Home / Yaad Shayari (page 4)

Yaad Shayari

find here all type heart touching yaad related shayari, for facebook status update and tweets.

Waqt Se Kahiyo Zara Kam Kam Chale..

Waqt se kahiyo zara kam kam chale,
kaun yaad aaya hai aansoo tham chale.

Dum-ba-khud kyon hai khizan ki saltanat,
koi jhonka koi mauj-e-ghum chale.

Chaar soo baajen palon ki paayalen,
iss tarah raqqaasa-e-aalam chale.

Der kya hai aane waale mausamo,
din guzarte jaa rahe hain hum chale.

Kis ko fikar-e-gumbad-e-qasr-habaab
aabjoo paiham chale paiham chale. !!

Munir Niazi

Sun Bastiyon Ka Haal Jo Had Se Guzar Gayi..

Sun bastiyon ka haal jo had se guzar gayi,
un ummaton ka zikar jo raaston mein mar gayi.

Kar yaad un dinon ko ki aabaad thi yahan,
galiyan jo khaak-o khoon ki dahshat se bhar gayi.

Sarsar ki zadd mein aaye hue baam-o-dar ko dekh,
kaisi hawaayen kaisa nagar sard kar gayi.

Kya baab the yahan jo sadaa se nahin khule,
kaisi duaayen thi jo yahan beasar gayi.

Tanha ujaad burjon mein phirta hai toh ‘munir
woh zar-fishaaniyan tere rukh ki kidhar gayi. !!

Munir Niazi

Raat Itni Jaa Chuki Hai Aur Sona Hai Abhi..

Raat itni jaa chuki hai aur sona hai abhi,
iss nagar mein ek khushi ka khwaab bona hai abhi.

Kyon diya dil uss buut-e kamsin ko aise waqt mein,
dil si shayy jis ke liye bas ek khilona hai abhi.

Aisi yaadon mein ghire hain jin se kuchh haasil nahin,
aur kitna waqt un yaadon mein khona hai abhi.

Jo hua hona hi tha so ho gaya hai dosto,
daagh iss ehd-e sitam ka dil se dhona hai abhi.

Hum ne khilte dekhna hai phir khayabaan-e bahaar,
shehar ke ataraf ki mitti mein sona hai abhi.

Baith jaayen saaya-e-daamaan-e-ahmad mein ‘munir
aur phir sochen woh baaten jin ko hona hai abhi. !!

Munir Niazi

Imtihaan Hum Ne Diye Iss Daar-e-Faani Mein Bahut..

Imtihaan hum ne diye iss daar-e-faani mein bahut,
ranj kheenche hum ne apni la-makaani mein bahut.

Woh nahin uss sa toh hai khwaab-e-bahaar-e-jaawedaan,
asal ki khushboo udi hai uss ke saani mein bahut.

Raat din ke aane jaane mein ye sona jaagna,
fikar walon ko pate hain iss nishaani mein bahut.

Koyalen kookin bahut deewaar-e-gulshan ki taraf,
chaand damka hauz ke shaffaf paani mein bahut.

Uss ko kya yaaden thi kya aur kis jagah par rah gayi,
tez hai dariya-e-dil apni rawaani mein bahut.

Aaj uss mehfil mein tujh ko bolte dekha ‘munir
toh ki jo mashHoor tha yun be-zubaani mein bahut. !!

Munir Niazi

Ashk-e-rawan Ki Nehar Hai Aur Hum Hain Dosto..

Ashk-e-rawan ki nehar hai aur hum hain dosto,
uss bewafa ka shehar hai aur hum hain dosto.

Ye ajnabi si manzilen aur raftagaan ki yaad,
tanhaiyon ka zehar hai aur hum hain dosto.

Laayi hai ab uda ke gaye mausamon ki baas,
barkha ke rutt ka qahar hai aur hum hain dosto.

Phirte hain misl-e-mauj-e-hawa shehar shehar mein,
aawaargi ki lehar hai aur hum hain dosto.

Shaam-e-aalam dhali toh chali dard ki hawa,
raaton ka pichhla pehar hai aur hum hain dosto.

Aankhon mein udd rahi hai luti mehfilon ki dhool,
ibrat saraa-e dahar hai aur hum hain dosto. !!

