Home / Tag Archives: aalam

Tag Archives: aalam

Aalam Hi Aur Tha Jo Shanasaiyon Mein Tha..

Ada Jafri Poetry

Aalam hi aur tha jo shanasaiyon mein tha,
jo deep tha nigaah ki parchhaaiyon mein tha.

Woh be-panaah khauf jo tanhaiyon mein tha,
dil ki tamaam anjuman-aaraaiyon mein tha.

Ek lamha-e fusun ne jalaaya tha jo diya,
phir umar bhar khayaal ki raanaaiyon mein tha.

Ek khwaab-guun si dhoop thi zakhmon ki aanch mein,
ek saaebaan sa dard ki purwaaiyon mein tha.

Dil ko bhi ek jaraahat-e dil ne ataa kiya,
ye hausla ki apne tamaashaaiyon mein tha.

kaTta kahan taweel tha raaton ka silsila,
sooraj meri nigaah ki sachchaaiyon mein tha.

Apni gali mein kyon na kisi ko woh mil saka,
jo etimaad baadiya-paimaaiyon mein tha.

Is ahd-e-khud-sipaas ka puchho ho maajra,
masroof aap apni paziraaiyon mein tha.

Us ke huzoor shukr bhi aasaan nahin ada,
woh jo qareeb-e jaan meri tanhaaiyon mein tha. !!

Aa Jayen Hum Nazar Jo Koi Dum Bahut Hai Yan..

Meer Taqi Meer Poetry

Aa jaayen hum nazar jo koi dum bahut hai yan,
mohlat humen bisaan-e-sharar kam bahut hai yan.

Yak lehza seena-kobi se fursat humen nahin,
yaani ki dil ke jaane ka maatam bahut hai yan.

Haasil hai kya siwaaye taraai ke dahr mein,
uth aasmaan tale se ki shabnam bahut hai yan.

Maail-baghair hona tujh abroo ka aib hai,
thi zor ye kamaan wale kham-cham bahut hai yan.

Hum rah-rawaan-e-raah-e-fana der reh chuke,
waqfa bisaan-e-subh koi dum bahut hai yan.

Iss but-kade mein maani ka kis se karen sawaal,
aadam nahin hai soorat-e-aadam bahut hai yan.

Aalam mein log milne ki gon ab nahin rahe,
har-chand aisa waisa toh aalam bahut hai yan.

Waisa chaman se saada nikalta nahin koi,
rangeeni ek aur kham-o-cham bahut hai yan.

ejaaz-e-iswi se nahin behas ishq mein,
teri hi baat jaan mujassam bahut hai yan.

Mere halaak karne ka ghum hai abas tumhen,
tum shaad zindagaani karo ghum bahut hai yan.

Dil mat laga rukh-e-araq-aalood yaar se,
aaine ko utha ki zameen nam bahut hai yan.

Shaayad ki kaam subh tak apna khinche na ‘meer
ahwaal aaj shaam se darham bahut hai yan. !!

– Click here for Meer Taqi Meer poetry collection

Teri Aankhon Ka Ajab Turfa Shaman Dekha Hai..

Habib Jalib Poetry

Teri aankhon ka ajab turfa shamaan dekha hai,
ek aalam teri jaanib nigraan dekha hai.

Kitne anwaar simat aaye hain in aankhon mein,
ek tabassum tere honthon pe rawaan dekha hai.

Hum ko aawaara-o-bekaar samajhne waalo,
tum ne kab iss but-e-kaafir ko jawaan dekha hai.

Sehan-e-gulshan mein ki anjum ki tarab-gaahon mein,
tum ko dekha hai kahin jaane kahan dekha hai.

Wahi aawaara-o-deewana-o-aashufta-mizaaj,
hum ne ‘jalib’ko sar-e-ku-e-butaan dekha hai. !!

– Click Here For Habib Jalib Poetry, Poems  Collection

Ab Teri Zaroorat Bhi Bahut Kam Hai Meri Jaan..

Habib Jalib Poetry

Ab teri zaroorat bhi bahut kam hai meri jaan,
ab shauq ka kuchh aur hi aalam hai meri jaan.

Ab tazkira-e-khanda-e-gul baar hai jee par,
jaan waqf-e-giriya-e-shabnam hai meri jaan.

Rukh par tere bikhri hui ye zulf-e-siyah-taab,
tasweer-e-pareshaani-e-aalam hai meri jaan.

Ye kya ki tujhe bhi hai zamaane se shikayat,
ye kya ki teri aankh bhi purnam hai meri jaan.

Hum saada dilon par ye shab-e-ghum ka tasallut,
maayoos na ho aur koi dum hai meri jaan.

Ye teri tawajjoh ka hai ejaaz ki mujh se,
har shakhs tere shehar ka barham hai meri jaan.

