Home / Tanhaai shayari (page 10)

Tanhaai shayari

December Phir Udaas Hai..

December Phir Udaas Hai..

Ajnabi Si Raahon Mein Door Tak..
Nigaahon Mein Be-Rukhi Ka Mausam Hai.
Aaj Phir Nigaahon Ko, Beete Pal Ki Pyaas Hai.
Phir Reha Hun Dar-Ba-dar Mojzey Ki Aas Hai..
Aisa Lagta Hai Jaise..

December Phir Udaas Hai..

Baat Toh Kare Koi,
Saath Toh Chale Koi,
Khaamoshi Ka Pehra Hai,
Zakhm Dil Ka Gehra Hai,
Kisi Bahut Apne Ki,
Ab Mujhe Talaash Hai.
Aisa Lagta Hai Jaise..

December Phir Udaas Hai …!

 

Ab Ke Tajdeed-e Wafa Ka Nahi Imkaan Janaan..

Ab ke tajdeed-e-wafa* ka nahi imkaan* janaa,
yaad kya tujh ko dilaayen tera paimaan janaa.

Yun hi mausam ki adaa dekh ke yaad aaya hai,
kis qadar jald badal jaate hain insaan janaa.

Zindagi teri ataa thi so tere naam ki hai,
hum ne jaise bhi basar ki tera ehsaan janaan.

Dil ye kehta hai ki shayad hai fasurda* tu bhi,
dil ki kya baat karein dil toh hai nadaan janaan.

Awwal awwal ki mohabbat ke nashe yaad toh kar,
be-piye bhi tera chehra tha gulishtaan janaan.

Aakhir aakhir toh ye aalam hai ki ab hosh nahi,
ragg-e meena sulag uthi ki ragg-e-jaan janaan.

Muddaton se yahi aalam na tawaqqo na umeed,
dil pukaare hi chala jata hai janaan janaan.

Hum bhi kya sada the hum ne bhi samajh rakha tha,
ghum-e-dauran se juda hai ghum-e-janaan janaan.

Ab ke kuchh aisi saji mehfil-e-yaraan janaan,
sar-ba-zaanu hai koi sar-ba-girebaan janaan.

Har koi apni hi aawaaz se kaanp uthta hai,
har koi apne hi saaye se hiraasaan janaan.

Jis ko dekho wahi zanzeer-ba-paa lagta hai,
shehar ka shehar hua daakhil-e-zindaan janaan.

Ab tera zikar bhi ghazal mein shayad hi aaye,
aur se aur hue dard ke unwaan janaan.

Hum ki roothi hui rutt ko bhi mana lete the,
hum ne dekha hi na tha mausam-e-hijraan janaa.

Hosh aaya toh sabhi khwaab the raiza raiza,
jaise udte hue auraaq-e-pareshaan* janaa. !!

*[ Tajdeed-e-wafa=Renewal Of Faith,
Imkaan=possibility , Fasurda=Disappointed
Auraaq-e-pareshaan=scattered pages ]

 

Tere Badan Se Jo Chhu Kar Idhar Bhi Aata Hai..

Tere badan se jo chhu kar idhar bhi aata hai,
misaal-e rang woh jhaunka nazar bhi aata hai.

Tamaam shab jahan jalta hai ek udaas diya,
hawa ki raah mein ek aisa ghar bhi aata hai.

Woh mujhe toot ke chaahega chhod jaayega,
mujhe khabar thi usey ye hunar bhi aata hai.

Ujaad bann mein utarta hai ek jugnu,
hawa ke saath koi humsafar bhi aata hai.

wafa ki kaun si manzil pe usne chhoda tha,
ki woh toh yaad humein bhool kar bhi aata hai.

Jahan lahoo ke samundar ki hadd theharti hai,
wahin jazeera-e-laal-o-gauhar* bhi aata hai.

Chale jo zikar farishton ki paarsaai* ka,
toh zer-e-behas* maqaam-e-bashar* bhi aata hai.

Abhi sinaan* ko sambhaale rahein aduu mere,
ki un safon* mein mera sar bhi aata hai.

Kabhi kabhi mujhe milne bulandiyon se,
shua-e-subh* ki soorat utar bhi aata hai.

