Phir Dil Se Aa Rahi Hai Sada Us Gali Mein Chal..

Habib Jalib Poetry

Phir dil se aa rahi hai sadaa uss gali mein chal,
shayad mile ghazal ka pata uss gali mein chal.

Kab se nahin hua hai koi sher kaam ka,
ye sher ki nahin hai faza uss gali mein chal.

Woh baam-o-dar woh log woh ruswaaiyon ke zakhm,
hain sab ke sab azeez juda uss gali mein chal.

Uss phool ke baghair bahut jee udaas hai,
mujh ko bhi saath le ke saba uss gali mein chal.

Duniya toh chaahti hai yunhi faasle rahen,
duniya ke mashwaron pe na jaa uss gali mein chal.

Benoor-o-be-asar hai yahan ki sada-e-saaz,
tha uss sukoot mein bhi maza uss gali mein chal.

Jalib’pukaarti hain woh shola-nawaaiyaan,
ye sard rut ye sard hawa uss gali mein chal. !!

– Click Here For Habib Jalib Poetry Collection

Bahut Roshan Hai Shaam-e Ghum Humari..

Habib Jalib Poetry

Bahut roshan hai shaam-e-ghum humari,
kisi ki yaad hai humdum humari.

Ghalat hai laa-taaluq hain chaman se,
tumhare phool aur shabnam humari.

Ye palkon par naye aansoo nahin hain,
azal se aankh hai purnam humari.

Har ek lab per tabassum dekhne ki,
tamamnna kab hui hai kam humari.

kahi hai hum ne khud se bhi bahut kam,
na poochho daastan-e-ghum humari. !!

– Click Here For Habib Jalib Poetry Collection

Aey Jahaan Dekh Le Kab Se Beghar Hain Hum..

Habib Jalib Poem

Aey jahaan dekh le kab se be-ghar hain hum
ab nikal aaye hain le ke apna alam
ye muhallaat ye oonche oonche makaan
in ki buniyaad mein hai humara lahoo
kal jo mehmaan the ghar ke maalik bane
shah bhi hai adoo sheikh bhi hai adoo
kab talak hum sahen ghaasibon ke sitam
aey jahaan dekh le kab se be-ghar hain hum
ab nikal aaye hain le ke apna alam.

Itna saada na ban tujh ko maaloom hai
kaun ghere hue hai filisteen ko.

Aaj khul ke ye naara laga aey jahaan
qaatilo rahzano ye zameen chhod do
hum ko ladna hai jab tak ki dum mein hai dum
aey jahaan dekh le kab se beghar hain hum
ab nikal aaye hain le ke apna alam. !!

– Click Here For Habib Jalib Poetry, Poems  Collection

Tere Maathe Pe Jab Tak Bal Raha Hai..

Habib Jalib Poetry

Tere maathe pe jab tak bal raha hai,
ujaala aankh se ojhal raha hai.

Samaate kya nazar mein chaand taare,
tasawwur mein tera aanchal raha hai.

Teri shaan-e-taghaful ko khabar kya,
koi tere liye bekal raha hai.

Shikaayat hai ghum-e-dauran ko mujh se,
ki dil mein kyon tera ghum pal raha hai.

Taajjub hai sitam ki aandhiyon mein,
charaagh-e-dil abhi tak jal raha hai.

Lahoo royengi maghrib ki fazaayen,
badi tezi se sooraj dhal raha hai.

Zamana thak gaya ‘jalib’hi tanha,
wafa ke raaste par chal raha hai. !!

– Click Here For Habib Jalib Poetry, Poems  Collection

Teri Aankhon Ka Ajab Turfa Shaman Dekha Hai..

Habib Jalib Poetry

Teri aankhon ka ajab turfa shamaan dekha hai,
ek aalam teri jaanib nigraan dekha hai.

Kitne anwaar simat aaye hain in aankhon mein,
ek tabassum tere honthon pe rawaan dekha hai.

Hum ko aawaara-o-bekaar samajhne waalo,
tum ne kab iss but-e-kaafir ko jawaan dekha hai.

Sehan-e-gulshan mein ki anjum ki tarab-gaahon mein,
tum ko dekha hai kahin jaane kahan dekha hai.

Wahi aawaara-o-deewana-o-aashufta-mizaaj,
hum ne ‘jalib’ko sar-e-ku-e-butaan dekha hai. !!

– Click Here For Habib Jalib Poetry, Poems  Collection

Tum Se Pehle Woh Jo Ek Shakhs Yahan Takht Nasheen Tha–

Habib Jalib Poetry

Tum se pehle woh jo ek shakhs yahan takht-nasheen tha,
uss ko bhi apne khuda hone pe itna hi yaqeen tha.

Koi thehra ho jo logon ke muqaabil toh bataao,
woh kahan hain ki jinhen naaz bahut apne ta.in tha.

Aaj soye hain tah-e-khaak na jaane yahan kitne,
koi shola koi shabnam koi mahtaab-jabeen tha.

Ab woh phirte hain issi shehar mein tanha liye dil ko,
ek zamaane mein mizaaj un ka sar-e-arsh-e-barin tha.

Chhodna ghar ka humen yaad hai ‘jalib’nahin bhoole,
tha watan zehan mein apne koi zindaan toh nahin tha. !!

–  Click Here For Habib Jalib Poetry, Poems  Collection