Chhoota Jo Tera Haath Toh Hum Toot ke Roye..

Chhoota jo tera haath, toh hum toot ke roye
tum jo na rahe saath, toh hum toot ke roye.

Chahat ki tamanna thi aur zakhm diye tum ne
paayi jo ye saughat, toh hum toot ke roye.

Imkaan na tha door talak tajdeed-e taalluq ka
dekhe jo ye haalaat, toh hum toot ke roye.

Anjaan the hum ab tak dard ki soorat se
hui jo mulaaqaat, toh hum toot ke roye.

Jeeti thi sadaa hum ne har baazi tere saath
tanha jo sahi maat, toh hum toot ke roye

Logon ne bahut poochha sabab veeraani-e dil ka
jab ho na saki baat, toh hum toot ke roye.

Thi dhoop bahut tezz har simt judaai ki
barsi jo na barsaat, toh hum toot ke roye.

Zadd mein tha khizaaon ki ab ke dil-e barbaad
bichhde jo shajar-paat, toh hum toot ke roye.

Din bhar toh rahe chup, ki duniya ki nazar thi
bheegi jo siyaah raat, toh hum toot ke roye.

Samjha tha sadaa tujh ko apna hi koi hissa
tukdon mein bati zaat, toh hum toot ke roye.

Hum karte rahe aaj talak uss ‘chaand’ ki khwaahish
yaad aayi jo auqaat, toh hum toot ke roye .!!

Barson Ke Baad Dekha Ek Shakhs Dilruba Sa ..

Barson ke baad dekha ek shakhs dilruba sa
ab zehan mein nahin hai, par naam tha bhala sa.

Abro khinche khinche se, aankhen jhuki jhuki si
baaten ruki ruki si, lehja thaka thaka sa.

Alfaaz the ki jugnu aawaz ke safar mein
ban jaaye jungalon mein jis tarah raasta sa.

Khwaabon mein khwaab uske, yaadon mein yaad uski
neendon mein ghul gya ho jaise ki rat-jaga sa.

Pehle bhi log aaye kitne hi zindagi mein
woh har tarah se lekin auron se tha judaa sa.

Kuchh ye ki muddaton se hum bhi nahin the roye
kuchh zehar mein ghula tha ahbaab ka dilasa.

Phir yun hua ki saawan aankhon men aa base the
phir yun hua ki jaise dil bhi tha aablaa sa.

Ab sach kahen toh yaaro hum ko khabar nahin thi
ban jayega qayaamat ek waaqiya zara sa.

Tewar the be’rukhi ke, andaaz dosti ka
woh ajnabi tha lekin lagta tha aashna sa.

Hum dasht the ki dariya, hum zehar the ki amrit
naa’haq the zaam hum ko, jab woh nahin tha pyaasa.

Humne bhi usko dekha kal shaam ittefaaqan
apna bhi haal hai ab logo ‘Faraz’ ka sa .!!

– Ahmad Faraz

Kitne Aish Se Rahte Honge Kitne Itraate Honge – Jaun Eliya

Kitne aish se rahte honge, kitne itraate honge
Jaane kaise log woh honge jo usko bhaate honge .!

Shaam hue khush-bash yahan ke mere paas aa jaate hain
Mere bujhne ka nazaara karne aa jaate honge .!

Woh jo na aane wala hai na us se mujh ko matlab tha
Aane walon se kya matlab, aate hain aate honge .!

Uski yaad ki baad-e saba mein aur toh kya hota hoga
Yunhi mere baal hain bikhre aur bikhar jaate honge .!

Yaaro kuchh toh zikr karo tum uski qayamat baanhon ka
Woh jo simaTte honge un mein woh toh mar jaate honge .!

Mera saans ukhadte hi sab bain karenge royenge
Yaani mere baad bhi yaani saans liye jaate honge .!!

– Jaun Eliya

Umar Bhar Seena-e Fankaar Se Behta Hai Lahoo..

Umar bhar seena-e fankaar se behta hai lahoo,

Tab kahin jaa kar koi lafz mahak deta hai .!!

Soz Itna Toh Nava Mein Aaye..

Soz itna toh navaa mein aaye Young-Mohsin-Naqvi-his-poems-biography
uska paighaam hawa mein aaye .! 

Misl-e gul ab ke ho wehshat apni
zakhm ka rang qaba mein aaye .!

Dil mein yun chupke se utra koi
jaise jibreel “hira” mein aaye .!

Yun achaanak tujhe paaya maine
jaise taaseer Dua mein aaye .!

Chaand ne jhuk ke sitaaron se kaha
kitne insaan khalaa mein aaye .!

