Home / Tag Archives: aag-shayari

Tag Archives: aag-shayari

Khula Hai Dar Magar Tera Intezaar Jata Raha..

Khula hai dar magar tera intezaar jaata raha,
pyaar toh hai magar aitbaar jata raha.

Kisi ki aankh mein masti toh aaj bhi hai wahi,
magar kabhi jo humein tha khumaar jaata raha.

Kabhi jo seene mein ek aag thi woh sard hui,
kabhi nigaah mein jo tha sharaar jaata raha.

Ajab sa chain tha hum ko ki jab the hum bechain,
qaraar aaya toh jaise qaraar jaata raha.

Kabhi toh meri bhi sunwaayi hogi mehfil mein,
main ye umeed liye baar baar jaata raha. !!

Javed Akhtar

Beemar Ko Marz Ki Dawa Deni Chahiye..

Beemar ko marz ki dawa deni chahiye,
main peena chahta hun pila deni chahiye.

Allaah barkaton se nawaazega ishq mein,
hai jitni poonji paas laga deni chahiye.

Dil bhi kisi faqeer ke huzre se kam nahin,
ye duniya yahin pe laa ke chhupa deni chahiye.

Main khud bhi karna chahta hun apna saamna,
tujh ko bhi ab naqaab utha deni chahiye.

Main phool hun toh phool ko guldaan ho naseeb,
main aag hun toh aag bujha deni chahiye.

Main taaj hun toh taaj ko sar pe sajaayen log,
main khaak hun toh khaak udaa deni chahiye.

Maine jabr hun toh jabr ki taaiid band ho,
main sabr hun toh mujh ko dua deni chahiye.

Main khwaab hun toh khwaab se chaunkaaiye mujhe,
main neend hun toh neend udaa deni chahiye.

Sach baat kaun hai jo sar-e-aam keh sake,
main keh raha hun mujh ko saza deni chahiye. !!

Rahat Indori

Mere Ashkon Ne Kayi Aankhon Mein Jal Thal Kar Diya..

Mere ashkon ne kayi aankhon mein jal thal kar diya,
ek paagal ne bahut logon ko paagal kar diya.

Apni palkon par sajaa kar mere aansoo aap ne,
raaste ki dhool ko aankhon ka kaajal kar diya.

Maine dil de kar usey ki thi wafa ki ibtida,
uss ne dhokha de ke ye qissa mukammal kar diya.

Ye hawaayen kab nigaahen pher lein kis ko khabar,
shohraton ka takht jab toota toh paidal kar diya.

Devtaaon aur khudaaon ki lagaayi aag ne,
dekhte hi dekhte basti ko jungle kar diya.

Zakhm ki soorat nazar aate hain chehron ke nuqoosh,
hum ne aainon ko tehzeebon ka maqtal kar diya.

Shehar mein charcha hai aakhir aisi ladki kaun hai,
jis ne achchhe-khaase ek shaayar ko paagal kar diya. !!

Rahat Indori

Shab-e-Wisal Mein Doori Ka Khwab Kyon Aaya..

Shab-e-wisal mein doori ka khwab kyon aaya,
kamaal-e-fatah mein ye dar ka baab kyon aaya.

Dilon mein ab ke baras itne wehm kyon jaage,
bilaad-e-sabr mein ab iztiraab kyon aaya.

Hai aag gul pe ajab iss bahaar-e guzraan mein,
chaman mein ab ke gul-e-behisaab kyon aaya.

Agar wahi tha toh rukh pe woh berukhi kya thi,
zara se hijr mein ye inqilaab kyon aaya.

Bas ek hoga tamasha tamaam samton par,
meri sada ke safar mein saraab kyon aaya.

Main khush nahin hun bahut door uss se hone par,
jo main nahin tha toh uss par shabaab kyon aaya.

Udaa hai shola-e-barq abr ki faseelon par,
ye iss balaa ke muqaabil sahaab kyon aaya.

Yaqeen kis liye uss par se uth gaya ha ‘munir
tumhare sar pe ye shak ka azaab kyon aaya. !!

Munir Niazi

Hai Shakl Teri Gulaab Jaisi..

Hai shakl teri gulaab jaisi,
nazar hai teri sharaab jaisi.

Hawaa sahar ki hai inn dinon mein,
badalte mausam ke khwaab jaisi.

Sadaa hai ek dooriyon mein ojhal,
meri sadaa ke jawaab jaisi.

Woh din tha dozakh ki aag jaisa,
woh raat gahre azaab jaisi.

Ye shehar lagta hai dasht jaisa,
chamak hai uss ki saraab jaisi.

Munir’ teri ghazal ajab hai,
kisi safar ki kitaab jaisi. !!

Munir Niazi

Mere Saath Tum Bhi Dua Karo Yun Kisi Ke Haq Mein Bura Na Ho..

Mere saath tum bhi dua karo yun kisi ke haq mein bura na ho,
kahin aur ho na ye haadsa koi raaste mein juda na ho.

Mere ghar se raat ki sej tak woh ek aansoo ki laqeer hai,
zara badh ke chaand se poochhana woh iss taraf se gaya na ho.

Sar-e shaam thehri hui zameen, aasmaan hai jhuka hua
isi mod par mere waaste woh charaagh le kar khada na ho.

Woh farishte aap hi dhoondhiye kahaaniyon ki kitaab mein,
jo bura kahe na bura sune , koi shakhs un se khafa na ho.

Woh wisaal ho ke firaaq ho teri aag mahkegi ek din,
woh gulaab ban ke khilega kya jo charaagh ban ke jala na ho.

Mujhe yun laga ki khamosh khushboo ke honth titli ne chhoo liye,
inhi zard patton ki aout mein koi phool soya hua na ho.

Isi ehtiyaat mein main raha, isi ehtiyaat mein woh raha
woh kahan kahan mere saath hai kisi aur ko ye pata na ho. !!

Bashir Badr

Sab Aane Waale Behla Kar Chale Gaye..

Sab aane waale behla kar chale gaye,
aankhon par sheeshe chamka kar chale gaye.

Malbe ke neeche aa kar maloom hua,
sab kaise deewaar gira kar chale gaye.

Log kabhi lautenge raakh batorenge,
jungle mein jo aag laga kar chale gaye.

Main tha din tha aur ek lamba raasta tha,
sab kheme jab log utha kar chale gaye.

Chattaano par aa kar thehre do raaste,
phir aage ek raah bana kar chale gaye.

Barf mein rakhi thandi botal chipak gayi,
khauf dilon mein log dabaa kar chale gaye.

Jab do naali ne rukh phera sab ghaazi,
apne apne haath utha kar chale gaye.

Jaane kab dongon mein mehkenge taare,
kitne sooraj haath dhula kar chale gaye.

Gaare choone patthar ke dushman dekho,
aahan ki deewaar bana kar chale gaye. !!

Bashir Badr