Home / Poets / Nasir Kazmi (page 2)

Nasir Kazmi

Ye Shab Ye Khyaal O Khwab Tere..

Nasir Kazmi Poetry

Ye shab ye khyaal-o-khwaab tere,
kya phool khile hain munh-andhere.

Shole mein hai ek rang tera,
baaqi hain tamaam rang mere.

Aankhon mein chhupaaye phir reha hun,
yaadon ke bujhe hue sawere.

Dete hain suraagh fasl-e-gul ka,
shaakhon pe jale hue basere.

Manzil na mili toh qaafilon ne,
raste mein jama liye hain dere.

Jangal mein hui hai shaam hum ko,
basti se chale the munh-andhere.

Rudaad-e-safar na chhed ‘nasir’
phir ashk na tham sakenge mere. !!

– Click here for  Nasir Kazmi Poetry collection

Thodi Der Ko Jee Behla Tha..

Nasir Kazmi Poetry

Thodi der ko jee behla tha,
phir teri yaad ne gher liya tha.

Yaad aayi woh pehli baarish,
jab tujhe ek nazar dekha tha.

Hare gilaas mein chaand ke tukde,
laal suraahi mein sona tha.

Chaand ke dil mein jalta sooraj,
phool ke seene mein kaanta tha.

Kaghaz ke dil mein chingaari,
khas ki zabaan par angaara tha.

Dil ki soorat ka ek patta,
teri hatheli par rakha tha.

Shaam toh jaise khwaab mein guzri,
aadhi raat nasha toota tha.

Shehar se door hare jangal mein,
barish ne humein gher liya tha.

Subh hui toh sab se pehle,
maine tera munh dekha tha.

Der ke baad mere aangan mein,
surkh anaar ka phool khila tha.

Der ke murjhaaye pedon ko,
khushbu ne aabaad kiya tha.

Shaam ki gehri unchaai se,
hum ne dariya ko dekha tha.

Yaad aayi kuchh aisi baaten,
main jinhen kab ka bhool chuka tha. !!

– Click here for  Nasir Kazmi Poetry collection

Yun Tere Husn Ki Tasweer Ghazal Mein Aaye..

Nasir Kazmi Poetry

Yun tere husn ki tasweer ghazal mein aaye,
jaise bilqis sulemaan ke mehal mein aaye.

Jabr se ek hua zaayeqa-e-hijr-o-visaal,
ab kahan se woh maza sabr ke phal mein aaye.

Ye bhi aaraaish-e-hasti ka taqaza tha ki hum,
halqa-e-fikr se maidaan-e-amal mein aaye.

Har qadam dast-o-garebaan hai yahan khair se shar,
hum bhi kis marka-e-jung-o-jadal mein aaye.

Zindagi jin ke tasawwur se jila paati thi,
haaye kya log the jo dum-e-ajal mein aaye. !!

Click here for  Nasir Kazmi Poetry collection

Dil Mein Aur Toh Kya Rakha Hai..

Dil mein aur toh kya rakha hai,
tera dard chhupa rakha hai.

Itne dukhon ki tez hawa mein,
dil ka deep jala rakha hai.

Dhoop se chehron ne duniya mein,
kya andher macha rakha hai.

Iss nagri ke kuchh logon ne,
dukh ka naam dawaa rakha hai.

Wada-e yaar ki baat na chhedo,
ye dhokha bhi kha rakha hai.

Bhool bhi jaao beeti baaten,
in baaton mein kya rakha hai.

Chup chup kyon rahte ho ‘nasir
ye kya rog laga rakha hai. !!

Nasir Kazmi

Dhoop Nikli Din Suhaane Ho Gaye..

Dhoop nikli din suhaane ho gaye,
chaand ke sab rang pheeke ho gaye.

Kya tamasha hai ki beayyaam-e-gul,
tanhaiyon ke haath peele ho gaye.

Iss qadar roya hun teri yaad mein,
aaine aankhon ke dhundle ho gaye.

Hum bhala chup rahne wale the kahin,
haan magar halaat aise ho gaye.

Ab toh khush ho jaayen arbaab-e-hawas,
jaise woh the hum bhi waise ho gaye.

Husn ab hungama-aara ho toh ho,
ishq ke daave toh jhoothe ho gaye.

Aye sukoot-e-shaam-e-ghum ye kya hua,
kya woh sab beemaar achchhe ho gaye.

Dil ko tere ghum ne phir aawaaz di,
kab ke bichhde phir ikatthe ho gaye.

Aao ‘nasir hum bhi apne ghar chalen,
band iss ghar ke dareeche ho gaye. !!

Nasir Kazmi

Din Dhala Raat Phir Aa Gayi So Raho So Raho..

Din dhala raat phir aa gayi so raho so raho,
manzilon chhaa gayi khamoshi so raho so raho.

Sara din tapte sooraj ki garmi mein jalte rahe,
thandi thandi hawa phir chali so raho so raho.

Garam sunsaan qarion ki dharti mehakne lagi,
khaak rashk-e-iram ban gayi so raho so raho.

Razm-gaah-e-jahaan ban gayi jaa-e-aman-o-amaan,
hai yehi waqt ki raagni so raho so raho.

Kaise sunsaan hain aasmaan chup khade hain makaan,
hai fazaa ajnabi ajnabi so raho so raho.

Thak gaye naaqa-o-sasrbsan tham gaye kaarwan,
ghantiyon ki sadaa so gayi so raho so raho.

Chaandni aur dhuen ke siwa door tak kuchh nahin,
so gayi shehar ki har gali so raho so raho.

Gardish-e-waqt ki loriyaan raat ki raat hain,
phir kahan ye hawa ye nami so raho so raho.

Saari basti ke log iss madhur layy mein kho gaye,
door bajne lagi baansuri so raho so raho.

Door shaakhon ke jhurmat mein jugnu bhi gum ho gaye,
chaand mein so gayi chaandni so raho so raho.

Ghar ke deewar-o-dar raah tak tak ke shal ho gaye,
ab na aayega shayad koi so raho so raho.

Sust raftaar taare bhi aankhen jhapakne lage,
ghum ke maaro ghadi do ghadi so raho so raho.

Munh andhere hi ‘nasir kise dhoondne chal diye,
door hai abhi subha-e-roshan so raho so raho. !!

Nasir Kazmi