Munir Niazi

Aa Gayi Yaad Shaam Dhalte Hi..

Aa gayi yaad shaam dhalte hi,
bujh gaya dil chiraagh jalte hi.

Khul gaye shehar-e-ghum ke darwaaze,
ek zaraa si hawaa ke chalte hi.

Kaun tha tu ki phir na dekha tujhe,
mit gaya khwaab aankh malte hi.

Tu bhi jaise badal sa jata hai,
aks-e-deewaar ke badalte hi.

Khoon sa lag gaya hai haathon mein,
chadh gaya zehar gul masalte hi. !!

Munir Niazi

Meri Saari Zindagi Ko Be-samar Uss Ne Kiya..

Meri saari zindagi ko be-samar uss ne kiya,
umar meri thi magar uss ko basar uss ne kiya.

Main bahut kamzor tha iss mulk mein hijrat ke baad,
par mujhe iss mulk mein kamzor-tar uss ne kiya.

Rehbar mera bana gumraah karne ke liye,
mujh ko seedhe raaste se dar-ba-dar uss ne kiya.

Shehar mein woh mo’tabar meri gawaahi se hua,
phir mujhe iss shehar mein na-mo’tabar uss ne kiya.

Shehar ko barbaad kar ke rakh diya uss ne ‘munir
shehar par ye zulm mere naam par uss ne kiya. !!

Munir Niazi

Main Dehshat-gard Tha Marne Pe Beta Bol Sakta Hai..

Main dehshat-gard tha marne pe beta bol sakta hai,
hukumat ke ishaare pe toh murda bol sakta hai.

Yahan par nafraton ne kaise kaise gul khilaaye hain,
luti asmat bata degi, dupatta bol sakta hai.

Hukumat ki tawajjo chaahti hai ye jali basti,
adaalat poochhna chaahe toh malaba bol sakta hai.

Kayi chehre abhi tak munh-zabaani yaad hain iss ko,
kahin tum poochh mat lena, ye goonga bol sakta hai.

Adaalat mein gawaahi ke liye laashen nahin aati,
woh aankhen bujh chuki hain phir bhi chashma bol sakta hai.

Bahut si kursiyaan iss mulk mein laashon pe rakhi hain,
ye woh sach hai jise jhoothe se jhootha bol sakta hai.

Siyaasat ki kasauti par parakhiye mat wafadaari,
kisi din inteqaaman mera gussa bol sakta hai. !!

Munawwar Rana

Mujhe De Rahen Hain Tasalliyaan Woh Har Ek Taaza Payaam Se..

Mujhe de rahen hain tasalliyaan woh har ek taaza payaam se,
kabhi aa ke manzar-e-aam par, kabhi hat ke manzar-e-aam se.

Na gharaz kisi se na wasta, mujhe kaam apne hi kaam se
tere zikr se, teri fikr se, teri yaad se, tere naam se.

Mere saaqiya, mere saaqiya, tujhe marhaba, tujhe marhaba
tu pilaaye ja, tu pilaaye ja, issi chashm-e-jaam-ba-jaam se.

Teri subah-o-aish hai kya bala, tujhe aye falak jo ho hausla
kabhi kar le aa ke muqaabla ghum-e-hijr-e-yaar ki shaam se. !!

Jigar Moradabadi

Bujhi Hui Shama Ka Dhuaan Hun Aur Apne Markaz Ko Jaa Raha Hun..

Bujhi hui shama ka dhuaan hun aur apne markaz ko jaa raha hun,
ke dil ki hasti toh mit chuki hai ab apni hasti mita raha hun.

Mohabbat insaan ki hai fitrat kaha hai inqaa ne kar ke ulfat,
woh aur bhi yaad aa raha hai main uss ko jitna bhula raha hun.

Ye waqt hai mujh pe bandagi ka jise kaho sajda kar lun warna,
azal se taab-e-afreenat mein aap apna Khuda raha hun.

Zabaan pe labaik har nafas mein zameen pe sajde hain har qadam par,
chala hun yun buutkade ko naaseh, ke jaise kaabe ko ja raha hun. !!

Jigar Moradabadi