Pareshaan Ho Ke Meri Khaak Aakhir Dil Na Ban Jaaye..

Allama Iqbal Poetry

Pareshaan ho ke meri khaak aakhir dil na ban jaaye,
jo mushkil ab hai yaa rab phir wahi mushkil na ban jaaye.

Na kar dein mujh ko majboor-e-nawa firdaus mein hooren,
mera soz-e-daroon phir garmi-e-mehfil na ban jaaye.

Kabhi chhodi hui manzil bhi yaad aati hai raahi ko,
khatak si hai jo seene mein ghum-e-manzil na ban jaaye.

Banaaya ishq ne dariya-e-naa-paida-karaan mujh ko,
ye meri khud-nigah-daari mera saahil na ban jaaye.

Kahin iss aalam-e-be-rang-o-boo mein bhi talab meri,
wahi afsaana-e-dumbaala-e-mehmil na ban jaaye.

Urooj-e-aadam-e-khaaki se anjum sehme jaate hain,
ki ye toota hua taara mah-e-kaamil na ban jaaye. !!

– Click here for Allama Iqbal Poetry collection

Aflaak Se Aata Hai Naalon Ka Jawaab Aakhir..

Allama Iqbal Poetry

Aflaak se aata hai naalon ka jawaab aakhir,
karte hain khitaab aakhir uthte hain hijab aakhir.

Ahwsal-e-mohabbat mein kuchh farq nahin aisa,
soz-o-tab-o-taab awwal soz-o-tab-o-taab aakhir.

Main tujh ko batata hun taqdeer-e-umam kya hai,
shamsheer-o-sanaa awwal taaoos-o-rabaab aakhir.

Maikhana-e-europe ke dastoor niraale hain,
laate hain suroor awwal dete hain sharaab akhir.

Kya dabdaba-e-naadir kya shaukat-e-taimoori,
ho jaate hain sab daftar gharq-e-mayy-e-naab aakhir.

Khalwat ki ghadi guzri jalwat ki ghadi aayi,
chhutne ko hai bijli se aagosh-e-sahaab aakhir.

Tha zabt bahut mushkil iss sail-e-maani ka,
keh daale qalandar ne asraar-e-kitaab aakhir. !!

– Click here for Allama Iqbal Poetry collection

Pompiye – Poem by Gulzar

Gulzar Poem

Pompiye dafan tha sadiyon se jahan
ek tehzeeb thi posheeda wahan
shehar khoda toh tawaarikh ke tukde nikle.

Dheron pathraaye hue waqt ke safhon ko ulat kar dekha
ek bhooli hui tehzeeb ke purze se bichhe the har-soo.
munjamid laave mein akde hue insaanon ke guchchhe the wahan
aag aur laave se ghabra ke jo lipte honge.

Wahi matke, wahi haandi, wahi toote piyaale
honth toote hue, latki hui mitti ki zabaanen har-soo
bhookh uss waqt bhi thi, pyaas bhi thi, pet bhi tha..

Hukmaraanon ke mehal, un ki fasilen, sikke
raaij-ul-waqt jo hathiyaar the aur un ke daste
bediyaan pattharon ki, aahani, pairon ke kade
aur ghulaamon ko jahan baandh ke rakhte the
woh pinjre bhi bahut se nikle.

Ek tehzeeb yahan dafan hai aur uss ke qareeb
ek tehzeeb rawaan hai,
jo mere waqt ki hai.

Hukmaraan bhi hain, mehal bhi hain, faslen bhi hain
jel-khaane bhi hain aur gas ke chamber bhi hain
hiroshima pe kitaaben bhi sajaa rakhi hain
bediyaan, aahani, hathkadiyaan bhi steel ki hain
aur ghulaamon ko bhi aazaadi hai, baandha nahin jaata.

Meri tehzeeb ne kitni taraqqi kar li hai …!

[ Pompiye = a city name, Pompeii

Click here for Gulzar Poetry, Poems collection

Dhota Hun Jab Main Peene Ko Uss Simtan Ke Paaon..

Mirza Ghalib Poetry

Dhota hun jab main peene ko uss simtan ke paaon,
rakhta hai zid se kheench kar baahar lagan ke paaon.

Di saadagi se jaan padun kohkan ke paaon,
haihaat kyon na toot gaye pirzan ke paaon.

Bhaage the hum bahut so ussi ki sazaa hai ye,
ho kar aseer daabte hain raahzan ke paaon.

Marham ki justaju mein phira hun jo door door,
tan se siwa figaar hain is khasta-tan ke paaon.

Allah re zauq-e-dasht-nawardi ki baad-e-marg,
hilte hain khud-ba-khud mere andar kafan ke paaon.

Hai josh-e-gul bahaar mein yaan tak ki har taraf,
udte hue ulajhte hain murgh-e-chaman ke paaon.

