Woh Firaaq Aur Woh Wisaal Kahan..

Mirza Ghalib Poetry

Woh firaaq aur woh wisaal kahan,
woh shab-o-roz-o-maah-o-saal kahan.

Fursat-e-kaarobaar-e-shauq kise,
zauq-e-nazzaara-e jamaal kahan.

Dil toh dil woh dimaagh bhi na raha,
shor-e-sauda-e-khatt-o-khaal kahan.

Thi woh ek shakhs ke tasawwur se,
ab woh raanaayi-e-khyaal kahan.

Aisa aasaan nahin lahoo rona,
dil mein taaqat jigar mein haal kahan.

Hum se chhuta qimaar-khana e-ishq,
waan jo jaayen girah mein maal kahan.

Fikr-e-duniya mein sar khapaata hun,
main kahan aur ye wabaal kahan.

Muzmahil ho gaye qawaa ‘ghalib’
woh anaasir mein aitdaal kahan.

Bose mein woh muzaaiqa na kare,
par mujhe taaqat-e-sawaal kahan. !!

– Click here for Mirza Ghalib Poetry collection

Aaina Kyon Na Dun Ki Tamaasha Kahen Jise..

Mirza Ghalib Poetry

Aaina kyon na dun ki tamaasha kahen jise,
aisa kahan se laaun ki tujh sa kahen jise.

Hasrat ne laa rakha teri bazm-e-khyaal mein,
guldasta-e-nigaah suwaida kahen jise.

Phoonka hai kis ne gosh-e-mohabbat mein aey khuda,
afsoon-e-intezaar-e-tamanna kahen jise.

Sar par hujoom-e-dard-e-ghareebi se daaliye,
woh ek musht-e-khaak ki sehra kahen jise.

Hai chashm-e-tar mein hasarat-e-deedaar se nihaan,
shauq-e-inaan gusekhta dariya kahen jise.

Darkaar hai shiguftan-e-gul haaye aish ko,
subh-e-bahaar pumba-e-meena kahen jise.

‘Ghalib’ bura na maan jo waaiz bura kahe,
aisa bhi koi hai ki sab achchha kahen jise.

Yaa rab humen toh khwaab mein bhi mat dikhaaiyo,
ye mahshar-e-khyaal ki duniya kahen jise. !!

– Click here for Mirza Ghalib Poetry collection

Ye Na Thi Humari Qismat Ki Wisaal e Yaar Hota..

Mirza Ghalib Poetry

Ye na thi humari qismat ki wisaal-e-yaar hota,
agar aur jeete rahte yehi intezaar hota.

Tere waade par jeeye hum toh ye jaan jhooth jaana,
ki khushi se mar na jaate agar aitbaar hota.

Teri naazuki se jaana ki bandha tha ahd boda,
kabhi tu naa tod sakta agar ustuwaar hota.

Koi mere dil se poochhe tere teer-e-neem-kash ko,
ye khalish kahan se hoti jo jigar ke paar hota.

Ye kahan ki dosti hai ki bane hain dost naaseh,
koi chaarasaaz hota koi ghumgusaar hota.

Rag-e-sang se tapakta woh lahoo ki phir na thamta,
jise ghum samajh rahe ho ye agar sharaar hota.

Kahun kis se main ki kya hai shab-e-ghum buri bala hai,
mujhe kya bura tha marna agar ek baar hota.

Hue mar ke hum jo ruswa hue kyon na gharq-e-dariya,
na kabhi janaaza uthta na kahin mazaar hota.

Usey kaun dekh sakta ki yagaana hai woh yakta,
jo dui ki boo bhi hoti toh kahin do-chaar hota.

Ye masaail-e-tasawwuf ye tera bayaan ‘ghalib
tujhe hum wali samajhte jo na baada-khwaar hota. !!

–  Click here for Mirza Ghalib Poetry collection

Jaur Se Baaz Aaye Par Baaz Aayen Kya..

Mirza Ghalib Poetry

Jaur se baaz aaye par baaz aayen kya,
kehte hain hum tujh ko munh dikhlaayen kya.

Raat din gardish mein hain saat aasmaan,
ho rahega kuchh na kuchh ghabraayen kya.

Laag ho toh uss ko hum samjhen lagaav,
jab na ho kuchh bhi toh dhokha khaayen kya.

Ho liye kyon naama-bar ke saath-saath,
Yaar rab apne khat ko hum pahunchaayen kya.

