Aey Gaon Se Aane Wale Bata..

Aey gaaon se aane waale bata..

kya haal hai mere gaaon ka ?
peepal ki thandi chhaon ka ?
sharmili shokh nighaahon ka ?
un naaz bhari adaaon ka ?..

Aey gaaon se aane waale bata..

aaj-kal humare gaaon mein kaisa sawera hota hai ?
kya ab bhi un ke aangan mein phoolon ka basera hota hai ?
panchhi geet sunaate hain jab door andhera hota hai ?
un ke dil mein kya ab bhi meri yaad ka dera hota hai ?..

Aey gaaon se aane waale bata..

kya ab gaaon ki galiyon mein bachche shor machaate hain ?
pyaari pyaari baaton se sab ka dil behlaate hain ?
gudde our guddi ki shaadi bhi karwaate hain ?
aur chhutti ke din kheton mein maa – baap ka haath baTaate hain ?..

Aey gaaon se aane waale bata..

kya ab bhi humare khaito ke samaan sehaane hote hain ?
kya ab bhi jawaanon ke lab par waise taraane hote hain ?
hum khel jo khela karte the, wahi khel puraane hote hain ?..

Aey gaaon se aane waale bata..
kya ab bhi gaaon ki naariyan paani bharne jaati hain ?
apne sundar pairon ki paayal bhi chhankaati hain ?
sab sakhiyaan ek-dooji ko dil ka haal sunaati hain ?
aur apne naazuk saron par teen – chaar ghade uthaati hain ?

Aey gaaon se aane waale bata..

kuchh toh mujh ko haal suna meri mehbooba matwaali ka..
jheel si jis ki aankhen thi,naagin zulfon waali ka..
phool sa jis ka chehra tha, maasoom si bholi – bhali ka..
jo pawan ke ishq mein paagal thi uss paagal dil waali ka..
kya woh ab bhi takti hai meri raah ???

Aey gaaon se aane waale bata….

Yaad Hai Shadi Mein Bhi Hungama e Ya Rab Mujhe..

Mirza Ghalib Poetry

Yaad hai shaadi mein bhi hungama-e-ya-rab mujhe,
subha-e-zaahid hua hai khanda zer-e-lab mujhe.

Hai kushaad-e-khaatir-e-wa-basta dar rahn-e-sukhan,
tha tilism-e-qufl-e-abjad khaana-e-maktab mujhe.

Yaa rab iss aashuftagi ki daad kis se chaahiye,
rashk aasaaish pe hai zindaaniyon ki ab mujhe.

Taba hai mushtaaq-e-lazzat-ha-e-hasrat kya karun,
aarzoo se hai shikast-e-aarzoo matlab mujhe.

Dil laga kar aap bhi ‘ghalib’ mujhi se ho gaye,
ishq se aate the maane mirza saahib mujhe. !!

Mirza Ghalib

Warasta Us Se Hain Ki Mohabbat Hi Kyon Na Ho,,

Mirza Ghalib Poetry

Waarasta uss se hain ki mohabbat hi kyon na ho,
keeje humare saath adaawat hi kyon na ho.

Chhoda na mujh mein zof ne rang ikhtilaat ka,
hai dil pe baar naqsh-e-mohabbat hi kyon na ho.

Hai mujh ko tujh se tazkira-e-ghair ka gila,
har-chand bar-sabil-e-shikaayat hi kyon na ho.

Paida hui hai kehte hain har dard ki dawaa,
yun ho toh chaara-e-ghum-e-ulfat hi kyon na ho.

Daala na bekasi ne kisi se muaamla,
apne se kheenchta hun khajaalat hi kyon na ho.

Hai aadmi bajaa-e-khud ek mahshar-e-khyaal,
hum anjuman samajhte hain khalwat hi kyon na ho.

Hungama-e-zabuni-e-himmat hai infiaal,
haasil na kije dahr se ibrat hi kyon na ho.

