Hai Uss Gulrang Ka Deewar Hona..

Hai uss gulrang ka deewar hona,
ki jaise khwaab se bedaar hona.

Bataati hai mehak dast-e-hina ki,
kisi dar ka pas-e-deewar hona.

Usey rakhta hai sehraaon mein hairaan,
dil-e-shayar ka pur-asraar hona.

Kamaal-e-shauq ka haasil yahi hai,
humara shehar se bezaar hona.

Firaaq aaghaaz hai un saa.aton ka,
hai aakhir jin ka wasl-e-yaar hona.

Yahi hona tha aakhir dasht-e-ghum ko,
humare haath se gulzaar hona.

Mohabbat ka sabab hai beniyaazi,
kashish uss ki hai bas dushwaar hona. !!

Munir Niazi

Uss Ka Naksha Ek Betarteeb Afsaane Ka Tha..

Uss ka naksha ek betarteeb afsaane ka tha,
ye tamasha tha ya koi khwaab deewane ka tha.

Saare kirdaaron mein be-rishta taalluqq tha koi,
un ki behoshi mein ghum sa hosh aa jaane ka tha.

Ishq kya hum ne kiya aawaargi ke ehad mein,
ek jatan bechainiyon se dil ko bahlaane ka tha.

Khwaahishen hain ghar se baahar door jaane ki bahut,
shauq lekin dil mein waapas laut kar aane ka tha.

Le gaya dil ko jo iss mehfil ki shab main aye ‘munir
uss haseen ka bazm mein andaaz sharmaane ka tha. !!

Munir Niazi

Ye Kaisa Nasha Hai Main Kis Ajab Khumaar Mein Hun..

Ye kaisa nasha hai main kis ajab khumaar mein hun,
tu aa ke jaa bhi chuka hai main intezaar mein hun.

Makaan hai qabr jise log khud banaate hain,
main apne ghar mein hun ya main kisi mazaar mein hun.

Dar-e-faseel khula ya pahaad sar se hata,
main ab giri hui galiyon ke marg-zaar mein hun.

Bas itna hosh hai mujh ko ki ajnabi hain sab,
ruka hua hun safar mein kisi dayaar mein hun.

Main hun bhi aur nahin bhi ajeeb baat hai ye,
ye kaisa jabr hai main jis ke ikhtiyaar mein hun.

Munir’ dekh shajar chaand aur deewaaren,
hawaa khizan ki hai sar par shab-e-bahaar mein hun. !!

Munir Niazi

Thakan Se Raah Mein Chalna Muhaal Bhi Hai Mujhe..

Thakan se raah mein chalna muhaal bhi hai mujhe,
kamaal par bhi tha main hi zawaal bhi hai mujhe.

Sadak pe chalte hue ruk ke dekhta hun main,
yahin kahin hai tu ye ehtimaal bhi hai mujhe.

Ye mere gird tamasha hai aankh khulne tak,
main khwaab mein toh hun lekin khyaal bhi hai mujhe.

Ussi ke lutf se marne se khauf aata hai,
ussi ke dar se ye jeena muhaal bhi hai mujhe.

Sawaad-e-shaam-e-safar hai jalaa jalaa sa ‘munir
khushi ke saath ajab sa malaal bhi hai mujhe. !!

Munir Niazi

Thake Logon Ko Majboori Mein Chalte Dekh Leta Hun..

Thake logon ko majboori mein chalte dekh leta hun,
main bas ki khidkiyon se ye tamaashe dekh leta hun.

Kabhi dil mein udaasi ho toh un mein ja nikalta hun,
puraane doston ko chup se baithe dekh leta hun.

Chhupaate hain bahut woh garmi-e-dil ko magar main bhi,
gul rukh par uddi rangat ke chheente dekh leta hun.

Khada hun yun kisi khaali qile ke sehan-e-veeran mein,
ki jaise main zameenon mein dafeene dekh leta hun.

Munir’ andaaza-e-qaar-e-fanaa karna ho jab mujh ko,
kisi oonchi jagah se jhuk ke neeche dekh leta hun. !!

Munir Niazi

Thi Jis Ki Justajoo Woh Haqeeqat Nahin Mili..

Thi jis ki justajoo woh haqeeqat nahin mili,
inn bastiyon mein hum ko rafaaqat nahin mili.

Ab tak hain iss gumaan mein ki hum bhi hain dahar mein,
iss weham se nijaat ki soorat nahin mili.

Rehna tha uss ke saath bahut der tak magar,
inn roz-o-shab mein mujh ko ye fursat nahin mili.

Kehna tha jis ko uss se kisi waqt mein mujhe,
iss baat ke kalaam ki mohlat nahin mili.

Kuchh din ke baad uss se juda ho gaye ‘munir
uss bewafa se apni tabeeyat nahin mili. !!

Munir Niazi

Humesha Der Kar Deta Hun Main Har Kaam Karne Mein..

Humesha der kar deta hun main har kaam karne mein.
zaroori baat kehni ho
koi waada nibhaana ho
usey aawaaz deni ho
usey waapas bulaana ho
humesha der kar deta hun main..

Madad karni ho uss ki
yaar ki dhaaras bandhaana ho
bahut hi door raaston par
kisi se milne jana ho
humesha der kar deta hun..

Badalte mausamon ki sair mein
dil ko lagaana ho
kisi ko yaad rakhna ho
kisi ko bhool jaana ho
humesha der kar deta hun main..

kisi ko maut se pehle
kisi ghum se bachna ho
haqeeqat aur thi kuch
uss ko jaa ke ye bataana ho
humesha der kar deta hun main …!!

Munir Niazi