Isiliye main kisi shab na so saka ‘Mohsin
woh mehtaab kabhi baam* par bhi aata hai. !!

*[Jazeera-e-laal-o-gauhar=an island of rubies and pearls,
Paarsaai=holiness, zer-e-behas=under discussion,
Maqaam-e-bashar=place of human, baam=tarace
Sinaan=sword, Safon=lines, Shua-e-subh=ray of morning]

Mohsin Naqvi

Ye Keh Gaye Hain Musaafir Lute Gharon Wale..

Ye keh gaye hain musaafir lute gharon wale,
darein hawa se parinde khule paron wale.

Ye mere dil ki hawas dasht-e bekraan jaisi,
woh tere aankh ke tevar samundaron wale.

Hawa ke haath mein kaase* hain zard patton ke,
kahan gaye woh sakhi sabz chaadron wale.

Kahan milenge woh agle din’on ke shehzaade,
pehan ke tan pe labaade gadaagaron* wale.

Pahaadiyon mein ghire ye bujhe bujhe raaste,
kabhi idhar se guzarte the lashkaron wale.

Unhi pe ho kabhi naazil* azaab* aag azal*,
wahi nagar kabhi thehren payambaron* wale.

Tere supurad karun aaine muqaddar ke,
idhar toh aa mere khush-rang pattharon wale.

Kisi ko dekh ke chup chup se kyon hue ‘mohsin
kahan gaye woh iraade sukhan’waron wale. !!

* [ Kaase=bowls, Gadaagaron=beggars,
Naazil=descending,
Azaab=pain,torment,misfortune,anguish
Azal=Death ]

Mohsin Naqvi

Zubaan Rakhta Hun Lekin Chup Khada Hun..

Zubaan rakhta hun lekin chup khada hun,
main aawaazon ke ban mein ghir gaya hun.

Mere ghar ka daricha puchhta hai,
main sara din kahan phirta raha hun.

Mujhe mere siwa sab log samjhe,
main apne aap se kam bolta hun.

Sitaaron se intehaa ki hasad hai,
main qabaron par charaagan kar raha hun.

Sambhal kar ab hawaaon se uljhna,
main tujh se peshtar bujhne laga hun.

Meri qurbat se kyon khaaif* hai duniya,
samandar hun main khud mein gunjta raha hun.

Mujhe kab tak sametega woh ‘Mohsin
main andar se bahut toota hua hun. !!
*[ Khaaif=afraid ]

Khud-Ba Khud Theek Hone Lagta Hun..

Tere Nazdeek Hone Lagta Hun,

Khud-Ba Khud Theek Hone Lagta Hun …!

Jab Kaanch Uthaane Pad Jaayen Tum Haath Humara Le Jana..

Jab Kaanch Uthaane Pad Jaayen,
Tum Haath Humara Le Jana.

Jab Samjho Ki Koi Saath Nahi,
Tum Saath Humara Le Jana.

Jab Dekho Ki Tum Tanha Ho,
Aur Raaste Hain Dushwar Bahut,

Tab Hum Ko Apna Keh Dena,
Bebaak Sahara Le Jana.

Jo Baazi Bhi Tum Jeetoge,
Jo Manzil Bhi Tum Paaoge,

Hum Paas Tumhare Hon Na Hon,
Ehshas Humara Le Jana.

Jab Yaad Humari Aayegi,
Tum Paas Humare Aa Jana,

Ek Muskurahat De Jana,
Tum Jaan Humari Le Jana.

Jab Kaanch Uthaane Pad Jaayen,
Tum Haath Humara Le Jana .!!

Bahut Se Aainey Khareed Laya Hun..

Apni tanhaayi se tang aa kar,

Bahut se aainey khareed laya hun …!

Haath Se Naapta Hun Dard Ki Gehraayi Ko..

Haath se naapta hun dard ki gehraayi ko,

Ye naya khel mila hai meri tanhaai ko …!

Magar Afsos Ki Pehli Mohabbat Aakhiri Nikli..

Tawwaqo* Thi Ki Iss Ghum Ka Madawa* Ho Hi Jaayega,

Magar Afsos Ki Pehli Mohabbat Aakhiri Nikli …!

*[ Tawwaqo=Umeed, aasha | Madawa=End ]