Home / Safar Shayari (page 6)

Safar Shayari

Dhundlaayi Hui Shaam Thi..

Dhundlaayi hui shaam thi,
alsaayi hui si..
aur waqt bhi baasi tha main jab shehar mein aaya,
har shaakh se lipte hue sannaate khade the..
deewaaron se chipki hui khaamoshi padi thi..
raahon mein nafas koi na parchhaiyan na saya,
un galiyon mein qoochon mein andhera na ujaala,
darwaazon ke pat band the, khaali the dareeche,
bas waqt ke kuchh baasi se tukde the, pade the…

Main ghumta phirta tha sar-e shehar akela..
darwaazon pe aawaaz lagata tha, koi hai?
har mod pe ruk jaata tha shayad koi aaye..
lekin koi aahat, koi saaya bhi na aaya. !

Ye shehar achaanak hi magar jaag pada hai..
aawaazen hiraasat mein liye mujh ko khadi hain.
aawaazon ke iss shehar mein main qaid pada hun. !!

Kis Qadar Seedha, Sahal, Saaf Hai Raasta Dekho..

Kis qadar seedha, sahal, saaf hai raasta dekho..
na kisi shaakh ka saaya hai, na deewaar ki tek.
na kisi aankh ki aahat, na kisi chehre ka shor,
door tak koi nahin.. koi nahin.. koi nahin.

Chand kadmon ke nishaan, haan kabhi milte hain kahin
saath chalte hain jo kuchh door faqat chand kadam,
aur phir toot ke gir jaate hain ye kehte hue..
apni tanhaai liye aap chalo, tanha akele!
saath aaye jo yahan.. koi nahin.. koi nahin. !!

Aadmi Bulbula Hai Paani Ka..

Aadmi bulbula hai paani ka..
aur paani ki behti satah par,
toot’ta bhi hai, doobta bhi hai..
phir ubharta hai, phir se behta hai..
na samundar nigal saka iss ko,
na tawaarikh tod paayi hai !
Waqt ki hatheli par behta,
aadmi bulbula hai paani ka .!!

Hum Toh Khush The Ki Chalo Dil Ka Junoon Kuchh Kam Hai..

Hum toh khush the ki chalo dil ka junoon kuchh kam hai,
ab jo aaraam bahut hai toh sukoon kuchh kam hai.

Rang-e girya ne dikhayi nahin agli si bahaar,
ab ke lagta hai ki aamezish-e khoon kuchh kam hai.

Ab tera hijr musalsal hai toh ye bhed khula,
ghum-e dil se ghum-e duniya ka fusoon kuchh kam hai.

Uss ne dukh saare zamaane ka mujhe bakhs diya,
phir bhi laalach ka taqaaza hai kahun kuchh kam hai.

Raah-e duniya se nahin dil ki guzargaah se aa,
faasla garche zyada hai pe yun kuchh kam hai.

Tune dekha hi nahin mujh ko bhale waqton mein,
ye kharaabi ki main jis haal mein hun kuchh kam hai.

Aag hi aag mere qarya-e tann mein hai ‘faraz
phir bhi lagta hai abhi soz-e daroon kuchh kam hai. !!

Jab Bhi Dil Khol Ke Roye Honge..

Jab bhi dil khol ke roye honge,
log aaraam se soye honge.

Baaz aukaat ba-majboori-e dil,
hum toh kya aap bhi roye honge.

Subah tak dast-e saba ne kya kya,
phool kaanton mein piroye honge.

Woh safeene jinhe toofan na mile,
na-khudaaon ne duboye honge.

Raat bhar hanste hue taaron ne,
un ke aariz bhi bhigoye honge.

Kya ajab hai woh mile bhi hon ‘faraz
hum kisi dhyaan mein khoye honge. !!

Ye Kaisa Ehsaas Hai..?

Girl in love-Lost my love-girl going behindboy-lover-girl watching going boy-sad- nazam-poetry-shayari-poem

Ye kaisa ehsaas hai ?
ki uski na hote hue bhi uski hona chahti hun..
kyon woh shakhs meri rag-o jaan mein basta ja reha hai ?

Ye kaisa sehar hai us shakhs mein ?
ki bin dekhe ,
bin bole ,
bin soche ,
ek aise safar ki taraf nikal padtii hun..
jis ka raasta woh batata hai ..!

Kyon ???
aisa kyon hai ?
kya woh mere mann mandir ka dewta hai ?
jise poojne ka socha tha ?
jis ki ho ke rehne ka socha tha ?

Haan!
shayad ye wohi shakhs hai..
haan ye wohi dewta hai..
jo mera toh nahin lekin main toh uss ki hun..
kyon ki uss ke baad khone ke liye kuchh bhi nahin baaki..
toh usey khone se toh dara jayega na ?

