Home / Shehar Shayari (page 4)

Shehar Shayari

Sadkon Pe Beshumaar Gul-e-khoon Pade Hue.. [ Main Aur Shehar ]

Sadkon pe beshumaar gul-e-khoon pade hue
Peddon ki daaliyon se tamaashe jhade hue
Kothon ki mamtiyon pe haseen buut khade hue
Sunsaan hain makaan kahin dar khula nahin
Kamre saje hue hain magar raasta nahin
Veeraan hai poora shehar koi dekhta nahin
Aawaaz de raha hun koi bolta nahin …!

Munir Niazi

Hai Uss Gulrang Ka Deewar Hona..

Hai uss gulrang ka deewar hona,
ki jaise khwaab se bedaar hona.

Bataati hai mehak dast-e-hina ki,
kisi dar ka pas-e-deewar hona.

Usey rakhta hai sehraaon mein hairaan,
dil-e-shayar ka pur-asraar hona.

Kamaal-e-shauq ka haasil yahi hai,
humara shehar se bezaar hona.

Firaaq aaghaaz hai un saa.aton ka,
hai aakhir jin ka wasl-e-yaar hona.

Yahi hona tha aakhir dasht-e-ghum ko,
humare haath se gulzaar hona.

Mohabbat ka sabab hai beniyaazi,
kashish uss ki hai bas dushwaar hona. !!

Munir Niazi

Iss Shehar-e Sangdil Ko Jalaa Dena Chahiye..

Iss shehar-e sangdil ko jalaa dena chahiye,
phir uss ki khaak ko bhi udaa dena chahiye.

Milti nahin panaah humein jis zameen par,
ek hashar uss zameen pe utha dena chahiye.

Had se guzar gayi hai yahan rasm-e-qaaheri,
iss dahar ko ab iss ki sazaa dena chahiye.

Ek tez rad jaisi sadaa har makaan mein,
logon ko un ke ghar mein daraa dena chahiye.

Gum ho chale ho tum toh bahut khud mein aye ‘munir
duniya ko kuchh toh apna pata dena chahiye. !!

Munir Niazi

Raat Itni Jaa Chuki Hai Aur Sona Hai Abhi..

Raat itni jaa chuki hai aur sona hai abhi,
iss nagar mein ek khushi ka khwaab bona hai abhi.

Kyon diya dil uss buut-e kamsin ko aise waqt mein,
dil si shayy jis ke liye bas ek khilona hai abhi.

Aisi yaadon mein ghire hain jin se kuchh haasil nahin,
aur kitna waqt un yaadon mein khona hai abhi.

Jo hua hona hi tha so ho gaya hai dosto,
daagh iss ehd-e sitam ka dil se dhona hai abhi.

Hum ne khilte dekhna hai phir khayabaan-e bahaar,
shehar ke ataraf ki mitti mein sona hai abhi.

Baith jaayen saaya-e-daamaan-e-ahmad mein ‘munir
aur phir sochen woh baaten jin ko hona hai abhi. !!

Munir Niazi

Dil Ka Safar Bas Ek Hi Manzil Pe Bas Nahin..

Dil ka safar bas ek hi manzil pe bas nahin,
itna khyaal uss ka humein iss baras nahin.

Dekho gul-e-ahaar-e-asar dasht-e-shaam mein,
deewar-o-dar koi bhi kahin pesh-o-pas nahin.

Aaya nahin yaqeen bahut der tak humein,
apne hi ghar ka dar hai ye baab-e-qafas nahin.

Aisa safar hai jis ki koi intiha nahin,
aisa makaan hai jis mein koi hum-nafas nahin.

Aayegi phir bahaar issi shehar mein ‘munir
taqdeer iss nagar ki faqat khaar-o-khaas nahin. !!

Munir Niazi

Jafaayen Door Tak Jaati Hain Kam Aabaad Shehron Mein..

Jafaayen door tak jaati hain kam aabaad shehron mein,
wafaayen door tak jaati hain kam aabaad shehron mein.

Bahaaren der tak rahti hain kam aabaad qariyon mein,
khizayen door tak rahti hain kam aabaad shehron mein.

Sadaa hansne ki ho afsos ki ya aah bharne ki,
sadaayen door tak jaati hain kam aabaad shehron mein.

Andhera jab ghana ho toh chiraagh-e-raah-e-veeran ki,
shuaayen door tak jaati hain kam aabaad shehron mein.

Munir’ aabaad shehron ke makeenon ki hawaa le kar,
hawayen door tak jaati hain kam aabaad shehron mein .!!

Munir Niazi

Aur Hain Kitni Manzilen Baaqi..

Aur hain kitni manzilen baaqi,
jaan kitni hai jism mein baaqi.

Zinda logon ki bood-o-baash mein hain,
murda logon ki aadaten baaqi.

Uss se milna woh khwaab-e-hasti mein,
khwaab maadoom hasraten baaqi.

Beh gaye rang-o-noor ke chashme,
rah gayi un ki rangaten baaqi.

Jin ke hone se hum bhi hain aye dil,
shehar mein hain woh sooraten baaqi.

Woh toh aa ke ‘munir jaa bhi chuka,
ek mehak si hai baagh mein baaqi. !!

Munir Niazi

Ek Aalam-e-Hijraan Hi Ab Hum Ko Pasand Aaya..

Ek aalam-e-hijraan hi ab hum ko pasand aaya,
ye khaana-e-veeraan hi ab hum ko pasand aaya.

Benaam-o-nishaan rahna gurbat ke ilaaqe mein,
ye shehar bhi dilkash tha tab hum ko pasand aaya.

Tha laal hua manzar sooraj ke nikalne se,
woh waqt tha woh chehra jab hum ko pasand aaya.

Hai kat-e-taalluq se dil khush bhi bahut apna,
ek had hi bana lena kab hum ko pasand aaya.

Aana woh ‘munir uss ka bekhauf-o-khatar hum tak,
ye turfa tamaasha bhi shab hum ko pasand aaya. !!

Munir Niazi

Hai Shakl Teri Gulaab Jaisi..

Hai shakl teri gulaab jaisi,
nazar hai teri sharaab jaisi.

Hawaa sahar ki hai inn dinon mein,
badalte mausam ke khwaab jaisi.

Sadaa hai ek dooriyon mein ojhal,
meri sadaa ke jawaab jaisi.

Woh din tha dozakh ki aag jaisa,
woh raat gahre azaab jaisi.

Ye shehar lagta hai dasht jaisa,
chamak hai uss ki saraab jaisi.

Munir’ teri ghazal ajab hai,
kisi safar ki kitaab jaisi. !!

Munir Niazi

Ashk-e-rawan Ki Nehar Hai Aur Hum Hain Dosto..

Ashk-e-rawan ki nehar hai aur hum hain dosto,
uss bewafa ka shehar hai aur hum hain dosto.

Ye ajnabi si manzilen aur raftagaan ki yaad,
tanhaiyon ka zehar hai aur hum hain dosto.

Laayi hai ab uda ke gaye mausamon ki baas,
barkha ke rutt ka qahar hai aur hum hain dosto.

Phirte hain misl-e-mauj-e-hawa shehar shehar mein,
aawaargi ki lehar hai aur hum hain dosto.

Shaam-e-aalam dhali toh chali dard ki hawa,
raaton ka pichhla pehar hai aur hum hain dosto.

Aankhon mein udd rahi hai luti mehfilon ki dhool,
ibrat saraa-e dahar hai aur hum hain dosto. !!

Munir Niazi