Home / Poets / Qateel Shifai (page 4)

Qateel Shifai

Namaabar Apna Hawaaon Ko Banaane Waale..

Namaabar apna hawaaon ko banaane waale,
ab na aayenge plat kar kabhi jaane waale.

Kya milega tujhe bikhre hue khwaabon ke siwa,
ret par chaand ki tasweer banaane waale.

Maikade band hue dhoond raha hun tujh ko,
tu kahan hai mujhe aankhon se pilaane waale.

Tu pighal jaaye koi mom ka putla toh nahin,
khud na jal jaaye tujhe haath lagaane waale.

Sab ne pehna tha bade shouq se kaaghaz ka libaas,
jis qadar log the baarish mein nahaane waale.

Mar gaye hum toh ye qatbe pe likha jaayega.
so gaye aap zamaane ko jagaane waale.

Dar-o-deewar pe hasrat si barasti hai ‘qateel
jaane kis desh gaye pyaar nibhaane waale. !!

Qateel Shifai

Chaandi Jaisa Rang Hai Tera Sone Jaise Baal..

Chaandi  jaisa rang hai tera sone jaise baal,
ek tu hi dhanwaan hai gori baaqi sab kangaal.

Har aangan mein saje na tere ujle roop ki dhoop,
chhail-chhabeeli raani thoda ghooghat aur nikaal.

Bhar bhar nazren dekhen tujh ko aate jaate log,
dekh tujhe badnaam na kar de hirni jaisi chaal.

Beech mein rang-mahal hai tera khaayi chaaron aor,
hum se milne ki ab gori tu hi raah nikaal.

Ye duniya hai khud-gharzon ki lekin yaar ‘qateel
tu ne humara saath diya tu jeeye hazaaron saal. !!

Qateel Shifai

Siskiyaan Leti Hui Ghumgeen Hawaao Chup Raho..

Siskiyaan leti hui ghum-geen hawaao chup raho,
so rahe hain dard un ko mat jagaao chup raho.

Raat ka patthar na pighlega shuaaon ke baghair,
subah hone tak na bolo hum-nawaao chup raho.

Band hain sab maikadey saaqi bane hain muhtasib,
aye garajti goonjti kaali ghataao chup raho.

Tum ko hai maloom aakhir kaun sa mausam hai ye,
fasl-e-gul aane talak aye khush-nawaao chup raho.

Soch ki deewaar se lag kar hain ghum baithe hue,
dil mein bhi naghma na koi gungunaao chup raho.

Chhant gaye haalaat ke baadal toh dekha jaayega,
waqt se pehle andhere mein na jaao chup raho.

Dekh lena ghar se niklega na humsaaya koi,
aye mere yaaro mere dard-aashnaao chup raho.

Kyon shareek-e-ghum banaate ho kisi ko aye ‘qateel
apni sooli apne kaandhe par uthaao chup raho. !!

Qateel Shifai

Tumhari Anjuman Se Uth Ke Deewaane Kahan Jaate..

Tumhari anjuman se uth ke deewaane kahan jaate,
jo waabasta hue tum se woh afsaane kahan jaate.

Nikal kar dair-o-kaaba se agar milta na maikhaana,
toh thukraaye hue insaan khuda jaane kahan jaate.

Tumhari berukhi ne laaj rakh li baada-khaane ki,
tum aankhon se pila dete toh paimaane kahan jaate.

Chalo achchha hua kaam aa gayi deewaangi apni,
wagarna hum zamaane bhar ko samjhaane kahan jaate.

Qateel’ apna muqaddar ghum se begaana agar hota,
toh phir apne paraaye hum se pahchaane kahan jaate. !!

Qateel Shifai

Likh Diya Apne Dar Pe Kisi Ne Iss Jagah Pyar Karna Mana Hai..

Likh diya apne dar pe kisi ne iss jagah pyar karna mana hai,
pyar agar ho bhi jaaye kisi ko iss ka izhaar karna mana hai.

Un ki mehfil mein jab koi aaye pehle nazaren woh apni jhukaaye,
woh sanam jo khuda ban gaye hain un ka deedar karna mana hai.

Jaag uthenge toh aahen bharenge husn waalon ko ruswa karenge,
so gaye hain jo furkat ke maare un ko bedaar karna mana hai.

Hum ne ki arz-e banda-parwar kyon sitam dha rahe ho hum par,
baat sun kar woh humari bole hum se taqraar karna mana hai.

Saamne jo khula hai jharokha kha na jaana ‘qateel uss ka dhokha,
ab bhi apne liye uss gali mein shuak-e-deedar karna mana hai. !!

Qateel Shifai

Aao Koi Tafreeh Ka Samaan Kiya Jaaye..

Aao koi tafreeh ka samaan kiya jaaye,
phir se kisi waaiz ko pareshaan kiya jaaye.

Be-larzish-e-pa-mast hon un aankhon se pee kar,
yun mohtasib-e-shehar ko hairaan kiya jaaye?.

Har shayy se muqaddas hai khyaalat ka rishta?,
kyon musalihaton par isey qurbaan kiya jaaye?.

Muflis ke badan ko bhi hai chaadar ki zaroorat,
ab khul ke mazaaron pe ye ailaan kiya jaaye?.

Woh shakhs jo deewaanon ki izzat nahin krta,
uss shakhs ka bhi chaak girebaan kiya jaaye.

Pehle bhi ‘qateel’ aankhon ne khaaye kayi dhokhe,
ab aur na binaai ka nuksaan kiya jaaye. !!

Qateel Shifai

Saari Basti Mein Ye Jaadoo Nazar Aaye Mujh Ko..

Saari basti mein ye jaadoo nazar aaye mujh ko,
jo daricha bhi khule tu nazar aaye mujh ko.

Sadiyon ka ratt-jaga meri raaton mein aa gaya,
main ek haseen shakhs ki baaton mein aa gaya.

Jab tassawur mera chupke se tujhe chhoo aaye,
der tak apne badan se teri khushboo aaye.

Gustaakh hawaaon ki shikaayat na kiya kar,
udd jaaye dupatta toh khanak odh liya kar.

Tum poochho aur main na bataaun aise toh halaat nahin,
ek zara sa dil toota hai aur toh koi baat nahin.

Raat ke sannate mein hum ne kya kya dhokhe khaaye hain,
apna hi dil jab dhadka toh hum samjhe woh aaye hain. !!

Qateel Shifai