Home / Tag Archives: anaa-shayari

Tag Archives: anaa-shayari

Tu Kabhi Dekh Toh Rote Hue Aa Kar Mujh Ko..

Tu kabhi dekh toh rote hue aa kar mujh ko,
rokna padta hai aankhon se samandar mujh ko.

Iss mein aawara-mizazi ka koi dakhl nahin,
dasht-o sehra mein firaata hai muqaddar mujh ko.

Ek tooti hui kashti ka musaafir hun main,
haan nigal jayega ek roz samundar mujh ko.

Iss se badh kar meri tauheen-e anaa kya hogi,
ab gadaagar bhi samjhte hain gadaagar mujh ko.

Zakhm chehre pe, lahoo aankhon mein,  seena chhalni,
zindagi ab toh odhaa de koi chaadar mujh ko.

Meri aankhon ko woh binaai ataa kar maula,
ek aansu bhi nazar aaye samundar mujh ko.

Koi iss baat ko maane ki na maane lekin,
chaand lagta hai tere maathe ka jhoomar mujh ko.

Dukh toh ye hai mera dushman hi nahin hai koi,
ye mere bhai hain kehte hain jo baabar mujh ko.

Mujh se aangan ka andhera bhi nahin mit paaya,
aur duniya hai ki kehti hai ‘Munawwar’  mujh ko. !!

Tu Kabhi Dekh Toh Rote Hue Aa Kar Mujh Ko..
4.9 (97.5%) 8 votes

Gairat-e Ishq Salaamat Thi, Anaa Zinda Thi..

Gairat-e ishq salaamat thi anaa zinda thi,
woh bhi din the ki raah-o rasm-e wafa zinda thi.

Qais ko dosh na do rakhiyo na farhaad ko naam,
inhi logon se mohabbat ki adaa zinda thi.

Shehar-e beemar ke har koocha-o baam-o dar par,
hum bhi marte the ki jab khalq-e khuda zinda thi.

Bujh gayi shamaayen toh dum tod gaye jhounke bhi,
jis tarah zehar-e raqaabat se hawa zinda thi.

Yaad-e ayyaam ki sehra-e mohabbat mein ‘faraz
jaras-e qaafila-e dil ki sadaa zinda thi. !!

Gairat-e Ishq Salaamat Thi, Anaa Zinda Thi..
4.8 (95%) 4 votes

Jahan Tak Ho Saka Humne Tumhe Parda Karaya Hai..

Jahan tak ho saka humne tumhe parda karaya hai,
Magar aye aansuon! tumne bahut rushwa karaya hai.

Chamak yun hi nahin aati hai khuddari ke chehre par,
Anaa ko humne do do waqt ka faaqa karaya hai.

Badi muddat pe khayi hain khushi se gaaliyan humne,
Badi muddat pe usne aaj munh meetha karaya hai.

Bichhadna uski khwaahish thi na meri aarzoo lekin,
Zara si zidd ne iss aangan ka bantwara karaya hai.

Kahin pardesh ki rangeeniyon mein kho nahin jana,
Kisi ne ghar se chalte waqt ye waada karaya hai.

Khuda mehfooz rakhe mere bacchon ko siyaasat se,
Ye woh aurat hai jisne umar bhar pesha karaya hai. !!

Jahan Tak Ho Saka Humne Tumhe Parda Karaya Hai..
5 (100%) 1 vote

Rone Mein Ek Khatra Hai Talaab Nadi Ho Jaate Hain..

Rone mein ek khatra hai, talaab nadi ho jaate hain
Hansna bhi aasaan nahin hai, labb zakhmi ho jaate hain.

Station se waapas aa kar boorhi aankhen sochti hain,
Pattey dehaati rahte hain, phall shehari ho jaate hain.

Bojh uthana shauk kahan hai, mazboori ka sauda hai
Rahte rahte station par log coolie ho jaate hain.

Sab se hans kar miliye-juliye lekin itna dhyaan rahe,
Sab se hans kar milne wale rushwa bhi ho jaate hain.

Apni anaa ko bech ke aksar lukm-e-tarr ki chahat mein,
Kaise kaise sacche shayar darbaari ho jaate hain. !!

Rone Mein Ek Khatra Hai Talaab Nadi Ho Jaate Hain..
5 (100%) 3 votes