Humare Shauq Ki Ye Inteha Thi..

Humare shauq ki ye inteha thi,
qadam rakha ki manzil rasta thi.

Bichhar ke daar se ban-ban phira woh,
hiran ko apni kastoori saza thi.

Kabhi jo khwaab tha woh pa liya hai,
magar jo kho gayi woh cheez kya thi.

Main bachpan mein khilone todta tha,
mere anjaam ki woh ibtida thi.

Mohabbat mar gayi mujh ko bhi ghum hai,
mere acchhe dinon ki aashna thi.

Jise main chhoo lun woh ho jaaye sona,
tujhe dekha toh jaana bad-dua thi.

Mareez-e-khwaab ko toh ab shifa hai,
magar duniya badi kadvi dawa thi. !!

Javed Akhtar

Humare Shauq Ki Ye Inteha Thi..
5 (100%) 1 vote

Main Zinda Hun Ye Mushtahar Kijiye..

Main zinda hun ye mushtahar kijiye,
mere qaatilon ko khabar kijiye.

Zameen sakht hai aasmaan door hai,
basar ho sake toh basar kijiye.

Sitam ke bahut se hain radd-e-amal,
zaroori nahin chashm tar kijiye.

Wahi zulm baar-e-digar hai toh phir,
wahi jurm baar-e-digar kijiye.

Qafas todna baad ki baat hai,
abhi khwaahish-e-baal-o-par kijiye. !!

Sahir Ludhianvi

Main Zinda Hun Ye Mushtahar Kijiye..
Please Rate this poetry!

Ye Zulf Agar Khul Ke Bikhar Jaaye Toh Achchha..

Ye zulf agar khul ke bikhar jaaye toh achchha,
iss raat ki taqdeer sanwar jaaye toh achchha.

Jis tarh se thodi si tere saath kati hai,
baaki bhi issi tarah guzar jaaye toh achchha.

Duniya ki nigaahon mein bhala kya hai bura kya,
ye bojh agar dil se utar jaaye toh achchha.

Waise toh tumhin ne mujhe barbaad kiya hai,
ilzaam kisi aur ke sar jaaye toh achchha. !!

Sahir Ludhianvi

Ye Zulf Agar Khul Ke Bikhar Jaaye Toh Achchha..
4.5 (90%) 2 votes

Lab Pe Paabandi Toh Hai Ehsaas Par Pehra Toh Hai..

Lab pe paabandi toh hai ehsaas par pehra toh hai,
phir bhi ahl-e-dil ko ahwaal-e-bashar kehna toh hai.

Khoon-e-aada se na ho khoon-e-shaheedon hi se ho,
kuchh na kuchh iss daur mein rang-e-chaman nikhra toh hai.

Apni ghairat bech daalen apna maslak chhod den,
rahnumaaon mein bhi kuchh logon ka ye mansha toh hai.

Hai jinhen sab se zyada daava-e-hubbul-watan,
aaj un ki wajah se hubb-e-watan ruswa toh hai.

Bujh rahe hain ek ek kar ke aqeedon ke diye,
iss andhere ka bhi lekin saamna karna toh hai.

Jhooth kyon bolen farogh-e-maslahat ke naam par,
zindagi pyaari sahi lekin humen marna toh hai. !!

Sahir Ludhianvi

Lab Pe Paabandi Toh Hai Ehsaas Par Pehra Toh Hai..
5 (100%) 1 vote

Is Taraf Se Guzre The Qaafile Bahaaron Ke..

Iss taraf se guzre the qaafile bahaaron ke,
aaj tak sulagte hain zakhm rahguzaaron ke.

Khalwaton ke shaidaai khalwaton mein khulte hain,
hum se poochh kar dekho raaz parda-daaron ke.

Gesuon ki chhanv mein dil-nawaaz chehre hain,
ya haseen dhundalkon mein phool hain bahaaron ke.

Pehle hans ke milte hain phir nazar churaate hain,
aashna-sifat hain log ajnabi dayaaron ke.

Tum ne sirf chaha hai hum ne chhoo ke dekhe hain,
pairahan ghataaon ke jism barq-paaron ke.

Shughl-e-mayy-parasti go jashn-e-namuraadi tha,
yun bhi kat gaye kuchh din tere sogwaaron ke. !!

Sahir Ludhianvi

Is Taraf Se Guzre The Qaafile Bahaaron Ke..
5 (100%) 1 vote

Ab Aayen Ya Na Aayen Idhar Poochhte Chalo..

Ab aayen ya na aayen idhar poochhte chalo,
kya chaahti hai un ki nazar poochhte chalo.

Hum se agar hai tark-e-taalluq toh kya hua,
yaaro koi toh un ki khabar poochhte chalo.

Jo khud ko keh rahe hain ki manzil shanaas hai,
un ko bhi kya khabar hai magar poochhte chalo.

Kis manzil-e-muraad ki jaanib rawaan hain hum,
aye raah-rawaan-e-khaak-basar poochhte chalo. !!

Sahir Ludhianvi

Ab Aayen Ya Na Aayen Idhar Poochhte Chalo..
5 (100%) 2 votes

Munawwar Rana – Maa – Part 5

Ab dekhiye kaun aaye janaaze ko uthaane,
yun taar toh mere sabhi beton ko milega.

Ab andhera mustaqil rehta hai iss dehleez par,
jo humari muntazir rehti thi aankhen bujh gayi.

Agar kisi ki dua mein asar nahin hota,
toh mere paas se kyon teer aa ke laut gaya.

Abhi zindaa hai maa meri mujhe kuchh bhi nahin hoga,
main jab ghar se nikalta hun dua bhi saath chalti hai.

Kahin benoor na ho jaayen woh boorhi aankhen,
ghar mein darte the khabar bhi mere bhaai dete.

Kya jaane kahan hote mere phool-se bachche,
wirse mein agar maa ki dua bhi nahin milti.

Kuchh nahin hoga toh aanchal mein chhupa legi mujhe,
maa kabhi sar pe khuli chhat nahin rahne degi.

Kadamon mein laa ke daal di sab nematen magar,
sauteli maa ko bachche se nafarat wahi rahi.

Dhnsati hui qabron ki taraf dekh liya tha,
maa baap ke chehron ki taraf dekh liya tha.

Koi dukhi ho kabhi kehna nahin padta uss se,
woh zaroorat ko talabagaar se pehchaanta hai. !!

Munawwar Rana

Munawwar Rana – Maa – Part 5
5 (100%) 1 vote