Aye nuzhat-e-mahtaab tera ghum hai meri zeest,
aye naazish-e-khurshid tera ghum hai meri jaan. !!

– Click Here For Habib Jalib Poetry, Poems  Collection

Bechain Bahaaron Mein Kya Kya Hai, Jaan Ki Khushbu Aati Hai..

Bechain bahaaron mein kya kya hai.. jaan ki khushbu aati hai,
jo phool mehakta hai uss se toofaan ki khushbu aati hai.

Kal raat dikha ke khwaab-e tarab jo sejj ko soona chhod gaya,
har silwatt se phir aaj ussi mehmaan ki khushbu aati hai.

Talqeen-e ibaadat ki hai mujhe yun teri muqaddas aankhon ne,
mandir ke dareechon se jaise lobaan ki khushbu aati hai.

Kuchh aur bhi saansein lene par majboor sa main ho jata hun,
jab itne bade jungle mein kisi insaan ki khushbu aati hai.

Kuchh tu hi mujhe ab samjha de aye qufr duhaai hai teri,
kyon sheikh ke daaman se mujh ko imaan ki khushbu aati hai.

Darta hun kahin iss aalam mein jeene se na munkir ho jaaun,
ahbaab ki baaton se mujhko ehsaan ki khushbu aati hai. !!

Ab Ke Tajdeed-e Wafa Ka Nahi Imkaan Janaan..

Ab ke tajdeed-e-wafa* ka nahi imkaan* janaa,
yaad kya tujh ko dilaayen tera paimaan janaa.

Yun hi mausam ki adaa dekh ke yaad aaya hai,
kis qadar jald badal jaate hain insaan janaa.

Zindagi teri ataa thi so tere naam ki hai,
hum ne jaise bhi basar ki tera ehsaan janaan.

Dil ye kehta hai ki shayad hai fasurda* tu bhi,
dil ki kya baat karein dil toh hai nadaan janaan.

Awwal awwal ki mohabbat ke nashe yaad toh kar,
be-piye bhi tera chehra tha gulishtaan janaan.

Aakhir aakhir toh ye aalam hai ki ab hosh nahi,
ragg-e meena sulag uthi ki ragg-e-jaan janaan.

Muddaton se yahi aalam na tawaqqo na umeed,
dil pukaare hi chala jata hai janaan janaan.

Hum bhi kya sada the hum ne bhi samajh rakha tha,
ghum-e-dauran se juda hai ghum-e-janaan janaan.

Ab ke kuchh aisi saji mehfil-e-yaraan janaan,
sar-ba-zaanu hai koi sar-ba-girebaan janaan.

Har koi apni hi aawaaz se kaanp uthta hai,
har koi apne hi saaye se hiraasaan janaan.

Jis ko dekho wahi zanzeer-ba-paa lagta hai,
shehar ka shehar hua daakhil-e-zindaan janaan.

Ab tera zikar bhi ghazal mein shayad hi aaye,
aur se aur hue dard ke unwaan janaan.

Hum ki roothi hui rutt ko bhi mana lete the,
hum ne dekha hi na tha mausam-e-hijraan janaa.

Hosh aaya toh sabhi khwaab the raiza raiza,
jaise udte hue auraaq-e-pareshaan* janaa. !!

*[ Tajdeed-e-wafa=Renewal Of Faith,
Imkaan=possibility , Fasurda=Disappointed
Auraaq-e-pareshaan=scattered pages ]

 

Aye Wasl Kuchh Yahan Na Hua Kuchh Nahi Hua..

Aye wasl kuchh yahan na hua kuchh nahi hua,
uss jism ki main jaan na hua kuchh nahi hua.

Tu aaj mere ghar mein jo mehmaan hai Eid hai,
tu ghar ka mezbaan na hua kuchh na hua.

Kholi toh hai zabaan magar iss ki kya bisaat,
main zehar ki dukaan na hua kuchh nahi hua.

Kya ek kaarobaar tha woh rabt-e jism-o jaan,
koi bhi raigaan* na hua kuchh nahi hua.

Kitna jala hua hun bas ab kya bataaun main,
aalam dhuaan – dhuaan na hua kuchh nahi hua.

Dekha tha jab ki pehle – pehal usne aaina,
uss waqt main wahan na hua kuchh nahi hua.

Woh ek jamaal jalwa-fishan hai zameen – zameen,
main ta-ba-aasmaan na hua kuchh nahi hua.

Maine bas ek nighaah mein tayy kar liya tujhe,
tu rang-e bekaraan na hua kuchh nahi hua.

Ghum ho ki jaan tu meri aaghosh-e zaat mein,
benaam-o nishaan na hua kuchh nahi hua.

Har koi darmiyaan hai aye maajra-farosh,
main apne darmiyaan na hua kuchh nahi hua. !!
*[ Raigaan=useless ]