Haadsa zabt ka dushman hai agar
Hausla ahl-e wafa mein aaye .!

Ab toh labb khol dahan-bastaa mere
zalzala arz-o samaa mein aaye .!

Rogg kya jee ko laga hai ‘Mohsin
zehar ka naam dawa mein aaye .!!

Mohsin Naqvi Poetry Collection

Shaam ka Mausam Khyaal- O Khwaab Hua..

Sukh ka mausam khayaal-o khwaab hua
saans lena bhi ab azaab hua.

Aankhon-aankhon padha karo jazbe
chehra-chehra khuli kitaab hua.

Kaun maujon mein gholta hai lahoo
surkh’roo kis liye chanaab hua.

Roshni uske aks ki dekho
aaina shab ko aaftaab hua.

Ek falak’naaz ki mohabbat mein
main hawaaon ka hum-rakaab hua.

Adl-parwar kbhi hisaab toh kar
zulm kis kis pe be-hisaab hua.

Kiske sar par sinaa ko rashk aaya
kaun maqtal mein kaamyaab hua.

Ab ke hijraan ki dhoop mein ‘Mohsin
rang uska bhi kuchh kharaab hua .!!

Mohsin Naqvi Shayari Collection

Shaam ke Sar Par Aanchal Dekha..

Shaam ke sar par aanchal dekha
humne jalta jungal dekha.

Apni aankh mein aansoo paaye
unki aankh mein kaajal dekha.

Phool nazar mein raqsaan-raqsaan
jaane kiska aanchal dekha.

Mann ke bann mein khaak udti thi
aaj wahan par jal-thal dekha.

Jab bhi dekha hai Mohsin’ ko
tere pyaar mein paagal dekha .!!

Mohsin Naqvi Poetry Collection

Aaina Dar Aaghosh Hoon Paimaana Ba-kaf Bhi..

Aaina dar aaghosh hoon, paimaana ba-kaf bhi
aey dushman-e jaan dekh zara meri taraf bhi.

Dil shorish-e paiham hai, nazar waqf-e khamoshi
main ronaq-e toofaan bhi hoon, saahil ka sharaf bhi.

Aey dost tere baad sar-e koo-e tamanna
hum log rahe sang-e malaamat ka hadaf bhi.

Tu jins-e khirad le ke bikhar ja kahin warna
aayega koi sang-e junoon teri taraf bhi.

Mohsin’ main faqat khaak-e shifa par nahin naazan
Sajdon ko mayassar hai dar-e- shaah-e najaf bhi .!!

Mohsin Naqvi Shayari Collection

Main Zamaane ki Riwayat ka Numaainda Nahin..

Mohsin Naqvi Poetry


Main zamaane ki riwaayat ka numaainda nahin,
meri duniya mein koi amroz-o aainda nahin.

Tu bhi apne jurm ki taazeer pe hairat na kar,
main bhi apne ghar ki barbaadii pe sharminda nahin.

Main toh uske dil ki dhadkan ban gaya hoon baaraha,
woh hareef-e jaan samajhta hai ki main zinda nahin.

Ya hawa-e dehar mein pinha hai toofaanon ka zor,
ya faseel-e jism ke aasaar paainda nahin.

Aansu’on ki lehar mein behta hua moti toh hoon,
kya hua gar aapki soorat mein taabinda nahin.

Shukr hai raas aa gaya mujh ko qanaa’at ka jahaan,
shukr hai main qasr-e sultaani ka kaarinda nahin.

Yun mere ahbaab milte hain mujhe Mohsin’ yahan
jaise main is sheher-e naa-pursaan ka baashinda nahin .!!

Mohsin Naqvi Poetry Collection

Jin Par Sitam Tamaam Qafas ki Fiza ke The…

Mohsin Naqvi Shayari


Jin par sitam tamaam qafas ki fizaa ke the,
mujrim woh log apni shikast-e anaa ke the. !

Ae dasht-e khaar hum se hisaab-e karam na maang,
paanv mein aable the magar ibtedaa ke the. !

Lab pe sajaa liye the yun hi ajnabi se naam,
dil mein tamaam zakhm kisi aashna ke the. !

Patton se bhar rahe the hawaaon ki jholiyaan,
girte hue shajar bhi sakhi intehaa ke the. !

Gahre samandaron mein kahan aks-e aasmaan,
paani mein jitne rang the saare khalaa ke the. !

Ab dhool odhna bhi mayassar nahin jinhe,
waaris woh ahl-e dil kabhi arz-o samaa ke the. !

Jin se ulajh rahi thi hawaa’on ki shorishen,
Mohsin’ woh daayre toh mere naqsh-e paa ke the. !!

All Mohsin Naqvi Poetry collection