Home / Sad Poetry (page 20)

Sad Poetry

Kahin Par Chhup Ke Ro Lene Ko Tehkhana Bhi Hota Tha..

Kahin par chhup ke ro lene ko tehkhana bhi hota tha,
har ek aabaad ghar mein ek veeraana bhi hota tha.

Taymmum ke liye mitti ka tukda tak nahin milta,
abhi kal tak gharon mein ek wujookhana bhi hota tha.

Ye aankhen jin mein ek muddat tak aansoo nahin aaye,
unhi aankhon mein pehle ek mayykhana bhi hota tha.

Abhi iss baat ko shayad zyada din nahin gujre,
taswwur mein humare ek parikhana bhi hota tha.

Muhabbat itni sasti bhi nahin thi uss zamaane tak,
muhabbat karne wala pehle deewaana bhi hota tha.

Sabhi kadiyan salaamat thi humare beech rishton ki,
humein gaahe-ba-gaahe apne ghar jana bhi hota tha.

Miyaan Punjab mein Lahore hi shaamil na tha pehle,
iss ke khet khalihaano mein Hariyana bhi hota tha. !!

Tu Kabhi Dekh Toh Rote Hue Aa Kar Mujh Ko..

Tu kabhi dekh toh rote hue aa kar mujh ko,
rokna padta hai aankhon se samandar mujh ko.

Iss mein aawara-mizazi ka koi dakhl nahin,
dasht-o sehra mein firaata hai muqaddar mujh ko.

Ek tooti hui kashti ka musaafir hun main,
haan nigal jayega ek roz samundar mujh ko.

Iss se badh kar meri tauheen-e anaa kya hogi,
ab gadaagar bhi samjhte hain gadaagar mujh ko.

Zakhm chehre pe, lahoo aankhon mein,  seena chhalni,
zindagi ab toh odhaa de koi chaadar mujh ko.

Meri aankhon ko woh binaai ataa kar maula,
ek aansu bhi nazar aaye samundar mujh ko.

Koi iss baat ko maane ki na maane lekin,
chaand lagta hai tere maathe ka jhoomar mujh ko.

Dukh toh ye hai mera dushman hi nahin hai koi,
ye mere bhai hain kehte hain jo baabar mujh ko.

Mujh se aangan ka andhera bhi nahin mit paaya,
aur duniya hai ki kehti hai ‘Munawwar’  mujh ko. !!

Meri Chaahat Ka Faqeeri Se Sira Milta Hai..

Meri Chaahat ka faqeeri se sira milta hai,
koi number bhi milaata hun tera milta hai.

Tum inn aankhon ke barsne se pareshaan kyon ho,
aise mausam mein toh har pedd haraa milta hai.

Ek diya gaaon mein har roz bhujhaati hai hawa,
roz footpath par ek shakhs mara milta hai.

Aye mohabbat tujhe kis khaane mein rakha jaaye,
shehar ka shehar toh nafarat se bhara milta hai.

Aap se mil ke ye ehsaas hai baaki ki abhi,
iss siyaasat mein bhi insaan kharaa milta hai.

Ye siyaasat hai toh phir mujh ko izaazat di jaaye,
jo bhi milta hai yahan khwaaza-saraa milta hai. !!

Mere Kamre Mein Andhera Nahin Rehne Deta..

Mere kamre mein andhera nahin rehne deta,
aap ka ghum mujhe tanha nahin rehne deta.

Woh toh kahiye ki shamsheer-jani aati thi,
warna dushman humein zinda nahin rahne deta.

Muflisi ghar mein thehrne nahin deti hum ko,
aur pardesh mein beta nahin rehne deta.

Tishnagi mera muqaddar hai isi se shayad,
main parindon ko bhi pyaasa nahin rehne deta.

Rett par khelte bacchon ko abhi kya maloom,
koi sailaab gharaunda nahin rehne deta.

Ghum se lakshman ki tarah bhai ka rishta hai mera,
mujh ko jungle mein akela rehne nahin deta. !!

Halaanky Humein Laut Ke Jana Bhi Nahin Hai..

Halaanky humein laut ke jana bhi nahin hai,
kashti magar iss baar jalaana bhi nahin hai.

Talwaar na chhoone ki kasam khayi hai lekin,
dushman ko kaleje se lagana bhi nahin hai.

Ye dekh ke maqtal mein hansi aati hai mujh ko,
saccha mere dushman ka nishaana nahin hai.

Main hun.. mera baccha hai.. khilono ki dukaan hai,
ab mere paas koi bahaanaa bhi nahin hai.

Pehle ki tarah aaj bhi hain teen hi shaayar,
ye raaz magar sab ko bataana bhi nahin hai. !!

Khoobsoorat Jheel Mein Hansta Kanwal Bhi Chahiye..

Khoobsoorat jheel mein hansta kanwal bhi chahiye,
hai galaa acchha toh phir acchhi ghazal bhi chahiye.

Uth ke iss hansti hui duniya se jaa sakta hun main,
ahl-e mehfil ko magar mera badal bhi chahiye.

Sirf phoolon se sajaawat pedd ki mumkin nahin,
meri shaakhon ko naye mausam mein phal bhi chahiye.

Aye meri khaak-e watan tera sagaa beta hun main,
kyon rahun footpaath par mujh ko mahal bhi chahiye.

Dhoop waadon ki buri lagne lagi hai ab humein,
sirf taareefen nahin urdu ka hal bhi chahiye.

Tune saari baaziyan jeeti hain mujh par baith kar,
ab main burha ho raha hun astbal bhi chahiye. !!