Home / Poets / Nasir Kazmi

Nasir Kazmi

Main Hun Raat Ka Ek Baja Hai..

Nasir Kazmi Poetry

 Main hun raat ka ek baja hai,
 khaali rasta bol raha hai. 

 Aaj toh yun khaamosh hai duniya,
 jaise kuchh hone waala hai.

 Kaisi andheri raat hai dekho ,
 apne aap se dar lagta hai.

 Aaj toh shehar ki ravish ravish par ,
 patton ka mela sa laga hai.

 Aao ghaas pe sabhaa jamaayen,
 maikhana toh band pada hai.

 Phool toh saare jhadh gaye lekin,
 teri yaad ka zakhm haraa hai.

 Tune jitna pyar kiya tha,
 dukh bhi mujhe utna hi diya hai.

 Ye  bhi hai ek tarah ki mohabbat,
 main tujh se  tu mujh se juda hai.

 Ye teri manzil woh mera rasta,
 tera mera saath hi kya hai.

 Maine toh eroothna, k baat kehi thi,
 kya tu sach-much rooth gaya hai.

 Aisa gaahak kaun hai jis ne,
 sukh de kar dukh mol liya hai.

 Tera rasta takte takte,
 khet gagan ka sookh chala hai.

 Khidki khol ke dekh toh baahar,
 der se koi shakhs khada hai.

 Saari basti so gayi ‘nasir
 tu ab tak kyon jaag raha hai. !!

Nasir Kazmi Poetry Collection

Subscribe us for nasir kazmi shayari, ghazals, urdu poets, nazms, poems, shairy, hindi, english font.

 

Ye Bhi Kya Shaam e Mulaqat Aai..

Nasir Kazmi Poetry

Ye bhi kya shaam-e-mulaaqaat aayi,
lab pe mushkil se teri baat aayi.

Subh se chup hain tere hijr-naseeb,
haaye kya hoga agar raat aayi.

Bastiyaan chhod ke barse baadal,
kis qayaamat ki ye barsaat aayi.

Koi jab mil ke hua tha rukhsat,
dil-e betaab wahi raat aayi.

Saaya-e-zulf-e-butaan mein ‘nasir
ek se ek nayi raat aayi. !!

Nasir Kazmi Poetry Collection

Subscribe us for Nasir Kazmi Poems, Urdu poetry, Urdu Poets, Nazms, Ghazals, Shayari, Shairy.

Dil Dhadakne Ka Sabab Yaad Aaya..

Nasir Kazmi Poetry

Dil dhadakne ka sabab yaad aaya,
woh teri yaad thi ab yaad aaya.

Aaj mushkil tha sambhalna aey dost,
tu museebat mein ajab yaad aaya.

Din guzaara tha badi mushkil se,
phir tera waada-e-shab yaad aaya.

Tera bhoola hua paimaan-e-wafa,
mar rahenge agar ab yaad aaya.

Phir kayi log nazar se guzre,
phir koi shehar-e-tarab yaad aaya.

Haal-e dil hum bhi sunaate lekin,
jab woh rukhsat hua tab yaad aaya.

Baith kar saaya-e-gul mein ‘nasir
hum bahut roye woh jab yaad aaya. !!

Click here for read Nasir Kazmi Poetry collection

Zabaan Sukhan Ko Sukhan Baankpan Ko Tarsega..

Nasir Kazmi Poetry

Zabaan sukhan ko sukhan baankpan ko tarsega,
sukhan-kada meri tarz-e-sukhan ko tarsega.

Naye pyaale sahi tere daur mein saaqi,
ye daur meri sharaab-e-kuhan ko tarsega.

Mujhe toh khair watan chhod kar aman na mili,
watan bhi mujh se ghareeb-ul-watan ko tarsega.

Inhi ke dum se farozaan hain millaton ke charaagh,
zamaana sohbat-e-arbaab-e-fan ko tarsega.

Badal sako toh badal do ye baaghbaan warna,
ye baagh saaya-e-sarw-o-saman ko tarsega.

Hawa-e-zulm yehi hai toh dekhna ek din,
zameen paani ko sooraj kiran ko tarsega. !!

– Click here for  Nasir Kazmi Poetry collection

Dhoop Thi Aur Baadal Chhaya Tha..

Nasir Kazmi Poetry

Dhoop thi aur baadal chhaya tha,
der ke baad tujhe dekha tha.

Main iss jaanib tu uss jaanib,
beech mein patthar ka dariya tha.

Ek ped ke haath the khaali,
ek tehni par diya jala tha.

Dekh ke do jalte saayon ko,
main toh achanak seham gaya tha.

Ek ke donon paaon the ghayab,
ek ka poora haath kata tha.

Ek ke ulte pair the lekin,
woh tezi se bhaag raha tha.

Un se ulajh kar bhi kya leta,
teen the woh aur main tanha tha. !!

– Click here for  Nasir Kazmi Poetry collection

Ye Raat Tumhari Hai Chamakte Raho Taaro..

Nasir Kazmi Poetry

Ye raat tumhaari hai chamakte raho taaro,
woh aayen na aayen magar ummeed na haaro.

Shayad kisi manzil se koi qaafila aaye,
aashufta-saro subh talak yunhi pukaaro.

Din bhar toh chale ab zara dum le ke chalenge,
aey humsafro aaj yehin raat guzaaro.

Ye aalam-e-wehshat hai toh kuchh ho hi rahega,
manzil na sahi sar kisi deewar se maaro.

Ojhal hue jaate hain nigaahon se do aalam,
tum aaj kahan ho ghum-e-furqat ke sahaaro.

Khoya hai usey jis ka badal koi nahin hai,
ye baat magar kaun sune laakh pukaaro. !!

– Click here for  Nasir Kazmi Poetry collection

Apni Dhun Mein Rehta Hun..

Nasir Kazmi Poetry

Apni dhun mein rehta hun,
main bhi tere jaisa hun.

O pichhli rut ke saathi,
ab ke baras main tanha hun.

Teri gali mein saara din,
dukh ke kankar chunta hun.

Mujh se aankh milaaye kaun,
main tera aaina hun.

Mera diya jalaaye kaun,
main tera khaali kamra hun.

Tere siwa mujhe pehne kaun,
main tere tan ka kapda hun.

Tu jeevan ki bhari gali,
main jangal ka rasta hun.

Aati rut mujhe royegi,
jaati rut ka jhonka hun.

Apni lehar hai apna rog,
dariya hun aur pyaasa hun. !!

– Click here for  Nasir Kazmi Poetry collection