Home / Tag Archives: badan

Tag Archives: badan

Koi Na Jaan Saka Woh Kahan Se Aaya Tha – Bashir Badr

Bashir Badr Poetry

Koi na jaan saka woh kahan se aaya tha,
aur uss ne dhoop se baadal ko kyon milaaya tha.

Ye baat logon ko shayad pasand aayi nahin,
makaan chhota tha lekin bahut saj aaya tha.

Woh ab wahan hain jahan raaste nahin jaate,
main jis ke saath yahan pichhle saal aaya tha.

Suna hai uss pe chahkne lage parinde bhi,
woh ek paudha jo hum ne kabhi lagaya tha.

Chiraagh doob gaye Kapkapaaye honthon par,
kisi ka haath humare labon tak aaya tha.

Badan ko chhod ke jaana hai aasman ki taraf,
samandaron ne humen ye sabaq padhaya tha.

Tamaam umar mera dum issi dhuen mein ghuta,
woh ek chiraagh tha maine usey bujhaya tha. !!

Bashir Badr Poetry Collection

Subscribe us for bashir badr shayari, ghazals, poems, shair, nazms, urdu poets. 

Sisakte Aab Mein Kis Ki Sada Hai..

Bashir Badr Poetry

Sisakte Aab mein kis ki sada hai,
koi dariya ki teh mein ro raha hai.

Savere meri in aankhon ne dekha,
khuda chaaron taraf bikhra hua hai.

Sameto aur seene mein chhupa lo,
ye sannaata bahut faila hua hai.

Pake genhoon ki khusboo cheekhti hai,
badan apna sunehara ho chala hai.

Haqeekat soorkh machhli jaanti hai,
samandar kaisa burha devta hai.

Humari shaakh ka nau-khez patta,
hawa ke honth aksar choomta hai.

Mujhe un neeli aankhon ne bataaya,
tumhaara naam paani par likha hai. !!

Bashir Badr Poetry Collection

Subscribe us for bashir badr poetry, urdu poetry, nazms, poems, urdu poets, shayari, ghazals.

Aaye Hain Meer Kaafir Ho Kar Khuda Ke Ghar Mein..

Meer Taqi Meer Poetry

Aaye hain ‘meer’ kaafir ho kar khuda ke ghar mein,
peshaani par hai qashqa zunnaar hai kamar mein.

Naazuk badan hai kitna woh shokh-chashm dilbar,
jaan uss ke tan ke aage aati nahin nazar mein.

Seene mein teer uss ke toote hain be-nihaayat,
suraakh pad gaye hain saare mere jigar mein.

Aainda shaam ko hum roya kudha karenge,
mutlaq asar na dekha naalidan-e-sehar mein.

Be-sudh pada rahun hun uss mast-e-naaz bin main,
aata hai hosh mujh ko ab toh pehar pehar mein.

Seerat se guftugu hai kya motabar hai soorat,
hai ek sookhi lakdi jo bu na ho agar mein.

Hum-saaya-e-mughaan mein muddat se hun chunaanche,
ek sheera-khaane ki hai deewar mere ghar mein.

Ab subh-o-shaam shaayad girye pe rang aave,
rehta hai kuchh jhamakta khunaab chashm-e-tar mein.

Aalam mein aab-o-gil ke kyonkar nibaah hoga,
asbaab gir pada hai saara mera safar mein. !!

Click here for Meer Taqi Meer poetry collection

Har Ek Baat Pe Kehte Ho Tum Ki Tu Kya Hai..

Mirza Ghalib Poetry

Har ek baat pe kehte ho tum ki tu kya hai,
tumhin kaho ki ye andaaz-e-guftgoo kya hai.

Na shole mein ye karishma na barq mein ye adaa,
koi bataao ki woh shokh-e-tund-khoo kya hai.

Ye rashk hai ki woh hota hai hum-sukhan tum se,
wagarna khauf-e-bad-aamozi-e-adoo kya hai.

Chipak raha hai badan par lahoo se pairaahan,
humari jeb ko ab haajat-e-rafoo kya hai.

Jalaa hai jism jahan dil bhi jal gaya hoga,
kuredate ho jo ab raakh justjoo kya hai.

