Home / Saaya Shayari (page 2)

Saaya Shayari

Pee Li Toh Kuchh Pata Na Chala Woh Suroor Tha..

Pee li toh kuchh pata na chala woh suroor tha,
woh uss ka saaya tha ki wahi rashk-e-hoor tha.

Kal maine uss ko dekha toh dekha nahin gaya,
mujh se bichhad ke woh bhi bahut ghum se choor tha.

Roya tha kaun kaun mujhe kuchh khabar nahin,
main uss ghadi watan se kayi meel door tha.

Shaam-e-firaaq aayi toh dil doobne laga,
hum ko bhi apne aap pe kitna ghuroor tha.

Chehra tha ya sadaa thi kisi bhooli yaad ki,
aankhen thi uss ki yaaro ki dariya-e noor tha.

Nikla jo chaand aayi mehak tez se ‘munir
mere siwa bhi baagh mein koi zaroor tha. !!

Munir Niazi

Makaan Mein Qaid-e-Sada Ki Dahshat..

Makaan mein qaid-e-sadaa ki dahshat,
makaan se baahar khalaa ki dahshat.

Hawa hai khauf-e-khuda se khaali,
hai iss nagar mein balaa ki dahshat.

Ghira hua hun main har taraf se,
hai aaine mein hawaa ki dahshat.

Zameen pe har simt had-e-aakhir,
falak pe la-intiha ki dahshat.

Shajar ke saaye mein maut dekho,
samar mein uss ke fanaa ki dahshat. !!

Munir Niazi

Ishq Ki Daastan Hai Pyare..

Ishq ki daastan hai pyare,
apni apni zubaan hai pyare.

Kal tak aye dard ye tapaak na tha,
aaj kyon meharbaan hai pyare.

Saaya-e-ishq se khuda hi bachaaye,
ek hi qahar maan hai pyare.

Iss ko kya keejiye jo lab na khulen,
yun toh munh mein zubaan hai pyare.

Ye taghaful bhi hai nigah-aamez,
iss mein bhi ek shaan hai pyare.

Jis ne aye dil diya hai apna ghum,
uss se tu badgumaan hai pyare.

Dil ka aalam nigaah kya jaane,
ye toh sirf ek zubaan hai pyare.

Mere ashkon mein ehtimaam na dekh,
aashiqi ki zubaan hai pyare.

Hum zamaane se inteqaam toh lein,
ek haseen darmiyaan hai pyare.

Ishq ki ek ek nadaani,
ilm-o-hikmat ki jaan hai pyare.

Tu nahin main hun main nahin tu hai,
ab kuchh aisa gumaan hai pyare.

Kehne suNne mein jo nahin aati,
woh bhi ek daastaan hai pyare.

Rakh qadam phoonk phoonk kar nadaan,
zarre zarre mein jaan hai pyare.

Kis ko dekhe se dil ko chot lagi,
kyon ye utri kamaan hai pyare.

Teri barham-khiraamiyon ki kasam,
dil bahut sakht jaan hai pyare.

Haan tere ehad mein ‘jigar ke siwa
har koi shaadmaan hai pyare. !!

Jigar Moradabadi

Hum Ko Mita Sake Ye Zamaane Mein Dum Nahin..

Hum ko mita sake ye zamaane mein dum nahin,
hum se zamaana khud hai zamaane se hum nahin.

Be-faayda alam nahin bekaar ghum nahin,
taufeeq de khuda toh ye nemat bhi kam nahin.

Meri zubaan pe shikwa-e-ahl-e-sitam nahin,
mujh ko jagaa diya yahi ehsaan kam nahin.

Ya rab! hujoom-e-dard ko de aur wus.aten
daaman toh kya abhi meri aankhen bhi namm nahin.

Shikwa toh ek chhed hai lekin haqeeqatan,
tera sitam bhi teri inaayat se kam nahin.

Milta hai kyon maza sitam-e-rozgaar mein,
tera karam bhi khud jo shareek-e-sitam nahin.

Ab ishq uss muqaam pe hai justujoo-navard
saaya nahin jahaan koi naqs-e-kadam nahin.

Zaahid kuchh aur ho na ho maikhaane mein magar,
kya kam ye hai ki shikwa-e-dair-o-haram nahin.

Marg-e Jigar pe kyon teri aankhen hain ashk-rez
ek saaniha sahi magar itna aham nahin. !!

Jigar Moradabadi

Kis Qadar Zulm Dhaya Karte Ho..

Kis qadar zulm dhaya karte ho,
ye jo tum bhool jaya karte ho.

Kis ka ab haath rakh ke seene pe,
dil ki dhadkan sunaya karte ho.

Hum jahan chaai peene jaate the,
kya wahan ab bhi aaya karte ho.

Kaun hai ab ki jis ke chehre pe,
apni palkon ka saaya karte ho.

Kyon mere dil mein rakh nahin dete,
kis liye ghum uthaya karte ho.

Phone par geet jo sunaate the,
ab woh geet kis ko sunaaya karte ho.

Aakhiri khat mein uss ne likha tha,
tum mujhe yaad aaya karte ho. !!

