota nahin har haath milaane wala. !!

Rukhsati Hote Hi Maa Baap Ko Bhool Gayi..

sonia gandhi painting by johnson Moya- sonia gandhi artpic- munawwar rana poetry about sonia gandhi

Rukhsati hote hi maa-baap ko bhool gayi,
Bhai ke chehron ko behano ki nazar bhool gayi.

Ghar ko jaati hui raahguzar bhool gayi,
Main woh chidiya hun ki jo apna shajar bhool gayi.

Main toh Bharat mein mohabbat ke liye aayi thi,
Kaun kehta hai huqoomat ke liye aayi thi.

Nafraton ne mere chehre ka ujala chheena,
Jo mere paas tha woh chaahne wala chheena.

Sar se bacchon ke mere baap ka saaya chheena,
Mujh se girija bhi liya, mujh se shiwala chheena.

Ab ye taqdeer toh badali bhi nahin ja sakti,
Main woh bewa hun jo italy bhi nahin jaa sakti.

Aag nafrat ki bhala mujh ko jalaane se rahi,
Chhod kar sabko museebat mein toh jaane se rahi.

Ye siyaasat mujhe iss ghar se toh bhagaane se rahi,
Uth ke iss mitti se ye mitti toh jaane se rahi.

Sab mere baagh ke bulbul ki tarah lagte hain,
Saare bacche mujhe Rahul ki tarah lagte hain.

Apne ghar mein ye bahut der kahan rahti hai,
Ghar wahi hota hai aurat jahan rahti hai.

Kab kisi ghar mein siyaasat ki dukaan rahti hai,
Mere darwaaze pe likh do yahan maa rahti hai.

Heere moti ke makaanon mein nahin jaati hai,
Maa kabhi chhod kar bacchon ko kahan jaati hai.?

Har dukhi dil se mohobbat hai bahu ka jimma,
Har bade-boorhe se mohabbat hai bahu ka jimma,
Apne mandir mein ibaadat hai bahu ka jimma.

Main jis desh aayi thi wahi yaad raha,
Ho ke bewaa bhi mujhe apna pati yaad raha.

Mere chehre ki sharaafat mein yahan ki mitti,
Mere aankhon ki lajaazat mein yahan ki mitti,
Tooti-phooti si ek aurat mein yahan ki mitti..

Kokh mein rakh ke ye mitti isey dhanwaan kiya,
Maine Priyanka aur Rahul ko bhi insaan kiya.

Sikh hain, Hindu hain Musalmaan Hain, Isaai bhi hain
Ye padosi bhi humare hain, yahi bhaai bhi hain.

Yahi pachhua ki hawa bhi hain, yahi purwaai bhi hain
Yahan ka paani bhi hai, paani par jami kaai bhi hai.

Bhaai-behno se kisi ko kabhi dar lagta hai,
Sach bataao kabhi apno se bhi dar lagta hai.?

Har ek behan mujhe apni behan samajhti hai,
Har ek phool ko titali chaman samajhti hai,
Humare dukh ko ye khaaq-e watan samajhti hai.

Main aabru hun tumhari.. tum aitbaar karo,
Mujhe bahu nahin beti samajh ke pyaar karo. !!

Munawwar Rana