Ragon mein daudte phirne ke hum nahin qaayal,
jab aankh se hi na tapka toh phir lahoo kya hai.

Woh cheez jis ke liye hum ko ho bahisht azeez,
siwaaye baada-e-gulfaam-e-mushk-boo kya hai.

Piun sharaab agar khum bhi dekh lun do chaar,
ye sheesha-o-qadah-o-kooza-o-suboo kya hai.

Rahi na taaqat-e-guftaar aur agar ho bhi,
toh kis ummeed pe kahiye ki aarzoo kya hai.

Bana hai shaah ka musaahib phire hai itraata,
wagarna shehar mein ‘ghalib’ ki aabroo kya hai. !!

– Click here for Mirza Ghalib Poetry collection

Benaam Sa Ye Dard Thehar Kyon Nahin Jaata..

Benaam sa ye dard thehar kyon nahin jaata,
jo beet gaya hai woh guzar kyon nahin jaata.

Sab kuchh toh hai kya dhoondhti rehti hain nigaahen,
kya baat hai main waqt pe ghar kyon nahin jaata.

Woh ek hi chehra toh nahin saare jahaan mein,
jo door hai woh dil se utar kyon nahin jaata.

Main apni hi uljhi hui raahon ka tamaasha,
jaate hain jidhar sab main udhar kyon nahin jaata.

Woh khwaab jo barson se na chehra na badan hai,
woh khwaab hawaaon mein bikhar kyon nahin jaata. !!

Nida Fazli

Woh Chaandni Ka Badan Khushbuon Ka Saaya Hai..

sad-girl-women-on-beach-in-evening-painting-artpic-bashir-badr-poetry-shayari

Woh chaandni ka badan khushbuon ka saaya hai,
bahut azeez humen hai, magar paraaya hai.

Utar bhi aao kabhi aasmaan ke zeene se,
tumhen khuda ne humare liye banaya hai.

Kahaan se aayi ye khushboo, ye ghar ki khusboo hai
iss ajnabi ke andhere mein kaun aaya hai.

Mehak rahi hai zameen chaandni ke phoolon se,
khuda kisi ki mohabbat pe muskuraya hai.

Usey kisi ki mohabbat ka aitbaar nahin,
usey zamaane ne shayad bahut sataaya hai.

Tamaam umar mera dum uss ke dhuen se ghuta,
woh ek chiraagh tha maine usey bujhaya hai. !!

Bashir Badr

Tere Badan Se Jo Chhu Kar Idhar Bhi Aata Hai..

Tere badan se jo chhu kar idhar bhi aata hai,
misaal-e rang woh jhaunka nazar bhi aata hai.

Tamaam shab jahan jalta hai ek udaas diya,
hawa ki raah mein ek aisa ghar bhi aata hai.

Woh mujhe toot ke chaahega chhod jaayega,
mujhe khabar thi usey ye hunar bhi aata hai.

Ujaad bann mein utarta hai ek jugnu,
hawa ke saath koi humsafar bhi aata hai.

wafa ki kaun si manzil pe usne chhoda tha,
ki woh toh yaad humein bhool kar bhi aata hai.

Jahan lahoo ke samundar ki hadd theharti hai,
wahin jazeera-e-laal-o-gauhar* bhi aata hai.

Chale jo zikar farishton ki paarsaai* ka,
toh zer-e-behas* maqaam-e-bashar* bhi aata hai.

Abhi sinaan* ko sambhaale rahein aduu mere,
ki un safon* mein mera sar bhi aata hai.

Kabhi kabhi mujhe milne bulandiyon se,
shua-e-subh* ki soorat utar bhi aata hai.

Isiliye main kisi shab na so saka ‘Mohsin
woh mehtaab kabhi baam* par bhi aata hai. !!

*[Jazeera-e-laal-o-gauhar=an island of rubies and pearls,
Paarsaai=holiness, zer-e-behas=under discussion,
Maqaam-e-bashar=place of human, baam=tarace
Sinaan=sword, Safon=lines, Shua-e-subh=ray of morning]

Mohsin Naqvi