Home / Shehar Shayari

Shehar Shayari

Milan Ki Saat Ko Is Tarah Se Amar Kiya Hai

Milan Ki Saat Ko Is Tarah Se Amar Kiya Hai – Aanis Moeen Ghazal

Milan ki saat ko is tarah se amar kiya hai
tumhari yaadon ke saath tanha safar kiya hai .!

Suna hai us rut ko dekh kar tum bhi ro pade the
suna hai baarish ne pattharon par asar kiya hai .!

Saleeb ka baar bhi uthao tamaam jeewan
ye lab-kushaai ka jurm tum ne agar kiya hai .!

Tumhein khabar thi haqeeqaten talkh hain jabhi toh
tumhari aankhon ne khwaab ko mo’atabar kiya hai .!

Ghutan badhi hai toh phir usi ko sadaayen di hain
ki jis hawa ne har ek shajar be-samar kiya hai .!

Hai tere andar basi hui ek aur duniya
magar kabhi tune itna lamba safar kiya hai .!

Mere hi dum se toh raunaqen tere shehar mein thin
mere hi qadmon ne dasht ko rah-guzar kiya hai .!

Tujhe khabar kya mere labon ki khamoshiyon ne
tere fasaane ko kis qadar mukhtasar kiya hai .!

Bahut si aankhon mein teergi ghar bana chuki hai
bahut si aankhon ne intezaar-e-sahar kiya hai .!!

Aanis Moeen

Honge Juda Hum is Tarah Imkaan Toh Na Tha..

Mohsin Naqvi Poetry 


Honge juda hum is tarah imkaan toh na tha,
ye dil kabhi bhi is tarah weeraan toh na tha. !

Jaise hua hai ab ke woh halaat se mere,
pahle kabhi woh is tarah anjaan toh na tha. !

Woh shehar se gaya hai toh raunaq bhi le gaya,
ye shehar is tarah kabhi sunsaan toh na tha. !

Ek Pyar ki jaageer ka maalik tha main kabhi,
pahle se yun hi be’sar-o saamaan toh na tha. !

Mohsin’ hum ne ishq mein paaya naffa bahut,
is kaarobaar mein koi nuqsaan toh na tha. !! 

Le De ke Wohi Shakhs Hai is Sheher Mein Apna..

Le de ke wohi shakhs hai is sheher mein apna,
Duniya kahin usko bhi samajhdaar na kar de …!

Zara Si Der Mein Hum Kaise Kholte Us Ko..

Zara si der mein hum kaise kholte uss ko,
tamaam umar lagi jhooth bolte uss ko.

Jise kasheed kiya tha khumaar-e-khushboo se,
misaal-e rang hawaaon mein gholtey uss ko.

Woh khwaab mein hi utarta shuaa-e subah ke saath,
hum apne aap hi palkon pe taultey uss ko.

Woh ashq tha usey aankhon mein dafan hona tha,
gauhar na tha ki sitaaron mein roltey uss ko.

Woh bewafa tha toh iqraar laazmi karta,
kuchh aur der meri jaan tatoltey uss ko.

Kisi ki aankh se ‘mohsin’ zaroor peeta hai,
tamaam shehar ne dekha hai daultey uss ko. !!

Talab Ko Ajar Na Dun Fikar-e Rahguzar Na Karun..

Mohsin Naqvi Poetry

Talab ko ajar na dun, fiqar-e rahguzar na karun,
safar mein ab ke hawaa ko bhi humsafar na karun.

Ubharte doobte sooraj se tod lun rishta,
main shaam odh ke so jaaun aur sehar na karun.

Ab iss se badh ke bhala kya ho ehtiyaat-e wafa?
main tere shehar se guzrun, tujhe khaber na karun.

Ye mere dard ki daulat, meri maata-e firaaq
in aansu’on ki wazaahat main umar bhar na krun.

Ujaad shab ki khalish ban ke bann mein kho jaaun
main chandni ki tarha khud ko dar-ba-dar na karun.

Wo ek pal ko dikhaayi toh de kahin ‘mohsin
main jaan ganwa ke bhi uss pal ko mukhtasar na karun. !!

Mohsin Naqvi Shairy Collection

 

Mujhe Aey Dost Ja Kar Shehar Mein Apna Pata Likhna..

