Home / Zakhm Shayari (page 2)

Zakhm Shayari

Mere Ashkon Ne Kayi Aankhon Mein Jal Thal Kar Diya..

Mere ashkon ne kayi aankhon mein jal thal kar diya,
ek paagal ne bahut logon ko paagal kar diya.

Apni palkon par sajaa kar mere aansoo aap ne,
raaste ki dhool ko aankhon ka kaajal kar diya.

Maine dil de kar usey ki thi wafa ki ibtida,
uss ne dhokha de ke ye qissa mukammal kar diya.

Ye hawaayen kab nigaahen pher lein kis ko khabar,
shohraton ka takht jab toota toh paidal kar diya.

Devtaaon aur khudaaon ki lagaayi aag ne,
dekhte hi dekhte basti ko jungle kar diya.

Zakhm ki soorat nazar aate hain chehron ke nuqoosh,
hum ne aainon ko tehzeebon ka maqtal kar diya.

Shehar mein charcha hai aakhir aisi ladki kaun hai,
jis ne achchhe-khaase ek shaayar ko paagal kar diya. !!

Rahat Indori

Haath Khaali Hain Tere Shehar Se Jaate Jaate..

Haath khaali hain tere shehar se jaate jaate,
jaan hoti toh meri jaan lutaate jaate.

Ab toh har haath ka patthar humen pehchaanta hai,
umar guzri hai tere shehar mein aate jaate.

Ab ke mayoos hua yaaron ko rukhsat kar ke,
jaa rahe the toh koi zakhm lagaate jaate.

Rengne ki bhi ijaazat nahin hum ko warna,
hum jidhar jaate naye phool khilaate jaate.

Main toh jalte hue sehraaon ka ek patthar tha,
tum toh dariya the meri pyaas bujhaate jaate.

Mujh ko rone ka saleeqa bhi nahin hai shayad,
log hanste hain mujhe dekh ke aate jaate.

Hum se pehle bhi musaafir kayi guzre honge,
kam se kam raah ke patthar toh hataate jaate. !!

Rahat Indori

Zindagi Ko Zakhm Ki Lazzat Se Mat Mahroom Kar..

Zindagi ko zakhm ki lazzat se mat mahroom kar,
raaste ke pattharon se khairiyat maloom kar.

Toot kar bikhri hui talwaar ke tukde samett,
aur apne haar jaane ka sabab maloom kar.

Jaagti aankhon ke khwaabon ko ghazal ka naam de,
raat bhar ki karwaton ka zaaiqa manzoom kar.

Shaam tak laut aaunga haathon ka khaali-pan liye,
aaj phir nikla hun main ghar se hatheli choom kar.

Mat sikha lahje ko apni barchhiyon ke paintare,
zinda rehna hai toh lahje ko zara masoom kar. !!

Rahat Indori

Maula Ye Tamanna Hai Ki Jab Jaan Se Jaaun..

Maula ye tamanna hai ki jab jaan se jaaun,
jis shaan se aaya hun usii shaan se jaaun.

Bachchon ki tarha pedd ki shaakhon se main kudoon,
chidiyon ki tarha udd ke main khalihaan se jaaun.

Har lafz mehakne lage likha hua mera,
main lipta hua yaadon ke lobaan se jaaun.

Kya sookhe hue phool ki qismat ka bharosa,
maloom nahin kab tere guldaan se jaaun.

Darbaar mein tere mujhe kya rokega koi,
laanat hai agar poochh ke darbaan se jaaun.

Mujh mein koi veeraana bhi aabaad hai shayed,
har saans ne poochha tha biyabaan se jaaun.

Zinda mujhe dekhegi toh maa cheekh uthegi,
kya zakhm liye peeth pe maidaan se jaaun. !!

Munawwar Rana 

Ek Zakhmi Parinde Ki Tarha Jaal Mein Hum Hain..

Ek zakhmi parinde ki tarha jaal mein hum hain,
aye ishq abhi tak tere janjaal mein hum hain.

Maa khwaab mein aa kar ye bata jati hai har roz,
boseeda si odhi hui ek shaal mein hum hain.