Waarastagi bahaana-e-begaangi nahin,
apne se kar na ghair se wehshat hi kyon na ho.

MiTta hai faut-e-fursat-e-hasti ka ghum koi,
umr-e-aziz sarf-e-ibaadat hi kyon na ho.

Uss fitna-khu ke dar se ab uthte nahin ‘asad
uss mein humare sar pe qayaamat hi kyon na ho. !!

Mirza Ghalib

Yak-Zarra e Zameen Nahin Bekaar Baagh Ka..

Mirza Ghalib Poetry

Yak-zarra-e-zameen nahin bekaar baagh ka,
yan jaada bhi fatila hai laale ke daagh ka.

Be-mayy kise hai taaqat-e-aashob-e-aagahi,
kheencha hai ajz-e-hausla ne khat ayaagh ka.

Bulbul ke kaarobaar pe hain khanda-ha-e-gul,
kehte hain jis ko ishq khalal hai dimaagh ka.

Taaza nahin hai nashsha-e-fikr-e-sukhan mujhe,
tiryaaki-e-qadeem hun dud-e-charaagh ka.

Sau baar band-e-ishq se aazaad hum hue,
par kya karen ki dil hi adoo hai faraagh ka.

Be-khoon-e-dil hai chashm mein mauj-e-nigah ghubaar,
ye maikada kharaab hai mayy ke suraagh ka.

Baagh-e-shagufta tera bisaat-e-nashaat-e-dil,
abr-e-bahaar khum-kada kis ke dimaagh ka. !!

Click  here for read all  Mirza Ghalib Poetry Collection

Woh Aa Ke Khwaab Mein Taskeen e Iztiraab Toh De..

Mirza Ghalib Poetry

Woh aa ke khwaab mein taskeen-e-iztiraab toh de,
wale mujhe tapish-e-dil majaal-e-khwaab toh de.

Kare hai qatl lagaawat mein tera ro dena,
teri tarah koi tegh-e-nigah ko aab toh de.

Dikha ke jumbish-e-lab hi tamaam kar hum ko,
na de jo bosa toh munh se kahin jawaab toh de.

Pila de ouk se saaqi jo hum se nafrat hai,
pyala gar nahin deta na de sharaab toh de.

Asad’ khushi se mere haath paanv phuul gaye,
kaha jo uss ne zara mere paanv daab toh de.

Ye kaun kahwe hai aabaad kar humen lekin,
kabhi zamaana muraad-e-dil-e-kharaab toh de. !!

– Click  here for read all  Mirza Ghalib Poetry Collection

Zakhm Par Chhidken Kahan Tiflan-e-Beparwa Namak..

Mirza Ghalib Poetry

Zakhm par chhidken kahan tiflaan-e-be-parwa namak,
kya maza hota agar patthar mein bhi hota namak.

Gard-e-raah-e-yaar hai saamaan-e-naaz-e-zakhm-e-dil,
warna hota hai jahan men kis qadar paida namak.

Mujh ko arzaani rahe tujh ko mubaarak ho jyun,
naala-e-bulbul ka dard aur khanda-e-gul ka namak.

Shor-e-jaulaan tha kanaar-e-bahr par kis ka ki aaj,
gard-e-saahil hai ba-zakhm-e-mauja-e-dariya namak.

Daad deta hai mere zakhm-e-jigar ki waah waah,
yaad karta hai mujhe dekhe hai woh jis ja namak.

Chhod kar jaana tan-e-majrooh-e-aashiq haif hai,
dil talab karta hai zakhm aur maange hain aaza namak.

Ghair ki minnat na khinchunga pai-e-taufir-e-dard,
zakhm misl-e-khanda-e-qaatil hai sar-taa-paa namak.

Yaad hain ‘ghalib’ tujhe woh din ki wajd-e-zauq mein,
zakhm se girta toh main palkon se chunta tha namak. !!

– Click  here for read all  Mirza Ghalib Poetry Collection