Urdu – Hindi Poetry

 Mujhe aey dost! jaa kar shehar mein apna pataa likhna..
 ye tum ne gaaon kyon chhoda ?.. hui thi kya khata likhna .

 Ye panghat, khet aur khalihaan, nehren, gaaon ka mandir..
 jo tum ko yaad aa jaayen toh apni kathaa likhna .

 Wahan oonchi imaarat, kaarkhaane, roshni, dhuaan..
 laga kar jod-baaqi, kul kitna hua nafaa likhna. !!

Subscribe us for hindi – urdu shayari, ghazals, poems, nazms, poets, shair. 

 

Ghum-e-hijr Se Na Dil Ko Kabhi Humkinaar Karna..

Ghum-e-hijr se na dil ko kabhi hum-kinaar karna,
main phir aaunga palat kar mera intezaar karna.

Mujhe dar hai mere aansoo teri aankh se na jhalken,
zara soch kar samajh kar mujhe sogwaar karna.

Usey dhoond sab se pehle jo mila nahin hai tujh ko,
ye sitaare aasmaan ke kabhi phir shumaar karna.

Mere shehar ki fiza mein koi zehar bhar gaya hai,
tere husn par hai laazim usey khushgawaar karna.

Main uthaaungaa na ehsaan tere baad na-khuda ka,
mujhe tu ne hi duboya mujhe tu hi paar karna.

Mere badnaseeb saathi teri zindagi hi kya hai,
na kisi se dil lagaana na kisi se pyaar karna.

Kabhi iqtidaar bakhshe jo khuda ‘qateel tujh ko,
jo rawish hai qaatilon ki woh na ikhtiyaar karna. !!

Qateel Shifai

Raqs Karne Ka Mila Huqm Jo Dariyaaon Mein..

Raqs karne ka mila huqm jo dariyaaon mein,
hum ne khush ho ke bhanwar baandh liye paaon mein.

Un ko bhi hai kisi bheege hue manzar ki talaash,
boond tak bo na sake jo kabhi sehraaon mein.

Aye mere humsafaron tum abhi thake haare ho,
dhoop ki tum toh milaawat na karo chhaaon mein.

Jo bhi aataa hai bataata hai naya koi ilaaj,
bat na jaaye tera beemaar maseehaaon mein.

Hausla kis mein hai yusuf ki khareedaari ka,
ab toh mehangaai ke charche hain zulekhaaon mein.

Jis barahman ne keha hai ki ye saal achchha hai,
uss ko dafnaao mere haath ki rekhaaon mein.

Woh khuda hai kisi toote hue dil mein hoga,
masjidon mein usey dhoondho na kaleesaaon mein.

Hum ko aapas mein mohabbat nahin karne dete,
bas yehi aib hai iss shehar ke daanaaon mein.

Mujh se karte hain ‘qateel iss liye kuchh log hasad,
kyon mere sher hain maqbool haseenaaon mein. !!

Qateel Shifai

Kabhi Kisi Ko Mukammal Jahaan Nahin Milta..

Kabhi kisi ko mukammal jahaan nahin milta,
kahin zameen toh kahin aasmaan nahin milta.

Tamaam shehar mein aisa nahin khuloos na ho,
jahan umeed ho iss ki wahan nahin milta.

Kahan charaagh jalaayen kahan gulaab rakhen,
chhaten toh milti hain lekin makaan nahin milta.

Ye kya azaab hai sab apne aap mein gum hain,
zubaan mili hai magar hum-zubaan nahin milta.

Charaagh jalte hain beenaai bujhne lagti hai,
khud apne ghar mein hi ghar ka nishaan nahin milta. !!

Nida Fazli

Din Saleeqe Se Ugaa Raat Thikaane Se Rahi..

Din saleeqe se ugaa raat thikaane se rahi,
dosti apni bhi kuchh roz zamaane se rahi.

Chand lamhon ko hi banti hain musawwir aankhen,
zindagi roz toh tasweer banaane se rahi.

Iss andhere mein toh thokar hi ujaala degi,
raat jungal mein koi shama jalaane se rahi.

Faasla chaand bana deta hai har patthar ko,
door ki raushni nazdeek toh aane se rahi.

Shehar mein sab ko kahan milti hai rone ki jagah,
apni izzat bhi yahan hansne hansaane se rahi. !!

Nida Fazli