Home / Tag Archives: chahat

Tag Archives: chahat

Har Janam Mein Usi Ki Chahat The..

Bashir Badr Poetry

Har janam mein usi ki chaahat the,
hum kisi aur ki amaanat the.

Uss ki aankhon mein jhilmilaati hui,
hum ghazal ki koi alaamat the.

Teri chaadar mein tan samet liya,
hum kahan ke daraaz qaamat the.

Jaise jungle mein aag lag jaaye,
hum kabhi itne khoobsurat the.

Paas reh kar bhi door door rahe,
hum naye daur ki mohabbat the.

Is khushi mein mujhe khyaal aaya,
ghum ke din kitne khoobsurat the.

Din mein in jugnuon se kya lena,
ye diye raat ki zaroorat the. !!

Bashir Badr Poetry Collection

Subscribe us for bashir badr poems, urdu poetry, shayari, nazms, poetry, shair, ghazals, shairy.

Agar Hum Kahen Aur Woh Muskura Dein..

Sudarshan Faaqir Poetry

Agar hum kahen aur woh muskura den,
hum un ke liye zindgaani luta den.

Har ek mod par hum ghumon ko sazaa den,
chalo zindagi ko mohabbat bana den.

Agar khud ko bhoole toh kuchh bhi na bhoole,
ki chaahat mein un ki khuda ko bhula den.

Kabhi ghum ki aandhi jinhen chhoo na paaye,
wafaaon ke hum woh nasheman bana den.

Qayaamat ke deewaane kehte hain hum se,
chalo un ke chehre se parda hata den.

Saza den, silaa den, bana den, mitaa den
magar woh koi faislaa toh sunaa den. !!

Sudarshan Faakir Poetry Collection

Subscribe us for Urdu Poetry. Legend Urdu Poets Poetry.

Pyaas Woh Dil Ki Bujhaane Kabhi Aaya Bhi Nahi..

Pyaas woh dil ki bujhaane kabhi aaya bhi nahi,
kaisa baadal hai jiska koi saaya bhi nahi.

Berukhi iss se badi aur bhala kya hogi,
ek muddat se humein usne sataaya bhi nahi.

Roz aata hai dar-e dil pe woh dastak dene,
aaj tak humane jise paas bulaaya bhi nahi.

Sun liya kaise khuda jaane zamaane bhar ne,
woh fasana jo kabhi humne sunaya bhi nahi.

Tum toh shayar ho ‘Qateel aur woh ek aam sa shakhs,
usne chaha bhi tujhe aur jataya bhi nahi. !!

Jis Ko Bhi Chaha Usey Shiddat Se Chaha Hai Faraz..

Jis ko bhi chaha usey shiddat se chaha hai faraz,

Silsila toota nahi hai dard ki zanjeer ka. !

Jab Bhi Hansne Ke Zamaane Aaye..

Jab bhi hansne ke zamaane aaye,
Zakham phir yaad puraane aaye.

Baarha unko manaaya toh humein,
Rooth jaane ke bahaane aaye.

Phir mujhe toot ke chaha uss ne,
Phir bichhadne ke zamaane aaye.

Muskura kar humein milnae waale,
Zindagi bhar ko rulaane aaye.

Kitni mehroom thi neendein unki,
Khwaab bhi jin ko jagaane aaye.

Teri chahat ne thehrne na diya,
Raah mein kitne thikaane aaye.

Tu nahi hai toh hawa ka jhaunka,
Ghar ki zanjeer hilaane aaye.

Dil bujha hai na jale hain khemey,
Aap kyon jashn manaane aaye.?

Raas aaya jinhe sehra ‘Mohsin
Unki qismat mein khazaane aaye. !!