Home / Poets / Mohsin Naqvi (page 2)

Mohsin Naqvi

Main Kal Tanha Tha Khilqat So Rahi Thi..

Main kal tanha tha khilqat* so rahi thi,
Mujhe khud se bhi wehshat ho rahi thi.

Usey jakda hua tha zindagi ne,
Sirhaane maut baithi ro rahi thi.

Khula mujh par ki meri khush-naseebi,
Mere raaste mein kaante bo rahi thi.

Mujhe bhi na-rasaai* ka samar* de,
Muje teri tamanna jo rahi thi.

Mera qaatil mere andar chhupa tha,
Magar badnaam khilqat ho rahi thi.

Baghawat kar ke khud apne lahoo se,
Gulaami daag apne dho rahi thi.

Labon par tha sukoot-e-marg* lekin,
Mere dil mein qayaamat so rahi thi.

Ba-juz* mauj-e fanna duniya mein ‘mohsin
Humaari justzu kis ko rahi thi. !!

*[ Khilqat=creation,nature,the world
Na-rasaai=incapability, failure
Samar=fruit,profit,result
Sukoot-e-marg=silence of death ]

Mohsin Naqvi

Tere Badan Se Jo Chhu Kar Idhar Bhi Aata Hai..

Tere badan se jo chhu kar idhar bhi aata hai,
misaal-e rang woh jhaunka nazar bhi aata hai.

Tamaam shab jahan jalta hai ek udaas diya,
hawa ki raah mein ek aisa ghar bhi aata hai.

Woh mujhe toot ke chaahega chhod jaayega,
mujhe khabar thi usey ye hunar bhi aata hai.

Ujaad bann mein utarta hai ek jugnu,
hawa ke saath koi humsafar bhi aata hai.

wafa ki kaun si manzil pe usne chhoda tha,
ki woh toh yaad humein bhool kar bhi aata hai.

Jahan lahoo ke samundar ki hadd theharti hai,
wahin jazeera-e-laal-o-gauhar* bhi aata hai.

Chale jo zikar farishton ki paarsaai* ka,
toh zer-e-behas* maqaam-e-bashar* bhi aata hai.

Abhi sinaan* ko sambhaale rahein aduu mere,
ki un safon* mein mera sar bhi aata hai.

Kabhi kabhi mujhe milne bulandiyon se,
shua-e-subh* ki soorat utar bhi aata hai.

Isiliye main kisi shab na so saka ‘Mohsin
woh mehtaab kabhi baam* par bhi aata hai. !!

*[Jazeera-e-laal-o-gauhar=an island of rubies and pearls,
Paarsaai=holiness, zer-e-behas=under discussion,
Maqaam-e-bashar=place of human, baam=tarace
Sinaan=sword, Safon=lines, Shua-e-subh=ray of morning]

Mohsin Naqvi

Ye Keh Gaye Hain Musaafir Lute Gharon Wale..

Ye keh gaye hain musaafir lute gharon wale,
darein hawa se parinde khule paron wale.

Ye mere dil ki hawas dasht-e bekraan jaisi,
woh tere aankh ke tevar samundaron wale.

Hawa ke haath mein kaase* hain zard patton ke,
kahan gaye woh sakhi sabz chaadron wale.

Kahan milenge woh agle din’on ke shehzaade,
pehan ke tan pe labaade gadaagaron* wale.

Pahaadiyon mein ghire ye bujhe bujhe raaste,
kabhi idhar se guzarte the lashkaron wale.

Unhi pe ho kabhi naazil* azaab* aag azal*,
wahi nagar kabhi thehren payambaron* wale.

Tere supurad karun aaine muqaddar ke,
idhar toh aa mere khush-rang pattharon wale.

Kisi ko dekh ke chup chup se kyon hue ‘mohsin
kahan gaye woh iraade sukhan’waron wale. !!

* [ Kaase=bowls, Gadaagaron=beggars,
Naazil=descending,
Azaab=pain,torment,misfortune,anguish
Azal=Death ]

Mohsin Naqvi

Zubaan Rakhta Hun Lekin Chup Khada Hun..

Zubaan rakhta hun lekin chup khada hun,
main aawaazon ke ban mein ghir gaya hun.

Mere ghar ka daricha puchhta hai,
main sara din kahan phirta raha hun.

Mujhe mere siwa sab log samjhe,
main apne aap se kam bolta hun.

Sitaaron se intehaa ki hasad hai,
main qabaron par charaagan kar raha hun.

Sambhal kar ab hawaaon se uljhna,
main tujh se peshtar bujhne laga hun.

Meri qurbat se kyon khaaif* hai duniya,
samandar hun main khud mein gunjta raha hun.

Mujhe kab tak sametega woh ‘Mohsin
main andar se bahut toota hua hun. !!
*[ Khaaif=afraid ]

Guzarta Saal Hai, Aur Saal Ka Ye Aakhiri Din Hai..

Guzarta saal hai, aur saal ka ye aakhiri din hai
abhi kuchh dhoop hai lekin,
zara si derr ko tayy hai ki aakhir shaam honi hai,
haqeeqat ya kahani jo bhi hai anjaam honi hai.
agar tayy hai yehi hona,
toh phir kis baat ka khaadsha ?
toh phir kis baat ka rona ?
chalo mil baith kar apne khasaare baant lete hain..
sabhi rang aur jugnu aur sitaare baant lete hain.

Guzarta saal hai, aur saal ka ye aakhiri din hai
abhi kuchh dhoop hai lekin,
zara si derr ko tayy hai ki aakhir shaam honi hai,
haqeeqat ya kahani jo bhi hai anjaam honi hai.
agar tayy hai yehi hona,
toh kyon na shaam se pehle ?
kisi anjaam se pehle ?
bhula kar har pareshaani,
jhatak kar har takalluf ko,
jo kuchh ghadiyan mayassar hain..
inhi mein zindagi kar lein..
kisi ehsaas ki shama jalaa kar in andheron mein,
koi dum roshani kar lein,
chalo hum dosti kar lein.

Guzarta saal hai, aur saal ka ye aakhiri din hai ….!!

 

Khud Apne Dil Mein Kharaashein Utaarni Hongi..

Khud apne dil mein kharaashein utaarni hongi,
abhi toh jaag ke raaten guzaarni hongi.

Tere liye mujhe hans hans ke bolna hoga,
mere liye tujhe zulfein sanwaarni hongi.

Teri sadaa se tujhi ko taraashna hoga,
hawa ki chaap se shaklein ubhaarni hongi.

Abhi toh teri tabiyyat ko jeetne ke liye,
dil-o nighaah ki shartein bhi haarni hongi.

Tere wisaal ki khwaahish ke tez rangon se,
tere firaaq ki subahein nikhaarni hongi.

Ye shayari, ye kitaabein, ye aayatein dil ki
nishaaniyan ye sabhi tujh pe waarni hongi. !!