Mauj-e-khoon sar se guzar hi kyon na jaaye,
aastaan-e-yaar se uth jaayen kya.

Umar bhar dekha kiye marne ki raah,
mar gaye par dekhiye dikhlaayen kya.

Poochhte hain woh ki ‘ghalib’ kaun hai?
koi batlaao ki hum batlaayen kya ? .!!

– Click here for Mirza Ghalib Poetry collection

Dil e Naadaan Tujhe Hua Kya Hai..

Mirza Ghalib Poetry

Dil-e-naadaan tujhe hua kya hai,
aakhir iss dard ki dava kya hai.

Hum hain mushtaaq aur woh bezaar,
Yaa ilaahi ye maajra kya hai.

Main bhi munh mein zabaan rakhta hun,
kaash poochho ki muddaa kya hai.

Jab ki thujh bin nahin koi maujood,
phir ye hungaama aey khuda kya hai.

Ye pari chehra log kaise hain,
ghamza-o-ishwa-o-adaa kya hai.

Shikan-e-zulf-e-ambareen kyon hai,
nigah-e-chashm-e-surma sa kya hai.

Sabza-o-gul kahan se aaye hain,
abr kya cheez hai hawa kya hai.

Hum ko un se wafa ki hai ummeed,
jo nahin jaante wafa kya hai.

Haan bhala kar tera bhala hoga,
aur darwesh ki sada kya hai.

Jaan tum par nisaar karta hun,
main nahin jaanta dua kya hai.

Maine mana ki kuchh nahin ‘ghalib’
muft haath aaye toh bura kya hai. !!

– Click here for Mirza Ghalib Poetry collection

Zikr Uss Pariwash Ka Aur Phir Bayaan Apna..

Mirza Ghalib Poetry

Zikr uss pari-wash ka aur phir bayaan apna,
ban gaya raqeeb aakhir tha jo raazdaan apna.

Mayy woh kyon bahut peete bazm-e-ghair mein yaa rab,
aaj hi hua manzoor un ko imtihaan apna.

Manzar ek bulandi par aur hum bana sakte,
arsh se udhar hota kaash ki makaan apna.

De woh jis qadar zillat hum hansi mein taalenge,
baare aashna nikla un ka paasbaan apna.

Dard-e-dil likhuN kab tak jaaun un ko dikhlaa dun,
ungliyaan figaar apni khaamaa khoon-chakaan apna.

Ghiste ghiste mit jaata aap ne abas badla,
nang-e-sajda se mere sang-e-aastaan apna.

Taa kare na gammaazi kar liya hai dushman ko,
dost ki shikaayat mein hum ne hum-zabaan apna.

Hum kahan ke daana the kis hunar mein yaktaa the,
besabab hua ‘ghalib’ dushman aasmaan apna. !!

– Click here for Mirza Ghalib Poetry collection

Har Ek Baat Pe Kehte Ho Tum Ki Tu Kya Hai..

Mirza Ghalib Poetry

Har ek baat pe kehte ho tum ki tu kya hai,
tumhin kaho ki ye andaaz-e-guftgoo kya hai.

Na shole mein ye karishma na barq mein ye adaa,
koi bataao ki woh shokh-e-tund-khoo kya hai.

Ye rashk hai ki woh hota hai hum-sukhan tum se,
wagarna khauf-e-bad-aamozi-e-adoo kya hai.

Chipak raha hai badan par lahoo se pairaahan,
humari jeb ko ab haajat-e-rafoo kya hai.

Jalaa hai jism jahan dil bhi jal gaya hoga,
kuredate ho jo ab raakh justjoo kya hai.

Ragon mein daudte phirne ke hum nahin qaayal,
jab aankh se hi na tapka toh phir lahoo kya hai.

Woh cheez jis ke liye hum ko ho bahisht azeez,
siwaaye baada-e-gulfaam-e-mushk-boo kya hai.

Piun sharaab agar khum bhi dekh lun do chaar,
ye sheesha-o-qadah-o-kooza-o-suboo kya hai.

Rahi na taaqat-e-guftaar aur agar ho bhi,
toh kis ummeed pe kahiye ki aarzoo kya hai.

Bana hai shaah ka musaahib phire hai itraata,
wagarna shehar mein ‘ghalib’ ki aabroo kya hai. !!

– Click here for Mirza Ghalib Poetry collection