Home / Tag Archives: baazi-shayari

Tag Archives: baazi-shayari

Kahan Sawaab Kahan Kya Azaab Hota Hai..

Kahan sawaab kahan kya azaab hota hai,
mohabbaton mein kab itna hisaab hota hai.

Bichhad ke mujh se tum apni kashish na kho dena,
udaas rehne se chehra kharaab hota hai.

Usey pata hi nahin hai ki pyaar ki baazi,
jo haar jaaye wohi kaamyaab hota hai.

Jise main likhta hun aise ki khud hi padh paaun,
kibaa-e zeest mein aisa bhi baab hota hai.

Bahut bharosa na kar lena apni aankhon par,
dikhaayi deta hai jo kuchh woh khwaab hota hai. !!

Wasim Barelvi

Khoobsoorat Jheel Mein Hansta Kanwal Bhi Chahiye..

Khoobsoorat jheel mein hansta kanwal bhi chahiye,
hai galaa acchha toh phir acchhi ghazal bhi chahiye.

Uth ke iss hansti hui duniya se jaa sakta hun main,
ahl-e mehfil ko magar mera badal bhi chahiye.

Sirf phoolon se sajaawat pedd ki mumkin nahin,
meri shaakhon ko naye mausam mein phal bhi chahiye.

Aye meri khaak-e watan tera sagaa beta hun main,
kyon rahun footpaath par mujh ko mahal bhi chahiye.

Dhoop waadon ki buri lagne lagi hai ab humein,
sirf taareefen nahin urdu ka hal bhi chahiye.

Tune saari baaziyan jeeti hain mujh par baith kar,
ab main burha ho raha hun astbal bhi chahiye. !!

Yun Hi Mar Mar Ke Jiyen Waqt Guzaare Jaayen..

Yun hi mar mar ke jiyen waqt guzaare jaayen,
zindagi hum tere haathon se na maare jaayen.

Ab zameen par koi gautam na mohammad na maseeh,
aasmaanon se naye log utaare jaayen.

Woh jo maujood nahin uss ki madad chaahte hain,
woh jo sunta hi nahin uss ko pukaare jaayen.

Baap larzaan hai ki pahunchi nahin baraat ab tak,
aur hum-joliyaan dulhan ko sanwaare jaayen.

Hum ki nadaan juaari hain sabhi jaante hain,
dil ki baazi ho toh jee-jaan se haare jaayen.

Taaj diya tum ne dar-e yaar bhi uktaa ke ‘faraz
ab kahaan dhoondhne ghum-khwaar tumhaare jaayen. !!