Home / Tag Archives: Basti-shayari

Tag Archives: Basti-shayari

Kya Jaane Kis Ki Pyaas Bujhaane Kidhar Gayi..

Kya jaane kis ki pyaas bujhaane kidhar gayi,
iss sar pe jhoom ke jo ghataayen guzar gayi.

Deewana poochhta hai ye lehron se baar baar,
kuchh bastiyan yahan thi bataao kidhar gayi.

Ab jis taraf se chaahe guzar jaaye kaarwan,
veeraniyan toh sab mere dil mein utar gayi.

Paimaana tootne ka koi ghum nahin mujhe,
ghum hai toh ye ki chaandni raaten bikhar gayi.

Paaya bhi un ko kho bhi diya chup bhi ho rahe,
ek mukhtasar si raat mein sadiyan guzar gayi. !!

Kaifi Azmi

Mere Ashkon Ne Kayi Aankhon Mein Jal Thal Kar Diya..

Mere ashkon ne kayi aankhon mein jal thal kar diya,
ek paagal ne bahut logon ko paagal kar diya.

Apni palkon par sajaa kar mere aansoo aap ne,
raaste ki dhool ko aankhon ka kaajal kar diya.

Maine dil de kar usey ki thi wafa ki ibtida,
uss ne dhokha de ke ye qissa mukammal kar diya.

Ye hawaayen kab nigaahen pher lein kis ko khabar,
shohraton ka takht jab toota toh paidal kar diya.

Devtaaon aur khudaaon ki lagaayi aag ne,
dekhte hi dekhte basti ko jungle kar diya.

Zakhm ki soorat nazar aate hain chehron ke nuqoosh,
hum ne aainon ko tehzeebon ka maqtal kar diya.

Shehar mein charcha hai aakhir aisi ladki kaun hai,
jis ne achchhe-khaase ek shaayar ko paagal kar diya. !!

Rahat Indori

Ye Sard Raaten Bhi Ban Kar Abhi Dhuaan Udd Jaayen..

Ye sard raaten bhi ban kar abhi dhuaan udd jaayen,
woh ek lihaaf main odhun toh sardiyaan udd jaayen.

Khuda ka shukr ki mera makaan salaamat hai,
hain itni tez hawaayen ki bastiyaan udd jaayen.

Zameen se ek taalluq ne baandh rakha hai,
badan mein khoon nahin ho toh haddiyaan udd jaayen.

Bikhar bikhar si gayi hai kitaab saanso ki,
ye kaaghzaat khuda jaane kab kahan udd jaayen.

Rahe khyal ke majzoob-e-ishq hain hum log,
agar zameen se phoonken toh aasmaan udd jaayen.

Hawaayen baaz kahan aati hain sharaarat se,
saron pe haath na rakhen toh pagdiyaan udd jaayen.

Bahut ghuroor hai dariya ko apne hone par,
jo meri pyaas se uljhe toh dhajjiyan udd jaayen. !!

Rahat Indori

Din Dhala Raat Phir Aa Gayi So Raho So Raho..

Din dhala raat phir aa gayi so raho so raho,
manzilon chhaa gayi khamoshi so raho so raho.

Sara din tapte sooraj ki garmi mein jalte rahe,
thandi thandi hawa phir chali so raho so raho.

Garam sunsaan qarion ki dharti mehakne lagi,
khaak rashk-e-iram ban gayi so raho so raho.

Razm-gaah-e-jahaan ban gayi jaa-e-aman-o-amaan,
hai yehi waqt ki raagni so raho so raho.

Kaise sunsaan hain aasmaan chup khade hain makaan,
hai fazaa ajnabi ajnabi so raho so raho.

Thak gaye naaqa-o-sasrbsan tham gaye kaarwan,
ghantiyon ki sadaa so gayi so raho so raho.

Chaandni aur dhuen ke siwa door tak kuchh nahin,
so gayi shehar ki har gali so raho so raho.

Gardish-e-waqt ki loriyaan raat ki raat hain,
phir kahan ye hawa ye nami so raho so raho.

Saari basti ke log iss madhur layy mein kho gaye,
door bajne lagi baansuri so raho so raho.

Door shaakhon ke jhurmat mein jugnu bhi gum ho gaye,
chaand mein so gayi chaandni so raho so raho.

Ghar ke deewar-o-dar raah tak tak ke shal ho gaye,
ab na aayega shayad koi so raho so raho.

Sust raftaar taare bhi aankhen jhapakne lage,
ghum ke maaro ghadi do ghadi so raho so raho.

Munh andhere hi ‘nasir kise dhoondne chal diye,
door hai abhi subha-e-roshan so raho so raho. !!

Nasir Kazmi

Thi Jis Ki Justajoo Woh Haqeeqat Nahin Mili..

Thi jis ki justajoo woh haqeeqat nahin mili,
inn bastiyon mein hum ko rafaaqat nahin mili.

Ab tak hain iss gumaan mein ki hum bhi hain dahar mein,
iss weham se nijaat ki soorat nahin mili.

Rehna tha uss ke saath bahut der tak magar,
inn roz-o-shab mein mujh ko ye fursat nahin mili.

Kehna tha jis ko uss se kisi waqt mein mujhe,
iss baat ke kalaam ki mohlat nahin mili.

Kuchh din ke baad uss se juda ho gaye ‘munir
uss bewafa se apni tabeeyat nahin mili. !!

Munir Niazi

Sun Bastiyon Ka Haal Jo Had Se Guzar Gayi..

Sun bastiyon ka haal jo had se guzar gayi,
un ummaton ka zikar jo raaston mein mar gayi.

Kar yaad un dinon ko ki aabaad thi yahan,
galiyan jo khaak-o khoon ki dahshat se bhar gayi.

Sarsar ki zadd mein aaye hue baam-o-dar ko dekh,
kaisi hawaayen kaisa nagar sard kar gayi.

Kya baab the yahan jo sadaa se nahin khule,
kaisi duaayen thi jo yahan beasar gayi.

Tanha ujaad burjon mein phirta hai toh ‘munir
woh zar-fishaaniyan tere rukh ki kidhar gayi. !!

Munir Niazi

Naam Behad The Magar Un Ka Nishaan Koi Na Tha..

Naam behad the magar un ka nishaan koi na tha,
bastiyan hi bastiyan thi paasbaan koi na tha.

Khurram-o-shaadaab chehre saabit-o-sayyar dil,
ek zameen aisi thi jis ka aasmaan koi na tha.

Kya balaa ki shaam thi subahon shabon ke darmiyan,
aur main un manzilon par tha jahan koi na tha.

Kookti thi baansuri chaaron dishaaon mein ‘munir
par nagar mein uss sadaa ka raazdaan koi na tha. !!

Munir Niazi