Home / Tag Archives: Aaina Poetry

Tag Archives: Aaina Poetry

Aainon Mein Aks Na Hon Toh Hairat Rehti Hai..

Aainon mein aks na hon toh hairat rehti hai,
jaise khaali aankhon mein bhi wehshat rehti hai.

Har dum duniya ke hungaame ghere rakhte the,
jab se tere dhyaan lage hain fursat rehti hai.

Karni hai toh khul ke karo inkaar-e-wafa ki baat,
baat adhoori reh jaaye toh hasrat rehti hai.

Shehar-e sukhan mein aisa kuchh kar izzat ban jaaye,
sab kuchh mitti ho jaata hai izzat rehti hai.

Bante bante dheh jaati hai dil ki har taameer,
khwaahish ke behroop mein shayad qismat rehti hai.

Saaye larazte rehte hain shehron ki galyion mein,
rehte the insaan jahan ab dehshat rehti hai.

Mausam koi khushboo le kar aate jaate hain,
kya kaya hum ko raat gaye tak wehshat rehti hai.

Dhyaan mein mela sa lagta hai beeti yaadon ka,
aksar uss ke ghum se dil ki sohbat rehti hai.

Phoolon ki takhti par jaise rangon ki tehreer,
lauh-e-sukhan par aise ‘amjad’ shohrat rehti hai. !!

Amjad Islam Amjad 

Jab Aaina Koi Dekho Ek Ajnabi Dekho..

Jab aaina koi dekho ek ajnabi dekho,
kahan pe laayi hai tum ko ye zindagi dekho.

Mohabbaton mein kahan apne waaste fursat,
jise bhi chaahe woh chaahe meri khushi dekho.

Jo ho sake toh zyada hi chaahna mujh ko,
kabhi jo meri mohabbat mein kuchh kami dekho.

Jo door jaaye toh ghum hai jo paas aaye toh dard,
na jaane kya hai woh kambakht aadmi dekho.

Ujaala toh nahin keh sakte iss ko hum lekin,
zara si kam toh hui hai ye teergi dekho. !!

Javed Akhtar

Andar Ka Zehar Choom Liya Dhul Ke Aa Gaye..

Andar ka zehar choom liya dhul ke aa gaye,
kitne shareef log the sab khul ke aa gaye.

Sooraj se jung jeetne nikle the bewqoof,
saare sipaahi mom ke the ghul ke aa gaye.

Masjid mein door door koi dusra na tha,
hum aaj apne aap se mil jul ke aa gaye.

Neendon se jung hoti rahegi tamaam umar,
aankhon mein band khwaab agar khul ke aa gaye.

Sooraj ne apni shakl bhi dekhi thi pehli baar,
aaine ko maze bhi taqaabul ke aa gaye.

Anjaane saaye phirne lage hain idhar udhar,
mausam humare shehar mein kaabul ke aa gaye. !!

Rahat Indori

Main Laakh Keh Dun Ki Aakash Hun Zameen Hun Main..

Main laakh keh dun ki aakash hun zameen hun main,
magar usey toh khabar hai ki kuchh nahin hun main.

Ajeeb log hain meri talaash mein mujh ko,
wahan dhoond rahe hain jahan nahin hun main.

Main aainon se toh mayoos laut aaya tha,
magar kisi ne bataya bahut haseen hun main.

Woh zarre zarre mein mauzood hai magar main bhi,
kahin nahin hun kahan hun kahin nahin hun main.

Woh ek kitaab jo mansoob tere naam se hai,
ussi kitaab ke andar kahin kahin hun main.

Sitaaro aao meri raah mein bikhar jaao,
ye mera hukum hai halaanki kuchh nahin hun main.

Yahin husain bhi guzre yahin yazeed bhi tha,
hazaar rang mein doobi hui zameen hun main.

Ye boorhi qabaren tumhen kuchh nahin bataayengi,
mujhe talaash karo dosto yahin hun main. !!

Rahat Indori

Mere Ashkon Ne Kayi Aankhon Mein Jal Thal Kar Diya..

Mere ashkon ne kayi aankhon mein jal thal kar diya,
ek paagal ne bahut logon ko paagal kar diya.

Apni palkon par sajaa kar mere aansoo aap ne,
raaste ki dhool ko aankhon ka kaajal kar diya.

Maine dil de kar usey ki thi wafa ki ibtida,
uss ne dhokha de ke ye qissa mukammal kar diya.

Ye hawaayen kab nigaahen pher lein kis ko khabar,
shohraton ka takht jab toota toh paidal kar diya.

Devtaaon aur khudaaon ki lagaayi aag ne,
dekhte hi dekhte basti ko jungle kar diya.

Zakhm ki soorat nazar aate hain chehron ke nuqoosh,
hum ne aainon ko tehzeebon ka maqtal kar diya.

Shehar mein charcha hai aakhir aisi ladki kaun hai,
jis ne achchhe-khaase ek shaayar ko paagal kar diya. !!

Rahat Indori

Masjidon Ke Sehan Tak Jana Bahut Dushwaar Tha..

Masjidon ke sehan tak jana bahut dushwaar tha,
der se nikla toh mere raaste mein daar tha.

Dekhte hi dekhte shehron ki raunaq ban gaya,
kal yahi chehra humare aainon par baar tha.

Apni qismat mein likhi thi dhoop ki naraazgi,
saaya-e-deewar tha lekin pas-e-deewar tha.

Sab ke dukh sukh uss ke chehre par likhe paaye gaye,
aadmi kya tha humare shehar ka akhbaar tha.

Ab mohalle bhar ke darwaazon pe dastak hai naseeb,
ek zamana tha ki jab main bhi bahut khuddar tha. !!

Rahat Indori