Shab ko kisi ke khwaab mein aaya na ho kahin,
dukhte hain aaj uss but-e-naazuk badan ke paaon.

Ghalib’ mere kalaam mein kyonkar maza na ho,
peeta hun khusro-e-shirin-sukhan ke paaon. !!

Click here for Mirza Ghalib Poetry collection

Diya Hai Dil Agar Uss Ko Bashar Hai Kya Kahiye..

Mirza Ghalib Poetry

Diya hai dil agar uss ko bashar hai kya kahiye,
hua raqeeb toh ho naamabar hai kya kahiye.

Ye zid ki aaj na aave aur aaye bin na rahe,
qaza se shikwa humein kis qadar hai kya kahiye.

Rahe hai yun gah-o-begah ki ku-e-dost ko ab,
agar na kahiye ki dushman ka ghar hai kya kahiye.

Zahe karishma ki yun de rakha hai hum ko fareb,
ki bin kahe hi unhen sab khabar hai kya kahiye.

Samajh ke karte hain baazaar mein woh pursish-e-haal,
ki ye kahe ki sar-e-rahguzar hai kya kahiye.

Tumhen nahin hai sar-e-rishta-e-wafa ka khyaal,
humare haath mein kuchh hai magar hai kya kahiye.

Unhen sawaal pe zom-e-junoon hai kyon ladiye,
humein jawaab se qat-e-nazar hai kya kahiye.

Hasad saza-e-kamaal-e-sukhan hai kya kijiye.
sitam baha-e-mataa-e-hunar hai kya kahiye.

Keha hai kis ne ki ‘ghalib’ bura nahin lekin,
siwaaye iss ke ki ashufta-sar hai kya kahiye. !!

– Click here for Mirza Ghalib Poetry collection

Hai Bas-ki Har Ek Un Ke Ishaare Mein Nishaan Aur..

Mirza Ghalib Poetry

Hai bas-ki har ek un ke ishaare mein nishaan aur,
karte hain mohabbat toh guzarta hai gumaan aur.

Ya rab woh na samjhe hain na samjhenge meri baat,
de aur dil un ko jo naa de mujh ko zubaan aur.

Abru se hai kya uss nigaah-e-naaz ko paivand,
hai teer muqarrar magar iss ki hai kamaan aur.

Tum shehar mein ho toh humein kya ghum jab uthenge,
le aayenge baazaar se ja kar dil-o-jaan aur.

Har-chand subuk-dast hue but-shikani mein,
hum hain toh abhi raah mein hai sang-e-giraan aur.

Hai khoon-e-jigar josh mein dil khol ke rota,
hote kayi deeda-e-khun-naaba-fishaan aur.

Marta hun iss aawaaz pe har chand sar ud jaaye,
jallaad ko lekin woh kahe jaayen ki haan aur.

logon ko hai khurshid-e-jahan-taab ka dhoka,
har roz dikhaata hun main ek daagh-e-nihaan aur.

Leta na agar dil tumhen deta koi dum chain,
karta jo na marta koi din aah-o-fughaan aur.

Paate nahin jab raah to chadh jaate hain naale,
rukti hai meri taba toh hoti hai rawaan aur.

Hain aur bhi duniya mein sukhan-war bahut achchhe,
kehte hain ki ‘ghalib’ ka hai andaaz-e-bayaan aur. !!

– Click here for Mirza Ghalib Poetry collection

Dil Se Teri Nigaah Jigar Tak Utar Gayi..

Mirza Ghalib Poetry

Dil se teri nigaah jigar tak utar gayi,
donon ko ek adaa mein razamand kar gayi.

Shaq ho gaya hai seena khusha lazzat-e-faraagh,
takleef-e-parda-daari-e-zakhm-e-jigar gayi.

Woh baada-e-shabaana ki sarmastiyaan kahan,
uthiye bas ab ki lazzat-e-khwaab-e-sehar gayi.

Udti phire hai khaak meri ku-e-yaar mein,
baare ab aey hawa hawas-e-baal-o-par gayi.

Dekho toh dil farebi-e-andaaz-e-naqsh-e-paa,
mauj-e-khiraam-e-yaar bhi kya gul katar gayi.

Har bul-hawas ne husn-parasti shi.aar ki,
ab aabroo-e-shewa-e-ahl-e-nazar gayi.

Nazzare ne bhi kaam kiya waan naqaab ka,
masti se har nigaah tere rukh par bikhar gayi.

Farda-o-di ka tafraqa yak baar mit gaya,
kal tum gaye ki hum pe qayaamat guzar gayi.

Maara zamaane ne ‘asadullaah khan’ tumhen,
woh walwale kahan woh jawaani kidhar gayi. !!

– Click here for Mirza Ghalib Poetry collection