Home / Tanhaai shayari

Tanhaai shayari

Hum Se Tanhai Ke Maare Nahin Dekhe Jaate – Farhat Shahzad Ghazal

Hum Se Tanhaai Ke Maare Nahin Dekhe Jaate – Ghazal by Farhat Shahzad

Hum se tanhaai ke maare nahin dekhe jaate
bin tere chaand sitaare nahin dekhe jaate.

Haarna din ka hai manzoor magar jaan-e-azeez
hum se gesu tere haare nahin dekhe jaate.

Dil phansa bhi ho bhanvar mein toh koi baat nahin
ranj mein doobte pyaare nahin dekhe jaate.

Jin ke pairon mein samundar the jhukaaye nazren
un ki aankhon mein kinaare nahin dekhe jaate.

Chheen le meri samaat ki basaarat ya rabb
un labon par mere naare nahin dekhe jaate.

Jin ki aahat se bandhi thi mere dil ki dhadkan
un nigaahon ke ishaare nahin dekhe jaate.

Toor patthar tha mere dil ko dikha apni jhalak
phir ye kahna ki nazaare nahin dekhe jaate.

Maah-e-kaamil bhi jise dekh ke sajde mein gire
aankh mein us ki sitaare nahin dekhe jaate. !!

Farhat Shahzad

Hum Se Tanhai Ke Maare Nahin Dekhe Jaate – Farhat Shahzad Ghazal
4.6 (92%) 5 votes

Ronaq-e Rahguzar Hai Tanhaai..

Mohsin Naqvi Ghazal


Ronaq-e rahguzar hai tanhaai,
phir meri humsafar hai tanhaai. !

Chaand kyon mand padta jata hai,
tu hai ya baam par hai tanhaai. !

Kya maseehaa’on ko talaash karen,
zakhm ki chaaragar hai tanhaai. !

Shaam-e ghum odh kar hi so jaao,
shaam-e ghum se udhar hai tanhaai. !

Kirchiyon se bhi aks chunti hai,
sangdil kis qadar hai tanhaai. !

Jinke mehmaan hon shab ke andeshe,
aise logon ka ghar hai tanhaai. !

Lamha bhar ko hai saath saans’on ka,
aur phir umar bhar hai tanhaai. !

Jaane kis ki talaash mein ‘Mohsin
aaj kal dar-ba dar hai tanhaai. !!

Mohsin Naqvi Poetry Collection

Ronaq-e Rahguzar Hai Tanhaai..
5 (100%) 1 vote

Tum Nahin Bachpan ki Zid Mein Tum si Kitni Ladkiyan..

Mohsin Naqvi Poetry 


Tum nahin, bachpan ki zidd mein tum si kitni ladkiyaan,
ab paraaye daaman’on par kaadhti hain titliyaan. !

Dil mein tanhaai ka sannaata azaab-e hashr hai,
raat bhar bajti hain mere ghar ki saari khidkiyaan. !

Main shikasta aainon ke shehar mein phirta raha,
haath mein tera pata, paanv mein chubhti kirchiyaan. !

Doobne waalon ki aawaaz’en khalaa mein kho gayi,
log chunte hi rahe saahil se taaza seepiyaan. !

Hijr ke saare fasaane, sab bahaane, sach magar
kuchh masaa’el aur bhi the, uske mere darmiyaan. !

Roshni maangi thi, sunte hain buzurgon ne kabhi,
dhoondhti hain bastiyon ko ab bhi andhi bijliyaan. !

Ab lute laash’on, jale khemon ka pursa kis ko dein
reh gayi sehra mein bachchon ki adhoori hichkiyaan. !

Hum garebaanon se jayenge toh kya ‘Mohsin
mere doston ke haath toh reh jaayengi kuchh dhajjiyaan. !! 

Tum Nahin Bachpan ki Zid Mein Tum si Kitni Ladkiyan..
Please Rate this poetry!

Ho Jaayegi Jab Tum Se Shanasai Zara Aur..

