Home / Safar Shayari (page 7)

Safar Shayari

Usoolon Pe Jahan Aanch Aaye Takraana Zaroori Hai..

Usoolon pe jahan aanch aaye takraana zaroori hai,
jo zinda ho toh phir zinda nazar aana zaroori hai.

Nayi umaron ki khud-mukhtaariyon ko kaun samjhaaye,
kahan se bach ke chalna hai kahan jaana zaroori hai.

Thake haare parinde jab basere ke liye laute,
saleeqa-mand shaakhon ka lachak jaana zaroori hai.

Bahut bebaak aankhon mein taalluq tik nahin paata,
mohabbat mein kashish rakhne ko sharmaana zaroori hai.

Saleeqa hi nahin shayad usey mehsoos karne ka,
jo kehta hai khuda hai toh nazar aana zaroori hai.

Mere honthon pe apni pyaas rakh do aur phir socho,
ki iss ke baad bhi duniya mein kuchh paana zaroori hai. !!

Wasim Barelvi

Usoolon Pe Jahan Aanch Aaye Takraana Zaroori Hai..
5 (100%) 1 vote[s]

Apne Har Har Lafz Ka Khud Aaina Ho Jaaunga..

Apne har har lafz ka khud aaina ho jaaunga,
uss ko chhota keh ke main kaise bada ho jaaunga.

Tum giraane mein lage the tum ne socha hi nahin,
main gira toh masla ban kar khada ho jaaunga.

Mujh ko chalne do akela hai abhi mera safar,
raasta roka gaya toh qaafila ho jaaunga.

Saari duniya ki nazar mein hai mera ahad-e wafa,
ek tere kehane se kya main bewafa ho jaaunga. !!

Wasim Barelvi

 ♥ (Chalte- Chalte“There is only one way to avoid criticism: do nothing, say nothing, and be nothing.”   Aristotle )

Apne Har Har Lafz Ka Khud Aaina Ho Jaaunga..
5 (100%) 3 vote[s]

Ishq Karo Toh Ye Bhi Socho Arz-e Sawaal Se Pehle..

Ishq karo toh ye bhi socho arz-e sawaal se pehle,
hijr ki poori raat aati hai subah-e wisaal se pehle.

Dil ka kya hai dil ne kitne manzar dekhe lekin,
aankhein paagal ho jaati hain ek khyaal se pehle.

Kis ne reit udaati shab mein aankhein khol ke rakhin,
koi ek misaal toh do na uss ki misaal se pehle.

Kaar-e mohabbat ek safar hai iss mein aa jaata hai,
ek zawaal aasaar sa raasta baab-e kamaal se pehle.

Ishq mein resham jaise waade aur khwaabon ka raasta,
jitna mumkin ho tayy kar lein gard-e malaal se pehle .!!

-> Noshi Gilani

Ishq Karo Toh Ye Bhi Socho Arz-e Sawaal Se Pehle..
5 (100%) 3 vote[s]

Koi Mujh Ko Mera Bharpoor Sarapa La De..

Koi mujh ko mera bharpoor sarapa la de,
mere baazu, meri aankhein, mera chehra la de.

Aisa dariya jo kisi aur samundar mein gire,
iss se behtar hai ki mujh ko mera sehra la de.

Kuchh nahin chahiye tujh se aye meri umar-e rawaan,
mera bachpan, mere jugnu, meri gudiya la de.

Naya mausam meri beenaai ko tasleem nahin,
meri aankhon ko wohi khwaab puraana la de.

Jis ki aankhein mujhe andar se bhi padh sakti hon,
koi chehra toh mere shehar mein aisa la de.

Kashti-e jaan toh bhanwar mein hai kayi barson se,
aye khuda! ab toh dubo de ya kinaara la de. !!

-> Noshi Gilani

Koi Mujh Ko Mera Bharpoor Sarapa La De..
4.2 (84%) 5 vote[s]

Khandhar Se Dil Mein Phir Koi Tamanna Ghar Banaati Hai..

Khand’har se dil mein phir koi tamanna ghar banaati hai,
mere kamre mein ek nanhi si chidiya ghar banaati hai.

Muqaddar ke likhe ko ladkiyan bilkul nahin padhti,
woh dekho rett par baithi woh gudiya ghar banaati hai.

Kisi ki be’ghari manzoor hoti toh mehak hota,
udhar dekho mere chhappar mein chidiya ghar banaati hai.

Nigal leti hai ladkon ko bade shehron ki rangeeni,
na jaane kis tamanna mein ye budhiya ghar banaati hai.

Jala kar raakh kar deti hai ek lamhe mein shehron ko,
siyaasat bastiyon ko roz kuda’ghar banaati hai.

Chalo imdaad karna seekh lein hum bhi huqoomat se,
ye pakka ghar gira deti hai kaccha ghar banaate hain.

Nahin sunta hai meri toh mere bachchon ki hi sun le,
ye woh mausam hai jab chidiya bhi apna ghar banaati hai. !!

Khandhar Se Dil Mein Phir Koi Tamanna Ghar Banaati Hai..
5 (100%) 5 vote[s]

Aangan Mein Ek Darakht Puraana Nahin Raha..

Woh ja raha hai ghar se janaaza buzurg ka,
aangan mein ek darakht puraana nahin raha. !!

Aangan Mein Ek Darakht Puraana Nahin Raha..
5 (100%) 3 vote[s]

Tu Kabhi Dekh Toh Rote Hue Aa Kar Mujh Ko..

Tu kabhi dekh toh rote hue aa kar mujh ko,
rokna padta hai aankhon se samandar mujh ko.

Iss mein aawara-mizazi ka koi dakhl nahin,
dasht-o sehra mein firaata hai muqaddar mujh ko.

Ek tooti hui kashti ka musaafir hun main,
haan nigal jayega ek roz samundar mujh ko.

Iss se badh kar meri tauheen-e anaa kya hogi,
ab gadaagar bhi samjhte hain gadaagar mujh ko.

Zakhm chehre pe, lahoo aankhon mein,  seena chhalni,
zindagi ab toh odhaa de koi chaadar mujh ko.

Meri aankhon ko woh binaai ataa kar maula,
ek aansu bhi nazar aaye samundar mujh ko.

Koi iss baat ko maane ki na maane lekin,
chaand lagta hai tere maathe ka jhoomar mujh ko.

Dukh toh ye hai mera dushman hi nahin hai koi,
ye mere bhai hain kehte hain jo baabar mujh ko.

Mujh se aangan ka andhera bhi nahin mit paaya,
aur duniya hai ki kehti hai ‘Munawwar’  mujh ko. !!

Tu Kabhi Dekh Toh Rote Hue Aa Kar Mujh Ko..
4.9 (97.5%) 8 vote[s]