Wasi Shah

Duniya Mein Hun Duniya Ka Talabgaar Nahin Hun..

Duniya mein hun, duniya ka talabgaar nahin hun
bazaar se guzra hun, kharidaar nahin hun.

Zinda hun magar zeest ki lazzat nahi baaqi
har-chand ki hun hosh mein, hoshiyar nahin hun.

Iss khana-e hasti se guzar jaaunga be-laus
saaya hun faqat naqsh-ba-deewar nahin hun.

Afasurda hun ibaarat se dawaa ki nahin haajat
ghum ka mujhe ye zauf hai beemaar nahin hun.

Woh gul hun khizan ne jise barbaad kiya hai
uljhun kisi daaman se main woh khaar nahin hun.

Ya rabb mujhe mahfooz rakh uss buut ke sitam se
main uss ki inaayat ka talabgaar nahin hun.

Go daava-e taqwaa nahin dargaah-e khuda mein
buut jis se hon khush aisa gunahgaar nahin hun.

Afsurdagi-o zauf ki kuchh had nahin ‘akbar
kaafir ke muqaabil mein bhi deen-daar nahin hun. !!

Akbar Allahabadi

Sab Kuchh Khaak Hua Hai Lekin Chehra Kya Noorani Hai..

Sab kuchh khaak hua hai lekin chehra kya noorani hai,
patthar neeche baith gaya hai, oopar behta paani hai.

Bachpan se meri aadat hai phool chhupa kar rakhta hun,
haathon mein jalta sooraj hai, dil mein raat ki rani hai.

Dafan hue raaton ke kisse ek chahat ki khamoshi hai,
sannaton ki chaadar odhe ye deewar puraani hai.

Uss ko paa kar itraaoge, kho kar jaan ganwa doge
baadal ka saaya hai duniya, har shayy aani jaani hai.

Dil apna ek chaand nagar hai acchhi soorat waalon ka,
shehar mein aa kar shayad hum ko ye jaagir ganwaani hai.

Tere badan pe main phoolon se uss lamhe ka naam likhun,
jis lamhe ka main afsaana, tu bhi ek kahani hai. !!

Bashir Badr

Bheegi Hui Aankhon Ka Ye Manzar Na Milega..

Seprating-arguing-Boy-and-girl-on-railway-station-in-rain-poetry-shayari

Bheegi hui aankhon ka ye manzar na milega,
ghar chhod ke mat jaao kahin ghar na milega.

Phir yaad bahut aayegi zulfon ki ghani shaam,
jab dhoop me saaya koi sar par na milega.

Aansoo ko kabhi oss ka qatra na samajhna,
aisa tumhe chaahat ka samundar na milega.

Iss khwaab ke mahaul mein be’khwaab hain aankhen,
bazaar mein aisa koi zewar na milega.

Ye soch lo ab aakhiri saaya hai mohabbat,
iss dar se uthoge toh koi dar na milega. !!

Bashir Badr

Aaya Hi Nahin Hum Ko Aahista Guzar Jana..

Aaya hi nahin hum ko aahista guzar jana,
sheeshe ka muqaddar hai takraa ke bikhar jana.

Taaron ki tarah shab ke seene mein utar jana,
aahat na ho kadmon ki iss tarah guzar jana.

Nashe mein sanbhalne ka funn yun hi nahin aata,
inn zulfon se seekha hai lehra ke sanwar jana.

Bhar jayenge aankhon mein aanchal se bandhe baadal,
yaad aayega jab gul par shabnam ka bikhar jana.

Har mod pe se do aankhen hum se yehi kahti hain,
jis tarah bhi mumkin ho tum laut ke ghar jana.

Patthar ko mera saaya aaina sa chamka de,
jana toh mera sheesha yun dard se bhar jana.

Ye chaand sitaare tum auron ke liye rakh lo,
hum ko yahin jeena hai hum ko yahin mar jana.

Jab toot gaya rishta sar-sabz pahaadon se,
phir tez hawaa jaane kis ko hai kidhar jana. !!

Bashir Badr

Kisne Sang-e Khaamoshi Pheinka Bhare Bazaar Par..

Kis ne sang-e khaamoshi pheinka bhare bazaar par,
Ek sukoot-e-marg* taari hai darr-o deewaar par.

Tune apne zulf ke saaye mein afsaane kahe,
Mujh ko zanjeeren mili hain jurrat-izhaar par.

Shaakh-e uriyaan par khila ek phool iss andaaz se,
Jis tarah taaza lahoo chamke nayi talwaar par.

Sangdil ahbaab ke daaman mein ruswaai ke phool,
Maine dekha hai naya manzar faraaz-e-daar* par.

Ab koi tohmat bhi wajah-e karb-e ruswaai nahi,
Zindagi ek umar se chup hai tere israar par.

Main sar-e maqtal hadees zindagi kehta raha,
Ungliyan uthti rahi ‘mohsin mere kirdaar par. !!

*[ Sukoot-e-marg=silence of death,
Faraaz-e-daar=elevated ]

Mohsin Naqvi