Home / Tag Archives: Bahaar

Tag Archives: Bahaar

Sahil Par Ruk Gaye The Zara Der Ke Liye..

Bashir Badr Poetry

Saahil par ruk gaye the zara der ke liye,
aankhon se dil mein kitne samandar utar gaye.

Jin par likhi hui thi mohabbat ki daastaan,
woh chaak chaak purje hawa mein bikhar gaye.

Paaya jo muskaraate hue keh uthi bahaar,
jo zakhm pichhle saal lagaaye gaye the bhar gaye. ?

Mere labon par chaand ke tukde laraj gaye,
aankhon par jaise raat ke gesu bikhr gaye.

Talvon par jab narm dhoop ne gudgudi si kari,
palkon par soye chandani ke khwab dar gaye. !!

Bashir Badr Poetry Collection

Subscribe us for bashir badr shayari, urdu poetry, shayari, ghazals, nazms, poems, poetry, shair.

Ab Wahi Harf e Junoon Sab Ki Zubaan Thehri Hai..

Faiz Ahmed Faiz Poetry

Ab wahi harf-e-junoon sab ki zabaan thehri hai,
jo bhi chal nikli hai woh baat kahan thehri hai.

Aaj tak shaikh ke ikraam mein jo shayy thi haraam,
ab wahi dushman-e-deen raahat-e-jaan thehri hai.

Hai khabar garm ki phirta hai gurezaan naaseh,
guftugu aaj sar-e-ku-e-butaan thehri hai.

Hai wahi aariz-e-laila wahi sheerin ka dahan,
nigah-e-shauq ghadi bhar ko jahaan thehri hai.

Wasl ki shab thi to kis darja subuk guzri thi,
hijr ki shab hai toh kya sakht giraan thehri hai.

Bikhri ek baar toh haath aayi hai kab mauj-e-shamim,
dil se nikli hai toh kab lab pe fughaan thehri hai.

Dast-e-sayyaad bhi aajiz hai kaf-e-gul-chin bhi,
bu-e-gul thehri na bulbul ki zabaan thehri hai.

Aate aate yunhi dum bhar ko ruki hogi bahaar,
jaate jaate yunhi pal bhar ko khizaan thehri hai.

Hum ne jo tarz-e-fughaan ki hai qafas mein ijaad,
faiz’ gulshan mein wahi tarz-e-bayaan thehri hai. !!

 – Faiz Ahmed Faiz

Dhota Hun Jab Main Peene Ko Uss Simtan Ke Paaon..

Mirza Ghalib Poetry

Dhota hun jab main peene ko uss simtan ke paaon,
rakhta hai zid se kheench kar baahar lagan ke paaon.

Di saadagi se jaan padun kohkan ke paaon,
haihaat kyon na toot gaye pirzan ke paaon.

Bhaage the hum bahut so ussi ki sazaa hai ye,
ho kar aseer daabte hain raahzan ke paaon.

Marham ki justaju mein phira hun jo door door,
tan se siwa figaar hain is khasta-tan ke paaon.

Allah re zauq-e-dasht-nawardi ki baad-e-marg,
hilte hain khud-ba-khud mere andar kafan ke paaon.

Hai josh-e-gul bahaar mein yaan tak ki har taraf,
udte hue ulajhte hain murgh-e-chaman ke paaon.

Shab ko kisi ke khwaab mein aaya na ho kahin,
dukhte hain aaj uss but-e-naazuk badan ke paaon.

Ghalib’ mere kalaam mein kyonkar maza na ho,
peeta hun khusro-e-shirin-sukhan ke paaon. !!

Click here for Mirza Ghalib Poetry collection

Bechain Bahaaron Mein Kya Kya Hai, Jaan Ki Khushbu Aati Hai..

Bechain bahaaron mein kya kya hai.. jaan ki khushbu aati hai,
jo phool mehakta hai uss se toofaan ki khushbu aati hai.

Kal raat dikha ke khwaab-e tarab jo sejj ko soona chhod gaya,
har silwatt se phir aaj ussi mehmaan ki khushbu aati hai.

Talqeen-e ibaadat ki hai mujhe yun teri muqaddas aankhon ne,
mandir ke dareechon se jaise lobaan ki khushbu aati hai.

Kuchh aur bhi saansein lene par majboor sa main ho jata hun,
jab itne bade jungle mein kisi insaan ki khushbu aati hai.

Kuchh tu hi mujhe ab samjha de aye qufr duhaai hai teri,
kyon sheikh ke daaman se mujh ko imaan ki khushbu aati hai.

Darta hun kahin iss aalam mein jeene se na munkir ho jaaun,
ahbaab ki baaton se mujhko ehsaan ki khushbu aati hai. !!

Beete Rishte Talaash Karti Hai..

Baad-e-Saba

Beete rishte talaash karti hai,
Khushbu gunchhe talaash karti hai.

Jab guzarti hai uss gali se saba,
Khat ke purze talaash karti hai.

Apne maazi ki justzoo mein bahaar,
Peele pattey talaash karti hai.

Ek umeed baar baar aa kar,
Apne tukde talaash karti hai.

Boodhhi pagdandi shehar tak aa kar,
Apne bete talaash karti hai. !!

 

Chalo Phir Dhoond Lein Hum, Ussi Masoom Bachpan Ko..

cute baby in flowers

Chalo phir dhoond lein hum..
Ussi masoom bachpan ko,
Unhi masoom khushiyon ko,
Unhi rangeen lamhon ko,
Jahan ghum ka pata na tha !
Jahan dukh ki samajh na thi !
Jahan bas muskurahat thi !
Bahaarein hi bahaarein thi !
Chalo phir dhoond lein hum..
Ussi masoom bachpan ko,
Ki jab saawan barasta tha,
Toh uss kaaghaz ki kashti ko,
Banana aur dooba dena,
Bahut acchha sa lgta tha..
Aur iss duniya ka har chehra,
Bahut saccha sa lagta tha …!

Aate Hain Hum Bhi Paaon Se Kaante Nikaal Kar..

Tum Qaafila Bahaar Ka Kuchh Dair Roko Toh Sahi,
Aate Hain Hum Bhi Paaon Se Kaante Nikaal Kar …!