Home / Poets / Mohsin Naqvi (page 5)

Mohsin Naqvi

Ye Dil Ye Paagal Dil Mera Kyon Bujh Gaya Aawaargi..?

sehraa ki bheegi rett par maine likha aawaargi

Ye dil ye paagal dil mera kyon bujh gaya aawaaragi ?
iss dasht mein ek shehar tha woh kya hua aawaaragi ?

Kal shab mujhe be’shakl si aawaaz ne chaunka diya,
maine keha tu kaun hai uss ne keha aawaaragi.

Ek tu ki sadiyon se mere humraah bhi, humraaz bhi,
ek main ki tere naam se na’aashna aawaaragi.

Ye dard ki tanhaiyaN, ye dasht ka veeraan safar,
hum log toh ukta gaye apani suna aawaaragi.

Ek ajanabi jhonke ne jab puchha mere ghum ka sabab,
sehraa ki bheegi rett par maine likha aawaaragi.

Le ab toh dasht-e shab ki saari vusaten sone lagi,
ab jaagna hoga humein kab tak bata aawaaragi.

Kal raat tanha chaand ko dekha tha maine Khwaab mein,
Mohsin’ mujhe raas aayegi shaayad sada aawaaragi. !

Mohsin Naqvi

Mere Qaatil Ko Pukaaro Ki Main Zinda Hun Abhi..

Mere Qaatil Ko Pukaro Ki Main Zinda Hun Abhi,
Phir Se Maqtal* Ko Sanwaro Ki Main Zinda Hun Abhi.

Yeh Shab-e Hijar Toh Saathi Hai Meri Barson Se,
Jaao So Jao Sitaaro Ki Main Zinda Hun Abhi.

Yeh Pareshaan Se Gaisu Dekhe Nahi Jaate,
Apni Zulfun Ko Sanwaro Ki Main Zinda Hun Abhi.

Laakh Moujon Mein Ghira Hun, Abhi Dooba Toh Nahi,
Mujh Ko Saahil Se Pukaaro Ki Main Zinda Hun Abhi.

Qabar Se Aaj Bhi ‘Mohsin’ Ki Aati Hai Sada,
Tum Kahan Ho Mere Yaaro Ki Main Zinda Hun Abhi. !

*[Maqtal = Qatal ki jagah]

Zikr-e Shab-e Firaaq se Wehashat Usey Bhi Thi..

Sad Boy-happy girl, Mohsin Naqvi Ghazal

Zikr-e shab-e firaaq se wehashat usey bhi thi
Meri tarah kisi se muhabbat usey bhi thi

Mujh ko bhi shauq tha naye cheharon ki deed ka
Rastaa badal ke chalane ki aadat usey bhi thi

Uss raat der tak woh raha mahv-e guftagu
Masroof main bhi kam tha faraagat usey bhi thi

Sunta tha woh bhi sab se puraani kahaaniyan
Taaza rafaaqaton ki zarurat usey bhi thi

Mujh se bichhad ke shehar mein ghul-mil gaya woh shakhs
Haalanki shehar bhar se raqabat usey bhi thi

Woh mujh se badh ke zabt ka aadii tha jee gaya
Warna har ek saans qayaamat usey bhi thi …!!

Mohsin Naqvi

Mata-e Shaam-e Safar Bastiyon Mein Chhod Aaye..

Mata-e shaam-e safar bastiyon mein chhod aaye,
Bujhe charaagh hum apne gharon mein chhod aaye..!

Ghire hain lashkar-e aada mein ab ye sochte hain,
Hum apne teer toh apni safoon mein chhod aaye.

Hum apni darbadari ke mushahidey aksar,
Naseehaton ki tarah kamsino mein chhod aaye.

Bichhad ke tujh se chale hum toh ab ke youn bhi hua,
Ki teri yaad kahin raaston mein chhod aaye.

Hawa hi din mein parinde udaaye phirti hai,
Hawa hi phir se unhen ghonslon mein chhod aaye.

Humare baad bhi rounaq rahegi maqtal mein,
Hum ahl-e dil ko bade hoslon mein chhod aaye.

Udenge kya woh parinde jo apne rizq samait,
Safar ka shauq bhi toote paron mein chhod aaye.

Sada sukhi rahein chehre woh hum jinhe mohsin,
Bujhe gharon ki khuli khidkiyon mein chhod aaye. !!

Mohsin Naqvi

Tere Khyaal Mein Kuchh Aise Gum Reha Barason..

Tumhare Haath Ki Dastak Ki Aass Mein Mohsin,

Tere Khyaal Mein Kuchh Aise Gum Reha Barason,
Main Apne Aap Se Bhi Mil Nahi Saka Barason.. !

Kahin Woh Zaayqa Tehlil Hi Na Ho Jaye,
Main Tum Se Mil Kar Kisi Se Nahi Mila Barason.. !

Kaha Tha Tumne  Ki Tum Laut Ke Aaoge Eik Din,
So Main Jahan Tha Wahin Par Khada Raha Barason.. !

Tere Baghair Meri Umar Raayegaan Guzree,
Koi Bhi Kaam Nahi Theek Se Hua Barason.. !

Tumhare Haath Ki Dastak Ki Aass Mein Mohsin,
Main Apne Ghar Se Kahin Bhi Nahi Gaya Barason… !!

Mohsin Naqvi

Mujhe Phir Laut Jana Hai..

Mujhe phir lout jana hai..
Achanak toot jana hai..
Ki mere desh se aage,
koyi pardesi mera muntazir hai.. !
Aur mere doston ne mere haathon mein,
Safar ka Taar bhi pakda diya hai..
Guzashta kal ki sab baaten bhulaye ja raha hun..
par woh baaten jo tere ehsaas chehre par numaya thi..
Woh saare lafz yun ashqon ki soorat aankh mein utre hain..
Tere khamosh paikar mein chhupe.. ghumnaak afsaane,
Teri guftaar ki rimjim, teri raftaar k mousam, tere kirdaar ka moti,
Tere dil se ubalte be’awaaz se naghmen,
Tere chehre k haal-o hadd mein nighaahon mein chhupe dariya,
Tere ehsaas ki shiddat, tere jazbaat ki hiddat.. !
Main sab kuchh yaad rakhunga..
main sab kuchh yaad rakhunga. !
Teri khamosh awaazen mere maazi ka haasil ban k ubharenge. !
Mujhe ab lout jaane de… mujhe ab lout jaane de..
Achanak toot jaane de..
Mujhe phir lout jana hai ..
Achanak toot jana hai .!!

Mohsin Naqvi