Home / Tanhaai shayari (page 2)

Tanhaai shayari

Tanha Tanha Dukh Jhelenge Mehfil Mehfil Gaayenge..

Tanha tanha dukh jhelenge mehfil mehfil gaayenge,
jab tak aansoo paas rahenge tab tak geet sunaayenge.

Tum jo socho woh tum jaano hum toh apni kehte hain,
der na karna ghar aane mein warna ghar kho jaayenge.

Bachchon ke chhote haathon ko chaand sitaare chhoone do,
chaar kitaaben padh kar ye bhi hum jaise ho jaayenge.

Achchhi soorat waale saare patthar dil hon mumkin hai,
hum toh uss din raaye denge jis din dhokha khaayenge.

Kin raahon se safar hai aasaan kaun sa rasta mushkil hai,
hum bhi jab thak kar baithenge auron ko samjhaayenge. !!

Nida Fazli

Tanha Tanha Dukh Jhelenge Mehfil Mehfil Gaayenge..
Please Rate this poetry!

Ek Naql Tujhe Bhi Bhejunga..

Ek naql tujhe bhi bhejunga,
yeh soch ke hi tanhaai ke neeche kaarban paper rakh ke main,
oonchi oonchi aawaaz mein baaten karta hun..

Alfaaz utar aate hain kaaghaz par lekin,
aawaaz ki shakl utarti nahin..
raaton ki siyaahi dikhti hai. !!

Gulzar

Ek Naql Tujhe Bhi Bhejunga..
Please Rate this poetry!

Dhoop Nikli Din Suhaane Ho Gaye..

Dhoop nikli din suhaane ho gaye,
chaand ke sab rang pheeke ho gaye.

Kya tamasha hai ki beayyaam-e-gul,
tanhaiyon ke haath peele ho gaye.

Iss qadar roya hun teri yaad mein,
aaine aankhon ke dhundle ho gaye.

Hum bhala chup rahne wale the kahin,
haan magar halaat aise ho gaye.

Ab toh khush ho jaayen arbaab-e-hawas,
jaise woh the hum bhi waise ho gaye.

Husn ab hungama-aara ho toh ho,
ishq ke daave toh jhoothe ho gaye.

Aye sukoot-e-shaam-e-ghum ye kya hua,
kya woh sab beemaar achchhe ho gaye.

Dil ko tere ghum ne phir aawaaz di,
kab ke bichhde phir ikatthe ho gaye.

Aao ‘nasir hum bhi apne ghar chalen,
band iss ghar ke dareeche ho gaye. !!

Nasir Kazmi

Dhoop Nikli Din Suhaane Ho Gaye..
5 (100%) 1 vote

Ashk-e-rawan Ki Nehar Hai Aur Hum Hain Dosto..

Ashk-e-rawan ki nehar hai aur hum hain dosto,
uss bewafa ka shehar hai aur hum hain dosto.

Ye ajnabi si manzilen aur raftagaan ki yaad,
tanhaiyon ka zehar hai aur hum hain dosto.

Laayi hai ab uda ke gaye mausamon ki baas,
barkha ke rutt ka qahar hai aur hum hain dosto.

Phirte hain misl-e-mauj-e-hawa shehar shehar mein,
aawaargi ki lehar hai aur hum hain dosto.

Shaam-e-aalam dhali toh chali dard ki hawa,
raaton ka pichhla pehar hai aur hum hain dosto.

Aankhon mein udd rahi hai luti mehfilon ki dhool,
ibrat saraa-e dahar hai aur hum hain dosto. !!

Munir Niazi

Ashk-e-rawan Ki Nehar Hai Aur Hum Hain Dosto..
5 (100%) 1 vote

Main Kab Kehta Hun Woh Acchha Bahut Hai..

Main kab kehta hun woh acchha bahut hai,
magar uss ne mujhe chaaha bahut hai.

Khuda iss shehar ko mehfooz rakhe,
ye bachchon ki tarah hansta bahut hai.

Main tujh se roz milna chaahta hun,
magar iss raah mein khatra bahut hai.

Mera dil baarishon mein phool jaisa,
ye bachcha raat mein rota bahut hai.

Isey aansoo ka ek qatra na samjho,
kuaan hai aur ye gehra bahut hai.

Usey shohrat ne tanha kar diya hai
Samandar hai magar pyaasa bahut hai

Main ek lamhe mein sadiyaan dekhta hun,
tumhaare saath ek lamha bahut hai.

Mera hansna zaroori ho gaya hai,
yahan har shakhs sanjeeda bahut hai. !!

Bashir Badr

Main Kab Kehta Hun Woh Acchha Bahut Hai..
4 (80%) 4 votes

Kabhi Toh Aasmaan Se Chaand Utare Jaam Ho Jaye..

Sad_boy_man_in_evening_in_thoughts_memories_shayari_poetry

Kabhi toh aasmaan se chaand utare jaam ho jaye,
tumhare naam ki ek khoobsurat shaam ho jaye.

Humara dil sawere ka sunehra jaam ho jaye,
charaaghon ki tarah aankhen jalen jab shaam ho jaye.

Ajab halaat the yun dil ka sauda ho gaya aakhir,
mohabbat ki haweli jis tarah neelaam ho jaye.

Samandar ke safar mein iss tarah aawaaz do hum ko,
hawaayen tez hon aur kashtiyon mein shaam ho jaye.

Main khud bhi ehtiyaatan uss gali se kam guzarta hun,
koi masoom kyon mere liye badnaam ho jaye.

Mujhe maloom hai uss ka thikaana phir kahan hoga,
parinda aasmaan chhoone mein jab nakaam ho jaye.

Ujaale apni yaadon ke humare saath rahne do,
na jaane kis gali mein zindagi ki shaam ho jaye. !!

Bashir Badr

Kabhi Toh Aasmaan Se Chaand Utare Jaam Ho Jaye..
5 (100%) 3 votes

Parakhna Mat Parakhne Mein Koi Apna Nahin Rehta..

Sad_serious_girl_women_at_beach_shayari_poetry

Parakhna mat parakhne mein koi apna nahin rehta,
kisi bhi aaine mein der tak chehra nahin rehta.

Bade logon se milne mein humesha faasla rakhna,
jahan dariya samandar se mile dariya nahin rehta.

Hazaaron sher mere so gaye kaaghaz ki qabron mein,
ajab maa hun koi baccha mera zinda nahin rehta.

Tumhara shehar toh bilkul naye andaaz wala hai,
humare shehar mein bhi koi hum sa nahin rehta.

Mohabbat ek khushboo hai humesha saath chalti hai,
koi insaan tanhaai mein bhi tanha nahin rehta.

Koi baadal hare mausam ka phir elaan karta hai,
khizan ke baagh mein jab ek bhi patta nahin rehta. !!

Bashir Badr

Parakhna Mat Parakhne Mein Koi Apna Nahin Rehta..
4.8 (96%) 5 votes