Home / Poets / Rahat Indori (page 2)

Rahat Indori

Main Laakh Keh Dun Ki Aakash Hun Zameen Hun Main..

Main laakh keh dun ki aakash hun zameen hun main,
magar usey toh khabar hai ki kuchh nahin hun main.

Ajeeb log hain meri talaash mein mujh ko,
wahan dhoond rahe hain jahan nahin hun main.

Main aainon se toh mayoos laut aaya tha,
magar kisi ne bataya bahut haseen hun main.

Woh zarre zarre mein mauzood hai magar main bhi,
kahin nahin hun kahan hun kahin nahin hun main.

Woh ek kitaab jo mansoob tere naam se hai,
ussi kitaab ke andar kahin kahin hun main.

Sitaaro aao meri raah mein bikhar jaao,
ye mera hukum hai halaanki kuchh nahin hun main.

Yahin husain bhi guzre yahin yazeed bhi tha,
hazaar rang mein doobi hui zameen hun main.

Ye boorhi qabaren tumhen kuchh nahin bataayengi,
mujhe talaash karo dosto yahin hun main. !!

Rahat Indori

Mere Ashkon Ne Kayi Aankhon Mein Jal Thal Kar Diya..

Mere ashkon ne kayi aankhon mein jal thal kar diya,
ek paagal ne bahut logon ko paagal kar diya.

Apni palkon par sajaa kar mere aansoo aap ne,
raaste ki dhool ko aankhon ka kaajal kar diya.

Maine dil de kar usey ki thi wafa ki ibtida,
uss ne dhokha de ke ye qissa mukammal kar diya.

Ye hawaayen kab nigaahen pher lein kis ko khabar,
shohraton ka takht jab toota toh paidal kar diya.

Devtaaon aur khudaaon ki lagaayi aag ne,
dekhte hi dekhte basti ko jungle kar diya.

Zakhm ki soorat nazar aate hain chehron ke nuqoosh,
hum ne aainon ko tehzeebon ka maqtal kar diya.

Shehar mein charcha hai aakhir aisi ladki kaun hai,
jis ne achchhe-khaase ek shaayar ko paagal kar diya. !!

Rahat Indori

Kahin Akele Mein Mil Kar Jhinjhod Dunga Usey..

Kahin akele mein mil kar jhinjhod dunga usey,
jahan jahan se woh toota hai jod dunga usey.

Mujhe woh chhod gaya ye kamaal hai uss ka,
iraada maine kiya tha ki chhod dunga usey.

Badan churaa ke woh chalta hai mujh se sheesha-badan
usey ye dar hai ki main tod phod dunga usey.

Paseene baanTta phirta hai har taraf sooraj,
kabhi jo haath laga toh nichod dunga usey.

Maza chakhaa ke hi maana hun main bhi duniya ko,
samajh rahi thi ki aise hi chhod dunga usey. !!

Rahat Indori

Andhere Chaaron Taraf Saayen Saayen Karne Lage..

Andhere chaaron taraf saayen saayen karne lage,
chiraagh haath utha kar duaayen karne lage.

Taraqqi kar gaye beemariyon ke saudagar,
ye sab mareez hain jo ab dawaayen karne lage.

Lahoo-luhaan pada tha zameen par ek sooraj,
parinde apne paron se hawaayen karne lage.

Zameen par aa gaye aankhon se toot kar aansoo,
buri khabar hai farishte khataayen karne lage.

Jhulas rahe hain yahan chaanv baantne waale,
woh dhoop hai ki shajar iltizaayen karne lage.

Azeeb rang tha majlis ka khoob mehfil thi,
saffed posh uthe kaayen kaayen karne lage. !!

Rahat Indori

Nadi Ne Dhoop Se Kya Keh Diya Rawaani Mein..

Nadi ne dhoop se kya keh diya rawaani mein,
ujaale paanv patakne lage hain paani mein.

Ye koi aur hi kirdaar hai tumhari tarah,
tumhara zikr nahin hai meri kahaani mein.

Ab itni saari shabon ka hisaab kaun rakhe,
bade sawaab kamaaye gaye jawaani mein.

Chamakta rahta hai sooraj-mukhi mein koi aur,
mehak raha hai koi aur raat-rani mein.

Ye mauj mauj nayi hulchalen si kaisi hain,
ye kis ne paanv utaare udaas paani mein.

Main sochta hun koi aur kaarobaar karun,
kitaab kaun kharidega iss giraani mein. !!

Rahat Indori

Haath Khaali Hain Tere Shehar Se Jaate Jaate..

Haath khaali hain tere shehar se jaate jaate,
jaan hoti toh meri jaan lutaate jaate.

Ab toh har haath ka patthar humen pehchaanta hai,
umar guzri hai tere shehar mein aate jaate.

Ab ke mayoos hua yaaron ko rukhsat kar ke,
jaa rahe the toh koi zakhm lagaate jaate.

Rengne ki bhi ijaazat nahin hum ko warna,
hum jidhar jaate naye phool khilaate jaate.

Main toh jalte hue sehraaon ka ek patthar tha,
tum toh dariya the meri pyaas bujhaate jaate.

Mujh ko rone ka saleeqa bhi nahin hai shayad,
log hanste hain mujhe dekh ke aate jaate.

Hum se pehle bhi musaafir kayi guzre honge,
kam se kam raah ke patthar toh hataate jaate. !!

Rahat Indori

Masjidon Ke Sehan Tak Jana Bahut Dushwaar Tha..

Masjidon ke sehan tak jana bahut dushwaar tha,
der se nikla toh mere raaste mein daar tha.

Dekhte hi dekhte shehron ki raunaq ban gaya,
kal yahi chehra humare aainon par baar tha.

Apni qismat mein likhi thi dhoop ki naraazgi,
saaya-e-deewar tha lekin pas-e-deewar tha.

Sab ke dukh sukh uss ke chehre par likhe paaye gaye,
aadmi kya tha humare shehar ka akhbaar tha.

Ab mohalle bhar ke darwaazon pe dastak hai naseeb,
ek zamana tha ki jab main bhi bahut khuddar tha. !!

Rahat Indori