Home / Poets / Mohsin Naqvi (page 3)

Mohsin Naqvi

Kathin Tanhaiyon Se Kaun Khela, Main Akela..

Kathin tanhaaiyon se kaun khela, main akela,
bhara ab bhi mere gaaon ka mela, main akela.

Bichhad kar tujh se main shab bhar na soya, kaun roya,
ba-juz* mere ye dukh bhi kis ne jhela, main akela.

Ye be’aawaaz banjar ke baasi, ye udaasi,
ye dasht ka safar, jungle, ye bela, main akela.

Main dekhun kab talak manzar suhaane, sab puraane
wahi duniya, wahi dil ka jhamela, main akela.

Woh jis ke khauf se sehraa sidhaare log saare,
guzarne ko hai toofaan ka woh rella, main akela. !!
*[ ba-juz=exception ]

Jab Se Usne Shehar Ko Chhoda Har Raasta Sunsaan Hua..

Jab se usne shehar ko chhoda har raasta sunsaan hua,
apna kya hai saare shehar ka ek jaisa nuksaan hua.

Ye dil ye aaseb ki nagari maskan sochon wehamon ka,
soch raha hun iss nagari mein tu kab se mehmaan hua.

Sehra ki munh zor hawayein auron se mansub hui,
muft mein hum aawaara thahre muft mein ghar weeraan hua.

Mere haal pe hairat kaisi dard ke tanha shehar mein,
patthar bhi ro padte hain insaan toh phir insaan hua.

Itni der mein ujde dil par kitne mahshar beet gaye,
jitni der mein tujh ko paa kar khone ka imkaan hua.

Kal tak jis ke gird tha raqsaan ek amboh sitaaron ka,
aaj ussi ko tanha paa kar main toh bahut hairaan hua.

Uske zakhm chhupa kar rakhiye khud uss shakhs ki nazaron se,
uss se kaisa shikwa kijiye woh toh abhi nadaan hua.

Jin ashkon ki phiki lau ko hum bekaar samajhte the,
un ashkon se kitna roshan ek taarik makaan hua.

Yun bhi kam-aamez  tha mohsin woh iss shehar ke logon mein,
lekin mere saamne aa kar aur bhi kuchh anjaan hua. !!

*[ aaseb=evil spirit | mahshar=the last day | kam-aamez=less mixed
raqsaan=dancing | amboh=a crowd | taarik=dark ]

 

Agarche Main Ek Chattan Sa Aadmi Raha Hun..

Mohsin Naqvi Poetry

Agarche main ek chattaan sa aadmi raha hun,
magar tere baad housla hai ki jee raha hun.

Woh raiza raiza mere badan mein utar raha hai,
main qatra qatra ussi ki aankhon ko pee raha hun.

Teri hatheli pe kis ne likha hai qatal mera,
mujhe toh lagta hai main tera dost bhi raha hun.

Khuli hain aankhein magar badan hai tamaam patthar,
koi bataaye main marr chuka hun ki jee raha hun.

Kahan milegi misaal meri sitamgari ki,
Ki main gulaabon ke zakham kaanto se sii raha hun.

Na puchh mujh se ki shehar walon ka haal kya tha,
ki main toh khud apne ghar mein bhi do ghadi raha hun.

Mila toh beete dinon ka sach uski aankh mein tha,
woh aashna jis se muddaton ajnabi raha hun.

Bhula de mujh ko ki bewafaai bajaa hai lekin,
ganwa na mujh ko ki main teri zindagi raha hun.

Woh ajnabi ban ke ab mile bhi toh kya hai ‘mohsin
ye naaz kam hai ki main bhi uska kabhi raha hun. !!

Aap Ki Aankh Se Gehra Hai Meri Rooh Ka Zakhm..

Aap ki aankh se gehra hai meri rooh ka zakhm,
aap kya soch sakenge meri tanhai ko.

Main toh dum tod raha tha magar afsurda-hayaat,
khud chali aayi meri housla-afzaai ko.

Lazzat-e ghum ke siwa teri nighaahon ke baghair,
kaun samjha hai mere zakhm ki gehraai ko.

Main badhaunga teri shohrat-e khushbu ka nikhaar,
tu dua de mere afsaana-e ruswaai ko.

Woh toh yun kahiye ki ek qaus-e quzah* phail gayi,
warna main bhool gaya tha teri angdaai ko. !!

* [ qaus-e quzah = Rainbow

Udaas Dil Ke Liye Mashghale Talaash Karun..

Naya hai shehar naye aasre talaash karun,
tu kho gaya hai kahan ab tujhe talaash karun.

Jo dasht mein bhi jalaate the fasl-e gul ke charaagh,
main shehar mein bhi wahi aable talaash karun.

Tu aks hai toh kabhi meri chashm-e tarr mein utar,
tere liye kahan main aainey talaash karun.

Tujhe hawaas ki aawaragi ka ilm kahan,
kabhi main tujh ko tere saamne talaash karun.

Ghazal kahun kabhi saada se khat likhun usko,
udaas dil ke liye mashghale talaash karun.

Mere Wazood se shayad mile suraag tera,
kabhi main khud ko tere waaste talaash karun.

Main chup rahun kabhi bewajah hans padu ‘Mohsin
usey ganwa ke ajab housle talaash karun. !!

Wohi Raaton Ki Bedaari Hai Ab Tak..

Wohi raaton ki bedaari hai ab tak,
Tamanna ka safar jaari hai ab tak.

Khyal-e zabt aur tark-e talluq,
Yehi patthar bahut bhaari hai ab tak.

Akeli chandni raaton mein dil ko,
Sulag uthne ki beemaari hai ab tak.

Abhi pichhle dino jo hum pe guzri,
Usi rutt ka nasha taari hai ab tak.

Main hijrat kar toh lun chaman se ‘Mohsin
Par parindon se meri yaari hai ab tak.. !!

Gum Sum Hua Aawaz Ka Dariya Tha Woh Ek Shakhs..

Gum sum hua aawaz ka dariya tha woh ek shakhs,
Patthar bhi nahi ab woh sitara tha jo ek shakhs.

Shayazed woh bhi koi harf-e wafa dhoondh raha tha,
Chehron ko bade gaur se padhta tha woh ek shakhs.

Sehra ki tarah dair se pyasa tha woh shayad,
Baadal ki tarah toot ke barsa tha woh ek shakhs.

Aye tezz hawa koi khabar uss ke junoon ki,
Tanha safar-e shouq pe nikla tha jo ek shakhs.

Ab aakhri sitaron mein kahin naam hai uss ka,
Ahbaab ki fehrist mein pehla tha jo ek shakhs.

Haathon mein chhupaye hue phirta hai kayi zakham,
Sheeshe ke khilono se behlta tha jo ek shakhs.

Mudd mudd ke isey dekhna chahein meri aankhein,
Kuchh door mujhe chhodne aaya tha jo ek shakhs.

Har zehan mein kuchh naqsh-e wafa chhod gya hai,
Kehne ko bhare shehar mein tanha tha jo ek shakhs.

Munkar hai wohi ab meri pehchaan ka Mohsin,
Aksar mujhe khat khoon se likhta tha jo ek shakhs..!!