Home / Raat Shayari (page 2)

Raat Shayari

Udas Raat Hai Koi Toh Khwab De Jaao – Bashir Badr

Bashir Badr Poetry

Udaas raat hai koi toh khwaab de jaao,
mere gilaas mein thodi sharaab de jaao.

Bahut se aur bhi ghar hain khuda ki basti mein,
faqeer kab se khada hai jawaab de jaao.

Main zard patton pe shabnam saza ke laaya hun,
kisi ne mujh se keha tha hisaab de jaao.

Meri nazar mein rahe doobne ka manzar bhi,
guroob hota hua aaftaab de jaao.

Fir iss ke baad nazaare nazar ko tarsenge,
woh ja raha hai khizaan ke gulaab de jaao.

Hazaar safhon ka deewan kaun padhta hai,
bashir badr’ koi intekhaab de jaao. !!

Bashir Badr Poetry Collection

Subscribe us for Bashir badr & all urdu legend’s poetry, Ghazals, poems, nazms, shayaries.

Kaise Kahen Ki Yaad-e-Yaar Raat Ja Chuki Bahut..

Habib Jalib Poetry

Kaise kahen ki yaad-e-yaar raat jaa chuki bahut,
raat bhi apne saath saath aansoo baha chuki bahut.

Chaand bhi hai thaka thaka taare bhi hain bujhe bujhe,
tere milan ki aas phir deep jala chuki bahut.

Aane lagi hai ye sadaa door nahin hai shehar-e-gul,
duniya humari raah mein kaante bichha chuki bahut.

Khulne ko hai qafas ka dar paane ko hai sukoon nazar,
aey dil-e-nazar shaam-e-ghum hum ko rula chuki bahut.

Apni qayaadaton mein ab dhoondenge log manzilen,
raahzanon ki rahbari raah dikha chuki bahut. !!

– Click Here For Habib Jalib Poetry, Poems  Collection

Tum Puchho Aur Main Na Bataaun Aise Toh Halat Nahi..

Qateel Shifai Poetry

Tum poochho aur main na bataaun aise toh haalaat nahin,
ek zara sa dil toota hai aur toh koi baat nahin.

Kis ko khabar thi saanwale baadal bin barse udd jaate hain,
saawan aaya lekin apni qismat mein barsaat nahin.

Toot gaya jab dil toh phir ye saans ka naghma kya ma.ani,
goonj rahi hai kyon shehnaai jab koi baaraat nahin.

Ghum ke andhiyaare mein tujh ko apna saathi kyon samjhun,
tu phir tu hai mera toh saaya bhi mere saath nahin.

Maana jeevan mein aurat ek baar mohabbat karti hai,
lekin mujh ko ye toh bata de kya tu aurat zaat nahin?

Khatm hua mera fasaana ab ye aansoo ponchh bhi lo,
jis mein koi taara chamke aaj ki raat woh raat nahin.

Mere ghumgeen hone par ahbaab hain yun hairaan ‘qateel
jaise main patthar hun mere seene mein jazbaat nahin. !!

– Click Here For Qateel Shifai Poetry, Poems Collection

Marhala Raat Ka Jab Aayega..

Qateel Shifai Poetry

Marhala raat ka jab aayega,
jism saaye ko taras jaayega.

Chal padi rasm jo kaj-fahmi ki,
baat kya phir koi kar paayega.

Sach se katraaye agar log yahan,
lafz mafhoom se katraayega.

Aitbaar uss ka humesha karna,
woh toh jhoothi bhi kasam khaayega.

Tu na hogi toh phir aye shaam-e-firaaq,
kaun aa kar humen behalaayega.

Hum usey yaad bahut aayenge,
jab usey bhi koi thukraayega.

Kaayenaat uss ki meri zaat mein hai,
mujh ko kho kar woh kise paayega.

Na rahe jab woh bhale din bhi ‘qateel
ye zamaana bhi guzar jaayega. !!

– Click Here For Qateel Shifai Poetry, Poems Collection

Ek Jaam Khanakta Jaam Ki Saqi Raat Guzarne Waali Hai..

Qateel Shifai Poetry

Ek jaam khanakta jaam ki saaqi raat guzarne waali hai,
ek hosh-ruba inaam ki saaqi raat guzarne waali hai.

Woh dekh sitaaron ke moti har aan bikharte jaate hain,
aflaak pe hai kohraam ki saaqi raat guzarne waali hai.

Go dekh chuka hun pehle bhi nazaara dariya-noshi ka,
ek aur salaa-e-aam ki saaqi raat guzarne waali hai.

Ye waqt nahin hai baaton ka palkon ke saaye kaam mein laa,
ilhaam koi ilhaam ki saaqi raat guzarne waali hai.

Madhoshi mein ehsaas ke oonche zeene se gir jaane de,
iss waqt na mujh ko thaam ki saaqi raat guzarne waali hai. !!

–  Click Here For Qateel Shifai Poetry, Poems Collection

Halaat Ki Bheegi Raat Bhi Hai Jazbaat Ka Tez Alaav Bhi..

Qateel Shifai Poetry

Halaat ki bheegi raat bhi hai jazbaat ka tez alaav bhi,
main kaun si aag mein jal jaaun aye nukta-waro samjhaao bhi.

Har-chand nazar se jhele hain har baar sunahre ghaao bhi,
hum aaj bhi dhokha kha lenge tum bhesh badal kar aao bhi.

Girdaab ke khooni halqon se jab khel chuki hai naav bhi,
patwaar badalna kya maani? mallaahon ko samjhaao bhi.

Be-kaif jhakole kaanton ko shaadaab toh kya kar paayenge,
jo phool pade hain raahon mein un phoolon ko mehkaao bhi.

Hum se toh jafaaon ke shikwe tum hans kar chheen bhi sakte ho,
hum dil ko pashemaan kar lenge tum pyaar se aankh jhukaao bhi.

Gulrang charaaghon ki lau se tareek ujaale phoot bahe,
taaq mein ghor andhera hai is rang-mehal ko dhaao bhi. !!

–  Click Here For Qateel Shifai Poetry, Poems Collection