Home / Tag Archives: aankh

Tag Archives: aankh

Kuchh Toh Duniya Ki Inaayat Ne Dil Tod Diya..

Sudarshan Faakir Poetry

Kuchh toh duniya ki inaayat ne dil tod diya,
aur kuchh talkhi-e haalaat ne dil tod diya.

Hum toh samjhe the ki barsaat mein barsegi sharaab,
aayi barsaat toh barsaat ne dil tod diya.

Dil toh rota rahe aur aankh se aansoo na bahe,
ishq ki aisi rawaayat ne dil tod diya.

Woh mere hain, mujhe mil jaayenge, aa jaayenge..
aise bekaar khyaalaat ne dil tod diya.

Aap ko pyaar hai mujh se ki nahin hai mujh se,
jaane kyon aise sawaalaat ne dil tod diya. !!

Sudarshan Faakir Poetry Collection

Subscribe us for sudarshan faakir shayari, ghazals, poems, urdu poets, shair, shairy.

Ye Jaane Kaisa Raaz Hai – Javed Akhtar [ZNMD]

Zindagi Na Milegi Dobara [ZNMD]  Poem

Ek baat honthon tak hai jo aayi nahin,
Bas aankhon se hai jhaankti..
Tum se kabhi.. Mujh se kabhi,
Kuchh lafz hain woh maangti…
Jin ko pehan ke honthon tak aa jaaye woh,
Aawaaz ki baahon mein baahen daal ke ithlaaye woh,
Lekin jo ye ek baat hai..
Ehsaas hi ehsaas hai !
Khushboo si hai jaise hawa mein tairti,
Khushboo jo be-aawaaz hai,
Jis ka pataa tum ko bhi hai..
Jis ki khabar mujh ko bhi hai..
Duniya se bhi chhupta nahin !

Ye jaane kaisa raaz hai …!!

Javed Akhtar Poetry Collection

Subscribe us for latest javed akhtar ghazals, poems, poetry, shayari, urdu poets. 

Chaand Ke Charon Taraf Maili Ridayen Saath Hain..

Bashir Badr Poetry

Chaand ke chaaron taraf maili ridaayen saath hain,
khaak itni sar chadhi kis ki hawaayen saath hain.

Ek aurat se wafa karne ka ye tohfa mila,
jaane kitni auraton ki badduayen saath hain.

Ungliyan meri sitaaron tak pahunch sakti nahin,
mutthiyon mein jugnuon ki badduayen saath hain.

Din khila hai phool sa aur raat bheegi aankh si,
koi mausam ho yahan donon hawaayen saath hain.

Main hun ek kaaghaz ka tukda jaane kis ki khoj mein,
kyon mere peechhe zamane ki hawaayen saath hain. !!

Bashir Badr Poetry Collection

Subscribe us for bashir badr shayari, ghazals, urdu poetry, poems, nazms, shairy. 

Har Ek Baat Pe Kehte Ho Tum Ki Tu Kya Hai..

Mirza Ghalib Poetry

Har ek baat pe kehte ho tum ki tu kya hai,
tumhin kaho ki ye andaaz-e-guftgoo kya hai.

Na shole mein ye karishma na barq mein ye adaa,
koi bataao ki woh shokh-e-tund-khoo kya hai.

Ye rashk hai ki woh hota hai hum-sukhan tum se,
wagarna khauf-e-bad-aamozi-e-adoo kya hai.

Chipak raha hai badan par lahoo se pairaahan,
humari jeb ko ab haajat-e-rafoo kya hai.

Jalaa hai jism jahan dil bhi jal gaya hoga,
kuredate ho jo ab raakh justjoo kya hai.

Ragon mein daudte phirne ke hum nahin qaayal,
jab aankh se hi na tapka toh phir lahoo kya hai.

Woh cheez jis ke liye hum ko ho bahisht azeez,
siwaaye baada-e-gulfaam-e-mushk-boo kya hai.

Piun sharaab agar khum bhi dekh lun do chaar,
ye sheesha-o-qadah-o-kooza-o-suboo kya hai.

Rahi na taaqat-e-guftaar aur agar ho bhi,
toh kis ummeed pe kahiye ki aarzoo kya hai.

Bana hai shaah ka musaahib phire hai itraata,
wagarna shehar mein ‘ghalib’ ki aabroo kya hai. !!

– Click here for Mirza Ghalib Poetry collection

Bahut Roshan Hai Shaam-e Ghum Humari..

Habib Jalib Poetry

Bahut roshan hai shaam-e-ghum humari,
kisi ki yaad hai humdum humari.

Ghalat hai laa-taaluq hain chaman se,
tumhare phool aur shabnam humari.

Ye palkon par naye aansoo nahin hain,
azal se aankh hai purnam humari.

Har ek lab per tabassum dekhne ki,
tamamnna kab hui hai kam humari.

kahi hai hum ne khud se bhi bahut kam,
na poochho daastan-e-ghum humari. !!

– Click Here For Habib Jalib Poetry Collection

Tere Maathe Pe Jab Tak Bal Raha Hai..

Habib Jalib Poetry

Tere maathe pe jab tak bal raha hai,
ujaala aankh se ojhal raha hai.

Samaate kya nazar mein chaand taare,
tasawwur mein tera aanchal raha hai.

Teri shaan-e-taghaful ko khabar kya,
koi tere liye bekal raha hai.

Shikaayat hai ghum-e-dauran ko mujh se,
ki dil mein kyon tera ghum pal raha hai.

Taajjub hai sitam ki aandhiyon mein,
charaagh-e-dil abhi tak jal raha hai.

Lahoo royengi maghrib ki fazaayen,
badi tezi se sooraj dhal raha hai.

Zamana thak gaya ‘jalib’hi tanha,
wafa ke raaste par chal raha hai. !!

– Click Here For Habib Jalib Poetry, Poems  Collection

Ab Teri Zaroorat Bhi Bahut Kam Hai Meri Jaan..

Habib Jalib Poetry

Ab teri zaroorat bhi bahut kam hai meri jaan,
ab shauq ka kuchh aur hi aalam hai meri jaan.

Ab tazkira-e-khanda-e-gul baar hai jee par,
jaan waqf-e-giriya-e-shabnam hai meri jaan.

Rukh par tere bikhri hui ye zulf-e-siyah-taab,
tasweer-e-pareshaani-e-aalam hai meri jaan.

Ye kya ki tujhe bhi hai zamaane se shikayat,
ye kya ki teri aankh bhi purnam hai meri jaan.

Hum saada dilon par ye shab-e-ghum ka tasallut,
maayoos na ho aur koi dum hai meri jaan.

Ye teri tawajjoh ka hai ejaaz ki mujh se,
har shakhs tere shehar ka barham hai meri jaan.

Aye nuzhat-e-mahtaab tera ghum hai meri zeest,
aye naazish-e-khurshid tera ghum hai meri jaan. !!

– Click Here For Habib Jalib Poetry, Poems  Collection