Aanis Moeen 

Ho jaayegi jab tum se shanasaai zara aur,
badh jaayegi shayad meri tanhaai zara aur.

Kyon khul gaye logon pe meri zaat ke asraar,
aey kaash ki hoti meri gehraai zara aur.

Phir haath pe zakhmon ke nishaan gin na sakoge,
ye uljhi hui dor jo suljhaai zara aur.

Tardeed toh kar sakta tha phailegi magar baat,
iss taur bhi hogi teri ruswaai zara aur.

Kyon tark-e-taalluq bhi kiya laut bhi aaya?
achchha tha ki hota jo woh harjaai zara aur.

Hai deep teri yaad ka raushan abhi dil mein,
ye khauf hai lekin jo hawa aayi zara aur.

Ladna wahin dushman se jahan gher sako tum,
jeetoge tabhi hogi jo paspaai zara aur.

Badh jaayenge kuchh aur lahoo bechne waale,
ho jaaye agar shehar mein mehngaai zara aur.

Ek doobti dhadkan ki sadaa log na sun lein,
kuchh der ko bajne do ye shehnaai zara aur. !!

Aanis Moeen Poetry Collection

Ho Jaayegi Jab Tum Se Shanasai Zara Aur..
5 (100%) 1 vote

Aalam Hi Aur Tha Jo Shanasaiyon Mein Tha..

Ada Jafri Poetry

Aalam hi aur tha jo shanasaiyon mein tha,
jo deep tha nigaah ki parchhaaiyon mein tha.

Woh be-panaah khauf jo tanhaiyon mein tha,
dil ki tamaam anjuman-aaraaiyon mein tha.

Ek lamha-e fusun ne jalaaya tha jo diya,
phir umar bhar khayaal ki raanaaiyon mein tha.

Ek khwaab-guun si dhoop thi zakhmon ki aanch mein,
ek saaebaan sa dard ki purwaaiyon mein tha.

Dil ko bhi ek jaraahat-e dil ne ataa kiya,
ye hausla ki apne tamaashaaiyon mein tha.

kaTta kahan taweel tha raaton ka silsila,
sooraj meri nigaah ki sachchaaiyon mein tha.

Apni gali mein kyon na kisi ko woh mil saka,
jo etimaad baadiya-paimaaiyon mein tha.

Is ahd-e-khud-sipaas ka puchho ho maajra,
masroof aap apni paziraaiyon mein tha.

Us ke huzoor shukr bhi aasaan nahin ada,
woh jo qareeb-e jaan meri tanhaaiyon mein tha. !!

Aalam Hi Aur Tha Jo Shanasaiyon Mein Tha..
3.5 (70%) 2 votes

Apne Hone Par Mujh Ko Yaqeen Aa Gaya – Javed Akhtar

Zindagi Na Milegi Dobara [ZNMD]  Poem

Pighle neelam sa behta hua ye shamaan,
Neeli neeli si khaamoshiyaan,
Na kahin hai zameen, na kahin aasmaan !
Sarsaraati hui tehniyaan.. pattiyaan,
Keh rahi hain ki bas ek tum ho yahan.. sirf main hun !
Meri saansen hain.. aur meri dhadkanen !
Aisi gehraaiyaan.. Aisi tanhaaiyaan,
Aur main.. Sirf main !

Apne hone par mujh ko yaqeen aa gaya. !!

Javed Akhtar Poems Collection

Subscribe us for latest Javed Akhtar Shayari, ghazals, nazms, urdu poets, poems, poetry. 

Apne Hone Par Mujh Ko Yaqeen Aa Gaya – Javed Akhtar
Please Rate this poetry!

Apne Darwaaze Par Khud Hi Dastaken Deta Hai Woh..

Two (2) Line Poetry

Apne darwaaze par khud hi dastaken deta hai woh,
ajnabi lehje mein phir poochhta hai “kaun hai” …??

 

Two Line Poetry Collection

 

 

Apne Darwaaze Par Khud Hi Dastaken Deta Hai Woh..
Please Rate this poetry!