Hanste hue hontho ne bharam rakha humara,
woh dekhne aaya tha ki kis haal mein hum hain.

Ab aap ki marzi hai sambhaalen na sambhaalen,
khushbu ki tarha aap ke rumaal mein hum hain.

Main phoot ke rone laga jab maut ke dar se,
neki ne keha naama-e amaal mein hum hain.

Hum thak ke kahin baithne waale nahin hargiz.
ek hirni ki langdaati hui chaal mein hum hain.

Hum ne bhi sanwaare hain bahut gesu-e urdu,
dilli mein agar aap hain, bangaal mein hum hain. !!

Munawwar Rana

Aaye Kuchh Abr Kuchh Sharaab Aaye..

Aaye kuchh abr kuchh sharaab aaye,
uss ke baad aaye jo azaab aaye.

Baam-e meena se mahtaab utre,
dasht-e saaqi mein aaftaab aaye.

Har ragg-e khoon mein phir charaagan ho,
saamne phir woh behisaab aaye.

Umar ke har waraq pe dil ki nazar,
teri mehr-o wafa ke baab aaye.

Kar raha tha ghum-e jahan ka hisaab,
aaj tum yaad behisaab aaye.

Na gayi tere ghum ki sardaari,
dil mein yun roz inqilaab aaye.

Jal uthe bazm-e ghair ke dar-o baam,
jab bhi hum khanumaan-kharaab aaye.

Iss tarah apni khamoshi goonji,
goya har samt se jawaab aaye.

Faiz’ thi raah sar-ba-sar manzil,
hum jahan pahunche kaamyaab aaye. !!

:  Faiz Ahmed Faiz

Bahut Paani Barasta Hai Toh Mitti Baith Jaati Hai..

saddest-weeping girl

Bahut paani barasta hai toh mitti baith jaati hai,
na roya kar bahut rone se chhaati baith jaati hai.

Bade budhe kuwen mein nekiyan kyon phenk aate hain,
kuwen mein chhup ke aakhir kyon ye neki baith jaati hai.?

Ye hi mousam tha jab nange badan chhat par tahalte the,
ye hi mousam hai ab seene mein sardi baith jaati hai.

Chalo maana ki shehnaai masarrath ki nishaani hai,
magar woh shakhs jiski aake beti baith jaati hai.?

Naqaab ulte hue jab bhi chaman se woh guzarta hai,
samajh kar phool uske labb pe titali baith jaati hai.

Siyaasat nafraton ka zakhm bharne hi nahi deti,
jahan bharne pe aata hai toh makhhi baith jaati hai.

Main dushman hi sahi aawaaz de mujh ko mohabbat se,
saleeqe se bitha kar dekh haddi baith jaati hai. !

Munawwar Rana

Raat Ki Zulfen Barham Barham..

Sad_ quotes_boy_face_girl_images_poetry

 

 

 

 

 

 

 

Raat ki zulfein barham barham,
dard ki lau hai madham madham. 

Mere kisse galiyan galiyan,
tera charcha aalam aalam. 

Ishq ki raaten patthar patthar,
husn ki baaten resham resham. 

Ek jaza hai jannat jannat,
ek khata hai aadam aadam. 

Ek azaab hai basti basti,
ek sada hai maatam maatam. 

Hijr ke lamhe zakhmi zakhmi,
uss ki yaaden marham marham. !!

Mohsin Naqvi

Tanha Tanha Si Raat Aur Tanha Tanha Se Hum..

poetry one

Tanha tanha si raat aur tanha-tanha se hum,
afsurda afsurda yaaden bheega bheega mousam.

Sookhe patton ka shor, andhere ki sargoshi ,
dhadkan ki aahat, qismat se apne shikwe.

Tere ehsaas ka atoot bandhan, tere saath guzre pal,
tere laut aane ki umeeden, tere raaste pe nazar.

Lamha lamha raat ka dhalna, pal pal apni aas ka tootna ,
dil ke zakhmon ka gehra hona.

Phir tanha tanha si raat aur tanha tanha se hum …!