Home / Poets / Mohsin Naqvi (page 4)

Mohsin Naqvi

Woh Log Hi Qadamon Se Zameen Chheen Rahe Hain..

Woh Log Hi Qadamon Se Zameen Chheen Rahe Hain,
Jo Log Mere Qadd Ke Baraabar Nahi Aate.

Ek Tum Ki Tumhaare Liye Main Bhi Meri Jaan Bhi,
Ek Main Ki Mujhe Tum Bhi Mayassar Nahi Aate.

Jis Shaan Se Loute Hain Ganwa Ke Dil-O Jaan Hum,
Iss Taur Se Toh Haare Hue Lashkar Nahi Aate.

Koi Toh Khabar Le Mere Dushman-e Jaan Ki,
Kuchh Din Se Mere Sehan Mein Patthar Nahi Aate.

Dil Bhi Koi Aaseib Ki Nagari Hai Ki “Mohsin
Jo Iss Se Nikal Jaate Hain Mudd Kar Nahi Aate. !!

Ashk Aankhon Mein Chhupaate Hue Thak Jata Hun..

Ashk Aankhon Mein Chhupaate Hue Thak Jata Hun,
Bojh Paani Ka Uthaate Hue Thak Jata Hun.

Paon Rakhte Hain Jo Mujh Par Unhein Ehsaas Nahi,
Main Nishaanaat Mitaate Hue Thak Jata Hun.

Barf Aisi Ki Pighalti Nahi Paani Ban Kar,
Pyaas Aisi Ki Bujhaate Hue Thak Jata Hun.

Achhi Lagti Nahi Iss Darja Shansaayi,
Haath Haathon Se Milaate Hue Thak Jata Hun.

Ghum Gusaari Bhi Ajab Kaar-e Mohabbat Hai Ki Main,
Rone Waalon Ko Hansaate Hue Thak Jata Hun.

Itni Qabarein Na Banao Mere Andar “Mohsin”
Main Charaaghon Ko Jalaate Hue Thak Jata Hun. !!

Wafa Mein Ab Ye Hunar Ikhtiyaar Karna Hai..

sad wating girl at night

Wafa mein ab ye hunar ikhtiyaar karna hai,
Woh sach kahe na kahe aitbaar karna hai.

Ye tujh ko jaagte rehne ka shouq kab se hua ?
Mujhe toh khair tera intezaar karna hai.

Hawa ke zadd mein jalaane hain ansuon ke chiraagh,
Kabhi ye jashn sar-e- raah guzaar karna hai.

Woh muskura ke naye waswason mein daal gaya,
Khyaal tha ki usey sharamsaar karna hai.

Misaal-e shaakh-e barhana khizan ke rutt mein kabhi,
Khud apne jism ko be’barg-o baar karna hai.

Tere firaaq mein din kis tarha katte apne,
Ki shughal-e shab toh sitaare shumaar karna hai.

Chalo ye ashk hi moti samajh ke bech aayein,
Kisi tarah toh humein rozgaar karna hai.

Kabhi toh dil mein chhupe zakhm bhi numayan hon,
Qaba samajh ke badan taar taar karna hai.

Khuda khabar ye koi zidd ki shouq hai mohsin,
Khud apni jaan ke dushman se pyaar karna hai. !!

Mohsin Naqvi

Jab Bhi Hansne Ke Zamaane Aaye..

Jab bhi hansne ke zamaane aaye,
Zakham phir yaad puraane aaye.

Baarha unko manaaya toh humein,
Rooth jaane ke bahaane aaye.

Phir mujhe toot ke chaha uss ne,
Phir bichhadne ke zamaane aaye.

Muskura kar humein milnae waale,
Zindagi bhar ko rulaane aaye.

Kitni mehroom thi neendein unki,
Khwaab bhi jin ko jagaane aaye.

Teri chahat ne thehrne na diya,
Raah mein kitne thikaane aaye.

Tu nahi hai toh hawa ka jhaunka,
Ghar ki zanjeer hilaane aaye.

Dil bujha hai na jale hain khemey,
Aap kyon jashn manaane aaye.?

Raas aaya jinhe sehra ‘Mohsin
Unki qismat mein khazaane aaye. !!

Kab Talak Shab Ke Andhere Mein Sehar Ko Tarse..

Kab talak shab ke andhere mein sehar ko tarse,
Woh musaafir jo bhare shehar mein ghar ko tarse.

Aankh thehre hue paani se bhi katraati hai,
Dil woh reh’roo ki samandar ke safar ko tarse.

Mujh ko uss qehat ke mousam se bacha rabb-e sukhan,
Jab koi ehal-e hunar, arz-e hunar ko tarse.

Ab ke iss taur musalat hua andhera har soo,
Hijar ki raat mere deeda-e tarr ko tarse.

Umar itni toh ataa kar mere fann ko khaaliq,
Mera dushman mere marne ki khabar ko tarse.

Uss ko paa kar bhi usey dhoondh rahi hain aankhein,
Jaise paani mein koi seep gohar ko tarse.

Na’shana saaye ke mousam ka asar toh dekho!
Aaina khaal-o khad-e aania’gar ko tarse.

Ek duniya hai ki basti hai teri aankhon mein,
Woh toh hum they jo teri ek nazar ko tarse.

Shor-e sur’sar mein jo sar sabaz rahi hai mohsin,
Mousam-e gul mein wohi shaakh samar ko tarse. !!

Rett Pe Likh Ke Mera Naam Mitaya Na Karo..

Rett par likh ke mera naam mitaya na karo,
aankhein sach bolati hain pyar chhupaya na karo.

Log har baat ka afsaana bana lete hain,
sab ko halaat ki rudaad sunaya na karo.

Ye zaruri nahi har shakhs maseeha hi ho,
pyar ke zakhm amaanat hain dikhaya na karo.

Shehar-e ehasaas mein pattharaav bahut hai ‘Mohsin
dil ko sheeshe ke jharonkhon mein sajaya na karo. !

Maine Dekha Tha Un Dino Mein Usey..

Maine dekha tha un dino mein usey..

Jab woh khilte gulaab jaisa tha
uski palkon se neend chhanti thi
uska lehja sharaab jaisa tha
uski zulfon se bheegti thi ghatta
uska rukh mahtaab jaisa tha
log padhte they khal-o khad uss ke
woh aadaab ki kitaab jaisa tha
bolta tha zubaan khushbu ki
log sunte they dhadkanon mein usey.

Maine dekha tha un dino mein usey..

saari aankhein thi aainey uske
saare chahron mein intekhaab tha woh
ye khwaab hai ki woh haqeeqat tha
ye haqeeqat hai ki koi khwaab tha woh
sab se ghul-mil kar ajnabi rehna
ek dariya’numa saraab tha wo
apni neendein usi ki nazar hui
maine paya tha ratjaggon mein usey.

Maine dekha tha un dino mein usey..

jab wo hans hans ke baat karta tha
dil ke kheme mein raat karta tha
rang padte they aanchalon mein usey.

Maine dekha tha un dino mein usey..

ye magar dair ki kahani hai
ye magar door ka fasana hai
us ke mere milaap mein hayil
ab toh sadiyon bhara zamana hai
ab toh ye ki haal apna bhi
dasht-e hijran ki shaam jaisa hai
kya khabar inn dino woh kaisa hai ?

Maine dekha tha un dino mein usey. !