Phir bhi main uss sakhs ko khone se kyon darti hun ?
na toh woh mera hai !
aur na uss ne mera hone ka dawa kiya hai !
toh phir kyon uss ke sehar mein uss ke pichhe bhaagti hun ?

Ek sawaal khud se karti hun toh jawaab milta hai.
haan shayad woh shakhs bhi mujhe chaahne laga hai !..
woh bhi apni khwahishat se ladta hua !
mera hi toh hona chaahta hai ..!

Aur agar woh mera hi hona chahta hai ,
toh jazbaat itne mand kyon?
kabhi toh khule dil se apnaane ka dawa kare !
kabhi toh mera ho jaane ka dawa kare !
kabhi toh mujhe chaahne ka dawa kare …!!

Ye Main Bhi Kya Hun Usey Bhool Kar Ussi Ka Raha..

Ye main bhi kya hun usey bhool kar ussi ka raha,
ki jis ke saath na tha humsafar  ussi ka raha.

Woh buut ki dushman-e deen tha ba-qaul naaseh ke,
sawaal-e sajda aaya jab aaya toh toh dar ussi ka raha.

Hazaar chaaragaron ne hazaar baaten ki,
keha jo dil ne sukhan mo’tabar ussi ka raha.

Bahut si khwaahishen sau baarishon mein bheegi hain,
main kis tarah se kahun umar bhar ussi ka raha.

Ki apne harf ki tauqeer jaanta tha ‘faraz
issi liye kaf-e qaatil pe sar ussi ka tha. !!

Yun Hi Mar Mar Ke Jiyen Waqt Guzaare Jaayen..

Yun hi mar mar ke jiyen waqt guzaare jaayen,
zindagi hum tere haathon se na maare jaayen.

Ab zameen par koi gautam na mohammad na maseeh,
aasmaanon se naye log utaare jaayen.

Woh jo maujood nahin uss ki madad chaahte hain,
woh jo sunta hi nahin uss ko pukaare jaayen.

Baap larzaan hai ki pahunchi nahin baraat ab tak,
aur hum-joliyaan dulhan ko sanwaare jaayen.

Hum ki nadaan juaari hain sabhi jaante hain,
dil ki baazi ho toh jee-jaan se haare jaayen.

Taaj diya tum ne dar-e yaar bhi uktaa ke ‘faraz
ab kahaan dhoondhne ghum-khwaar tumhaare jaayen. !!

Ajab Junoon-e Musaafat Mein Ghar Se Nikla Tha..

Alone-sad-man-boy-walking-in desert-ahmad faraz-petry-shayari-shair

Ajab junoon-e musaafat mein ghar se nikla tha,
khabar nahin hai ki sooraj kidhar se nikla tha.

Ye kaun phir se unhi raaston mein chhod gaya,
abhi abhi toh azaab-e safar se nikla tha.

Ye teer dil mein magar be-sabab nahin utra,
koi toh harf lab-e chaaragar se nikla tha.

Ye ab jo aag bana shehar shehar phila hai,
yehi dhuaan mere deewaar-o dar se nikla tha.

Main raat toot ke roya toh chain se soya,
ki dil ka zehar meri chasm-e tar se nikla tha.

Ye ab jo sar hain khameeda kulaah ki khaatir,
ye aib bhi toh hum ahl-e hunar se nikla tha.

Woh qais ab jise majnoo pukaarte hain ‘faraz
teri tarah koi deewaana ghar se nikla tha. !!

Kabhi Iss Nagar Tujhe Dhoondna, Kabhi Uss Nagar Tujhe Dhoondna..

walking_Alone_sad_thinking_searching_love_lost_boy_man_poetry_ghazal_shayari

Kabhi iss nagar tujhe dhoondna, kabhi uss nagar tujhe dhoondna
kabhi raat bhar tujhe sochna, kabhi raat bhar tujhe dhoondna.

Mujhe ja-baja teri justju, tujhe dhoondta hun main ku-ba-ku
kahan khul saka tere ru-ba-roo, mera iss qadar tujhe dhoondna.

Mera khwaab tha ki khyaal tha, woh urooj tha ki zawaal tha
kabhi farsh par tujhe dhoondna, kabhi arsh par tujhe dhoondna.

Yahan har kisi se hi bair hai, tera shehar qariya-e gair hai
yahan sehal bhi toh nahin koi, mera be-khabar tujhe dhoondna.

Teri yaad aayi toh ro diya,  jo tu mil gaya tujhe kho diya
mere silsile bhi ajeeb hain,  tujhe chhod kar tujhe dhoondna.

Ye meri nazar ka kamaal hai ki meri nazar ka jamaal hai
tujhe shair shair mein sochna, sar-e baam-o dar tujhe dhoondna .!!